ޕީޖީ ވިދާޅުވަނީ ރިހާކުރު ފުޅި ވަގަށް ނެގި މީހާ ކޯޓަށް ހާޒިރު ކުރެވެންޏާ އެހެން މީހުންވެސް ކުރެވެން ޖެހޭނެ ކަމަށް!

"ރިހާކުރުފުޅި ވަގަށް ނެގި" މައްސަލައިގައި، އެމީހާ ކޯޓަށް ހާޒިރުކޮށް ޝަރީޢަތް ކޮށްފައި، އެހެން މީހަކު ވީމާ، ރާއްޖޭގެ އިޚްތިސާސް ނުހިނގާ ތަނެއްގައި، ސުޕްރީމް ކޯޓުގެ ގަވާއިދާ ޚިލާފަށް ޝަރީޢަތް ކުރުން ރަނގަޅެއް ނޫން ކަމަށް ވިދާޅުވެ ޢަލީ ވަޙީދުގެ ޝަރީޢަތަށް ޕްރޮސެކިއުޓަރ ޖެނެރަލް ޙުސައިން ޝަމީމް ފާޑުވިދާޅުވެއްޖެއެވެ.

ކުރީގެ ޓޫރިޒަމް މިނިސްޓަރ މަގާމުގައި ހުންނެވި އިރު އެ މިނިސްޓްރީގެ އަންހެން މުވައްޒަފުންތަކަކަށް ޖިންސީ ފުރައްސާރަކުރި މައްސަލާގައި ޢަލީ ވަޙީދުގެ މައްޗަށް ދައުވާ އުފުލައި ޝަރީއަތް ކުރިއަށްދާއިރު، އޭނާ ވީ ބޭސްފަރުވާއަށް ރާއްޖެއިން ބޭރަށް ފުރާފައެވެ. އޭނާ ފުރީ އަސްޢަދު ޢަލީ (އަޑުބަރޭ) ޖާމިނުވާ ގޮތަށް، ކޯޓު އަމުރެއްގެ ދަށުން ޕާސްޕޯޓު ދޫކުރުމުންނެވެ. ނަމަވެސް އޭނާ ޝަރީޢަތަށް ހާޒިރުކުރަން ޖެހުނު އިރު، އަޑުބަރޭއަށް އޭނާ ވީތަން ނޭނގޭ ކަމަށް ވަނީ ބުނެފައެވެ.

ޢަލީ ވަޙީދުގެ މައްސަލާގެ ޝަރީއަތެއް މި މަހުގެ 21ވަނަ ދުވަހު ކުރިއަށް ގެންގޮސްފައިވާއިރު، އޭނާ އެ ޝަރީޢަތުގައި ބައިވެރިވީ އޮންލައިންކޮށް، އެހެން ގައުމެއްގައި ހުރެގެންނެވެ. ނަމަވެސް އޭނާ ހުރީ ކޮންތަނެއްގައި ކަމެއް ނޭނގެއެވެ. އެހެންވެ ޝަރީޢަތް ވީޑިއޯ ކޮންފަރެންސް މެދުވެރިކޮށް ކުރިއަށް ގެންދަން ނިންމި ނިންމުން ހައިކޯޓުގައި އިސްތިއުނާފު ކުރަން ޕީޖީ އޮފީހުން ވަނީ ނިންމާފައެވެ.

އެކަމާ ގުޅިގެން ޕްރޮސެކިއުޓަރ ޖެނެރަލް މިސާލު ނެންގެވީ "ރިހާކުރުފުޅި ވަގަށް ނެގި މީހާ"ގެ މައްސަލައިންނެވެ. އެގޮތުން އެވަރުގެ ކުޑަ ކުށެއް ކުރި މީހަކު ކޯޓަށް ހާޒިރުކުރެވުނު އިރު ޖިންސީ ފުރައްސާރަ ފަދަ ބޮޑު ކުށެއްގެ ތުހުމަތުކުރެވޭ މީހަކު ކޯޓަށް ހާޒިރުނުކޮށް ޝަރީޢަތް ކުރިއަށް ގެންދިއުން ގޯހެއް ކަމުގައި ދެކެވަޑައިގަންނަވާ ކަމަށް ޕީޖީގެ ޓުވީޓުގައި ހާމަކުރައްވާފައިވެއެވެ.

ޢަލީ ވަޙީދުގެ ޝަރީޢަތް ވީޑިއޯ ކޮންފަރެންސް މެދުވެރިކޮށް ކުރިއަށް ގެންދަން ނިންމި ނިންމުން ހައިކޯޓުގައި އިސްތިއުނާފުކުރާކަން ހާމަކޮށް ޕީޖީ އޮފީހުން ނެރުނު ބަޔާނުގައި ވެސް ވަނީ، ރާއްޖޭގެ އިޚްތިސާސް ނުހިނގާ ތަނެއްގައި އޭނާ ބަހައްޓައިގެން ޝަރީޢަތް ކުރިއަށް ގެންދިއުމަކީ ސުޕްރީމް ކޯޓުގެ ގަވާއިދާ ޚިލާފުކަމެއް ކަން ފާހަގަކޮށްފައެވެ. އެގޮތުން ޑިއޯ ކޮންފަރެންސް މެދުވެރިކޮށް ޝަރީއަތް ހިންގުން ހުއްދަކުރާ 12 ހާލަތެއް އޮންނަ ކަމަށާއި، ނަމަވެސް އެއިން އެއްވެސް ހާލަތަކަށް ޢަލީ ވަޙީދު ނުފެތޭކަން ފާހަގަކޮށްފައިވެއެވެ.

ޢަލީ ވަޙީދު ދިވެހިރާއްޖޭގެ ޖޫރިސްޑިކްޝަނުން ބޭރުގައި ހުރެ ޝަރީޢަތުގައި ބައިވެރިވާކަމަށް ބެލެވޭތީ ދައުލަތުން އެ ކަމަށް އިޢުތިރާޟްކޮށް، އެކަން ވެފައިވާގޮތް ސާފުކުރުމަށް ޝަރީޢަތާ ވަނީ ސުވާލު ކުރިމަތިކުރުވާފައެެވެ.

ރާއްޖޭގެ ޤާނޫނު ނުހިނގާ ތަނެއްގައި ހުރި މީހެއްގެ މައްޗަށް ވީޑިއޯ ކޮންފަރެންސްކޮށް ޖިނާއީ މައްސަލައެއްގެ ޝަރީއަތުގެ އަޑުއެހުމެއް ބޭއްވި މިއީ ފުރަތަމަ ފަހަރެވެ. އެހެންކަމުން މިއީ ޖިނާއީ އިޖުރާއާތުގެ ގާނޫނު ދަންނަ ކަމެއް ނޫންކަމަށް ޕީޖީ އޮފީހުން ބުނެފައިވެއެެވެ. އެހެންކަމުން އެގޮތަށް ޝަރީޢަތް ކުރިއަށް ނުގެންދެވޭނަކަމަށް ބުނެ ދައުލަތުން ވަނީ އިޢުތިރާޟްކޮށްފައެެވެ. ނަމަވެސް ގާޒީ ޙަސަން ސަޢީދު ވަނީ ޝަރީޢަތް ކުރިއަށް ގެންގޮސްފައެވެ.

މިނިސްޓްރީ އޮފް ޓޫރިޒަމްގެ ގިނަ ޢަދަދެއްގެ އަންހެން މުވައްޒަފުންތަކަކަށް ޖިންސީ ގޯނާ ކޮށްފައިވާކަމަށް ތުހުމަތުކުރެވުނު މައްސަލައިގައި ކުރީގެ މިނިސްޓަރ އޮފް ޓޫރިޒަމް ޢަލީ ވަޙީދުގެ މައްޗަށް ކްރިމިނަލް ކޯޓަށް ހުށަހަޅާފައިވަނީ ރޭޕްކުރަން އުޅުމުގެ ކުށުގެ ދަޢުވާއާއި، ޖިންސީ އަނިޔާއެއްކުރުމުގެ ކުށުގެ ދަޢުވާއާއި، ޖިންސީ ޢަމަލެއް ހިންގުމަށް އެދުމުގެ ދެ ދަޢުވާއާއި، ބޭއަދަބީ ގޮތުގައި ޖިންސީ ގުނަވަން ހާމަކުރުމުގެ ކުށުގެ ދަޢުވާއާއި، ޖިންސީ ގޯނާކުރުމާއި، ޖިންސީ ގޯނާކުރަން އުޅުމުގެ ކުށުގެ ދަޢުވާއެވެ.