އައިސެކްގައި ދިވެހިރާއްޖެއިން ބައިވެރިވުމަށް މަޖިލީހުން ފާސްކޮށްފި

"ދަ އިސްލާމިކް ކޯޕަރޭޝަން ފޮރ ދި އިންޝުއަރެންސް އޮފް އިންވެސްޓްމަންޓް އެންޑް އެކްސްޕޯޓް ކްރެޑިޓް (އައިސީއައިއީސީ ނުވަތަ އައިސެކް)" ގައި ދިވެހިރާއްޖެއިން ބައިވެރިވުމަށް ފެންނަ ކަމަށް ރައްޔިތުންގެ މަޖިލީހުން ފާސްކޮށްފިއެވެ.

ހޯމަ ދުވަހުގެ ރައްޔިތުންގެ މަޖިލީހުގެ ޖަލްސާއިން އައިސެކްގައި ބައިވެރިވުމަށް ފާސްކޮށްފައިވަނީ އެކަމަށްޓަކައި ނެގުނު ވޯޓުގައި ބައިވެރިވެވަޑައިންނެވި 52 މެންބަރުންގެ އިއްތިފާގުންނެވެ.

Advertisement

އައިސެކްގައި ބައިވެރިވުމާމެދު ރައްޔިތުންގެ މަޖިލީހުގެ ރުހުން ހޯއްދެވުމަށް ރައީސުލްޖުމްހޫރިއްޔާ ފޮނުއްވާފައިވާ މައްސަލަ ދިރާސާކޮށްފައިވަނީ މަޖިލީހުގެ ޚާރިޖީ ގުޅުންތަކުގެ ކޮމިޓީންނެވެ. ކޮމިޓީން މައްސަލަ ދިރާސާކޮށް ނިންމި ގޮތުގެ ރިޕޯޓުގައި ބުނީ އައިސެކްގެ މައިގަނޑު މަގްސަދަކީ މެމްބަރު ގައުމުތަކަށް ވިޔަފާރީގެ މުއާމަލާތްތައް ފުޅާކޮށް އިންވެސްޓްމަންޓްތަކުގެ ފުރުސަތުތައް މެންބަރު ގައުމުތަކަށް ތަނަވަސްކޮށްދިނުން ކަން ފާހަގަވެގެންދިޔަ ކަމަށެވެ.

42 ވަނަ އައިއެސްޑީބީ ބައްދަލުވުމުގެ މަޝްވަރާތަކަށްފަހު 04 ޖުލައި 2017 ވަނަ ދުވަހު އައިސެކްގެ މެންބަރު ގައުމަކަށްވުމަށްޓަކައި ދިވެހިރާއްޖެއިން ރަސްމީކޮށް އެޕްލިކޭޝަން ހުށަހަޅާފައިވާ ކަމަށް ވެސް ކޮމިޓީ ރިޕޯޓުގައި ބުނެއެވެ.

މި ރިޕޯޓުގައި އިތުރަށް ބުނީ އައިސެކްގެ މެންބަރު ގައުމަކަށްވުމުން ލިބޭ ފައިދާތަކުގެ ތެރޭގައި އިތުރު ފައިނޭންސިން ފެސިލިޓީތަކަށް ދޮރު ހުޅުވިގެން ދިއުމާއި ބޭންކް މާސްޓަރ ޕޮލިސީގެ ދަށުން ނަން-ޕާރފޯމިން ހަރުމުދާ މަދުކުރުމަށް އެހީތެރިކަން ފޯރުކޮށްދޭ ރިސްކް މެނޭޖްމަންޓް ހަރުދަނާކުރުން ހިމެނޭ ކަމަށެވެ.

އަދި އިސްލާމީ ޝަރީއަތުގެ އޮނިގަނޑާ އެއްގޮތަށް ފައިނޭޝިއަލް ފެސިލިޓީތައް ތައްޔާރުކުރުމަށް އެހީތެރިކަން ފޯރުކޮށްދިނުމާއެކު ބެލެންސް ޝީޓްގެ އޮނިގަނޑު ވަރުގަދަ ކޮށްދިނުމާއި، އަދި ކަސްޓަމަރުން ހޯދުމާއި ބައިނަލްއަގްވާމީ ބާޒާރުން ޖާގަ ހޯދައި ދިނުމަށް މަގުފަހި ވެގެންދާނެ ކަމަށެވެ.

މި މައްސަލަ ދިރާސާކުރުމުގައި ކޮމިޓީން ވަނީ ފިނޭންސް މިނިސްޓްރީގެ އިސްބޭފުޅުންނާ މަޝްވަރާކޮށް އެބޭފުޅުންގެ ލަފާ ހޯއްދަވާފައެވެ.