މަރުވެފައި އޮއްވައި ފެނިފައިވަނީ ގދ. އަތޮޅަށް ނިސްބަތްވާ ކުއްޖެއް
22 ޖޫން 2021 | އަންގާރަ 04:36އެ ކުއްޖާ މަރާލާފައި އޮއްވައި ފެނުނީ ހުޅުމާލެ ދެވަނަ ފިޔަވަހީގެ މޫދުން
ހުޅުމާލެ ދެވަނަ ފިޔަވަހި މޫދު ސަރަހައްދު
ރަހީނުކޮށްގެން މަރާލާފައި އޮއްވައި ފެނުނު ކުއްޖަކީ ގދ. އަތޮޅަށް ނިސްބަތްވާ ކުއްޖެއްކަން އެނގިއްޖެއެވެ.
13 އަހަރުގެ ކުއްޖާ ނިސްބަތްވާ ރަށުގެ ކައުންސިލުން ރާއްޖެއެމްވީއަށް މިކަން ކަށަވަރު ކޮށްދެމުން ބުނީ، ކައުންސިލަށް އެ މައުލޫމާތު ލިބިފައިވާ ކަމަށާއި، އެކުއްޖާ ގެއްލިގެން އާއިލާއިން ރިޕޯޓުކުރި ފަހުން އިތުރު މައުލޫމާތެއް ނުލިބި ދެން އިވުނީ މަރާލި ޚަބަރު ކަމަށެވެ.
ރަހީނުކޮށްގެން އުޅުނު ކުއްޖަކު މަރާލާފައި އޮއްވައި ހުޅުމާލެ ދެވަނަ ފޭސްގެ މޫދުން ފެނުނީ ހޯމަ ދުވަހުގެ ރޭގައެވެ.
ފުލުހުން ބުނީ 13 އަހަރުގެ ފިރިހެން ކުއްޖަކު ރަހީނުކޮށްގެން ގެންގުޅޭ މައްސަލައެއް މި މަހުގެ 20 ވަނަ ދުވަހު ރިޕޯޓް ކޮށްފައިވާތީ، އެ ކުއްޖާ ހޯދުމުގެ މަސައްކަތް ކުރަމުންދަނިކޮށް، އެ ކުއްޖާ މަރާލާފައި އޮއްވައި ފެނުނީ މި މަހުގެ 21 ވަނަ ދުވަހުގެ ރޭ، ދަންވަރު 2:38ހާއިރު ކަމަށެވެ.
މި މައްސަލައާ ގުޅިގެން 17 އަހަރުގެ ދިވެހި ފިރިހެން ކުއްޖަކާއި، 27 އަހަރުގެ ދިވެހި ފިރިހެނަކު މިހާރު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް ފުލުހުން މައުލޫމާތުދެއެވެ. އިތުރު ތަފްސީލެއް ފުލުހުން ހާމައެއް ނުކުރެއެވެ.
ފުލުުހުން ބުނީ މި މައްސަލަ ވަރަށް ސީރިއަސް މައްސަލައެއްގެ ގޮތުގައި ތަހުގީގު ކުރަމުން އަންނަ ކަމަށެވެ.
