ދިގު އިންތިޒާރުތަކަކަށް ފަހު މިޝްކާ މުޙައްމަދުގެ މަރުގެ މައްސަލަ ތަހުޤީޤުކުރުމަށްފަހު ނެރުނު ތަފްސީލީ ރިޕޯޓު ހެލްތު މިނިސްޓްރީން މިވަނީ އާންމުކޮށްފައެވެ. މީގެ ކުރިން އެ މިނިސްޓްރީއިން ނެރުނު ރިވިއު ރިޕޯޓާ ޚިލާފަށް މި ރިޕޯޓްގައި ވަނީ އިހުމާލުވި ހިސާބާއި، ޒިންމާވާ ފަރާތްތައް ތަފުސީލުކޮށްދީފައެވެ.
މި ރިޕޯޓާ ގުޅޭގޮތުން ރާއްޖެ އެމްވީއާއި ވާހަކަދައްކަމުން މިޝްކާގެ އާއިލާއިން ބުނެފައިވަނީ މިޝްކާއަށް އިންސާފު ހޯދުމަށް ޤާނޫނީ އެހީ ނުވަތަ "ލީގަލް" މަގު އިޚްތިޔާރުކޮށްފައިވާކަމަށެވެ. އަދި ހެލްތު މިނިސްޓްރީގެ ތަފްސީލީ ރިޕޯޓް އާއިލާއިން އިތުރަށް ބަލައި، އިންސާފު ގެއްލޭފަދަ އެއްވެސް ކަމެއް ވިޔަ ނުދިނުމަށް އަމާޒު ހިފާފައިވާކަމަށެވެ. އަދި ރިޕޯޓާ ގުޅޭގޮތުން އެއްޗެކޭ ބުނާނީ ރަނގަޅަށް ރިޕޯޓް އެނަލައިޒްކޮށްފައިކަމަށް އާއިލާއިން ބުނެއެވެ. މިޝްކާގެ އާއިލާއިން އައު އަމާޒުގެ ދަށުން މިހާރު ފުލުހުންނަށް ސިޓީއެއްވެސް ވަނީ ފޮނުވާފައެވެ. މިކަމުގެ އިތުރު ތަފްސީލު ކުރިއަށް އޮތް ދުވަސްތަކުގައި ހާމަކުރާނެކަމަށް އާއިލާއިން ބުނެއެވެ.
ސަރުކާރުން މިޝްކާއަށް އިންސާފު ހޯދުން ލަސްވަމުންދާތީ އާއިލާއިން މީގެ ކުރިންވެސް ވަނީ މިކަމަކީ ދިގުލައިގެން ގޮސް "މާދަމާ، މާދަމާ" ކިޔާ ކަހަލަ ކަމަކަށް ވިޔަ ނުދިނުމަށް އާއިލާއަށް ކުރެވެން ހުރި ހުރިހާކަމެއް ކުރާނެކަމަށެވެ. އެގޮތުން ހެލްތް މިނިސްޓަރ ނަސީމް އެދިވަޑައިގަތް 1 ހަފުތާގެ މުއްދަތުގައި ވަޢުދުފުއްދެވުމަށް ބާރު އެޅުމަށް 7 ދުވަހުގެ ކައުންޓްޑައުންއެއްވެސް ވަނީ ކުރިއަށް ގެންގޮސްފައެވެ. އޭރުވެސް އާއިލާއިން ބުނެފައިވަނީ ސަރުކާރަށް އެއް ހަފުތާއަށްވުރެ އިތުރަށް، މިކަމުގައި ބަހަނާދައްކައި މައްސަލަ ދިގުދަންމަން ފުރުސަތު ނުދޭނެކަމަށެވެ. އަދި ވަޢުދުވެފައިވާ މުހުލަތަށްވުރެ މަސައްކަތުގެ ދިއުޅި ދިގުވެ، އެއަށްވުރެ ލަސްވާނަމަ ފުލުހުންނަށް މައްސަލަ ހުށަހެޅުމަށް ވިސްނާކަމަށާއި، މިކަމުގެ ކަންބޮޑުވުންތައް ކަމާ ގުޅުން ހުރި އެހެން އިދާރާތަކަށްވެސް ހިއްސާކުރުން ލަސް ނުކުރާނެކަމަށް އާއިލާއިން ވަނީ ބުނެފައެވެ.
ހެލްތު މިނިސްޓްރީން އާންމުކުރި ތަފްސީލީ ރިޕޯޓްގައި މިހާދިސާގައި ކަންހިނގާފައިވާ ގޮތަށް ބަލާއިރު ފާހަގަ ކުރެވޭ ނުކުތާކުގެ ގޮތުގައި ހެލްތް މިނިސްޓްރީއިން ފާހަގަކޮށްފައިވަނީ، މިޝްކާގެ އާއިލާއަށް އެޗް.އީ.އޯ.ސީއިން ދޭންޖެހޭ ފަރުވާ ފޯރުކޮށް ދިނުމުގެ ހުރިހާ މަރުހަލާއެއްގައި އެކަށީގެން ނުވާވަރުގެ ލަސްތަކެއްވެފައި ވާކަމާއި، ޑީ.އެމް.އާރް.ޓީއިން އޮންލައިން ކޮންސަލްޓޭޝަން ހެދުމުގައި ބެއްލެވި ޑޮކްޓަރުންނަށްވެސް އެފަރާތުގެ ހާލަތު އެންމެ ރަނގަޅަށް ދެނެގަނެވިފައި ނުވާކަމެވެ. އަދި ކުއްޖާގެ ބެލެނިވެރިޔާއާ ޑީ.އެމް.އާރް.ޓީގެ ޑޮކްޓަރާ ދެމެދު ކުރެވުނު މުޢާމަލާތުގެ އަލީގައި، އެކުއްޖާ ބަލާ ދާނެކަމަށް ގަބޫލު ކުރެވިފައިވާކަން ކުއްޖާގެ ބައްޕަ ކޯލް ސެންޓަރުގެ އެޖެންޓުންނާ ކޮށްފައިވާ ކޯލްތަކުގެ ލޮގްތަކުން ދޭހަވާކަމަށް ވަނީ ބުނެފައެވެ.
އަދި މީގެ އިތުރުން ކޯލް ސެންޓަރުން އެފަރާތުގެ އާއިލާއާ ކޮށްފައިވާ މުޢާމަލާތްތަކުން، ތަކުރާރުކޮށް ކުއްޖާ ބަލާ ފޮނުވާކަމަށް ދޭހަވާ އިބާރާތުން މުޢާމަލާތް ކޮށްފައިވާ ކަންވެސް ވަނީ ފާހަގަ ކޮށްފައެވެ. ނަމަވެސް މިގޮތަށް މުއާމަލާތުކުރުމުން ވެސް ރޭގަނޑު 11:32 (އީ.އެމް.އެސްއަށް ކޯލްކުރި ގަޑި)އާ ހަމައަށް އެއްވެސް ފަރާތަކުން ކުއްޖާ ބަލާ ދިއުމަށް އެންބިއުލަންސް ޓްރިގަރކޮށްފައެއް ނުވާކަންވެސް ވަނީ ފާހަގަކޮށްފައެވެ. މިއާއެކު އެޗްއީ.އޯ.ސީގެ ކޯލް ސެންޓަރއިން ކޯލްތަކަށް ޖަވާބު ދިން ފަރާތްތަކަށް، ކުއްޖާގެ ހާލަތުގެ ސީރިއަސްކަމާއި ހާލަތަށް އައި ބަދަލު ދެނެގަނެވިފައި ނެތްކަމާއި، އަދި އެ މައުލޫމާތު ފުރިހަމައަށް ލޮގްކޮށް ހުރިހާ ކޯލްތައް ހިއްސާ ކުރަން ހަމަޖެހިފައިވާ ގޮތަށް ހިއްސާކޮށްފައި ނުވާކަމަށް ވަނީ ބުނެފައެވެ.
މި ހާދިސާގައި އެޓެންޑް ވާންޖެހޭ ފަރާތްތަކުން ފަރުވާތެރިކަމާއެކު އެކަށީގެންވާ ވަގުތުގެ ތެރޭގައި އެޓެންޑްވެފައި ވާނަމަ މިހާދިސާ ހިނގުމަކީ ނާދިރު ކަމެއްކަމަށް ވަނީ ބުނެފައެވެ. އެހެންކަމުން މިފަދަ ހާދިސާއެއް ތަކުރާރުވިޔަ ނުދިނުމަށް ރިވިއުއިން ފާހަގަ ކޮށްފައިވާ ކަންކަން އިސްލާހު ކުރުމުގެ މަސައްކަތްވަނީ ފަށާފައިވާކަމަށް ވަނީ ބުނެފައެވެ. އަދި މިނިސްޓްރީއާއި އެޗްއީއޯސީއިން ވެފައިވާ އިހުމާލުތަކަށް އެއްބަސްވެ ފިޔަވަޅު އަޅާނެކަމަށް ވަނީ ބުނެފައެވެ. ނަމަވެސް މިކަމުގެ އިތުރު ތަފުސީލެއް ހިމަނާފައެއް ނުވެއެވެ.
މީގެ އިތުރުން ރިވިއު ރިޕޯޓާ ޚިލާފަށް، މި ރިޕޯޓްގައި އެޗްއީއޯސީގައި ހުރި ފެއިލިއަރތައްވެސް ވަނީ ތަފްސީލުކޮށްދީފައެވެ. އެކަށީގެންވާ ވަގުތުގައި ފިޔަވަޅު ނޭޅުނީ އެޗްއީއޯސީގެ ޕްރޮސެސް ފްލޯތަކާއި، އެސްއޯޕީތަކުގައި މައްސަލަ ހުރުމުންކަމަށް ވަނީ އެއްބަސްވެފައެވެ. އެޗް.އީ.އޯސީގައި ކޮވިޑް 19 ބަލީގެ މައުލޫމާތު ބެލެހެއްޓުމަށް ބޭނުންކުރާ ސޮފްޓްވެއަރ "އައުޓް ބްރޭކް (އޯ.ބީ) ސިސްޓަމް" ކަމުގައި ވީނަމަވެސް، މި ސިސްޓަމްގެ ބަދަލުގައި އެހެނިހެން ސިސްޓަމްތައް ބޭނުންކުރުމުން، އެއް ސިސްޓަމަކުން ހުރިހާ މައުލޫމާތެއް ލިބެންނެތްކަމަށްވެސް ވަނީ އެއްބަސްވެފައެވެ.
މައްސަލަތަކުގައި އެންމެ ފުރަތަމަ މުޢާމަލާތުކުރާ އަދި މެދުވެރިއަކަށްވާ ކޯލްސެންޓަރަށް އަންނަ ފޯނުތަކަށް ސައްހަ މައުލޫމާތު ނެތި ޖަވާބުދާރީވެ، އިމަޖެންސީ ނަންބަރުތައް ހުރެމެ މި ވަސީލަތްތައް ބޭނުންނުކުރާކަމަށް ވަނީ ބުނެފައެވެ. އަދި ހަމަ މިއާއެކު ކޯލްސެންޓަރުން އެހެން ކްލަސްޓަރތަކަށް ފުރިހަމައަށް ފޯރުކޮށްނުދެވޭ ކަމަށްވެސް އެއްބަސްވެފައިވެއެވެ. މީގެ އިތުރުން މުޢާމަލާތުކޮށް އެންމެނަށް އެއްފަހަރާ މަޢުލޫމާތުދެވޭނެ ނިޒާމުތައް މިއަދާ ހަމައަށްވެސް އެކްޓިވޭޓްނުކޮށް ވާއިރު، އެޗް.އީ.އޯސީގައި މެޖޯރިޓީ މަސައްކަތްތެރިންކަމަށްވާ ދަރުމަވެރިންނަށް، އެކަށީގެންވާ ވަރަށް މަސައްކަތަށް އަހުލުވެރި ކުރެވިފައި ނެތްކަމަށްވެސް މި ރިޕޯޓްގައި ވަނީ އެއްބަސްވެފައެވެ.
އެހެންނަމަވެސް މި ރިޕޯޓްގައި އެމްބިއުލާންސް އައުމަށްފަހު ފަރުވާ ހޯދަން އައިޖީމްއެޗަށް ގެންދެވެންދެން ކަންތައް ވީގޮތުގެ އެއްވެސް ތަފްސީލެއް ހާމަކޮށްފައެއް ނުވެއެއެވެ. މި މަރުހަލާގައިވެސް އިހުމާލުތަކެއް ހުރިކަމަށް މިޝްކާގެ އާއިލާއިން މީގެ ކުރިން ވަނީ ބުނެފައެވެ.
