އިކޮނޮމިކް ސްޓިމިއުލަސް ލޯނަށް އެދި ހުށަހަޅާ ފޯމުތައް ބަލައިގަންނަން ފަށައިފި
މިއީ އުފެއްދުންތެރިކަން އިތުރުކޮށް، އިޤްތިސާދު ކުރިއެރުވުމަށް ވިޔަފާރިތަކަށް އެހީތެރިވުމަށް ހުޅުވާލާފައިވާ ސްކީމެއް
ބޭންކް އޮފް މޯލްޑިވްސް
ކޮވިޑް-19ގެ ސަބަބުން ގޮންޖެހުންތަކާ ކުރިމަތިވެފައިވާ ވިޔަފާރިތަކަށް އެހީތެރިވުމުގެ ގޮތުން ސަރުކާރުން އިއުލާނުކޮށްފައިވާ އިކޮނޮމިކް ސްޓިމިއުލަސް ލޯނަށް އެދި ހުށަހަޅާ ފޯމުތައް ބަލައިގަންނަން ފަށައިފިއެވެ.
ބޭންކް އޮފް މޯލްޑިވްސް މެދުވެރިކޮށް ދޫކުރާ އިކޮނޮމިކް ސްޓިމިއުލަސް ލޯނަށް އެދި ހުށަހެޅުމުގެ ފުރުސަތު ހުޅުވާލާފައިވާކަން ފިނޭންސް މިނިސްޓަރ އިބްރާހިމް އަމީރު ހާމަކުރައްވާފައި ވަނީ ޖޫން 17 ވަނަ ދުވަހުއެވެ. އެގޮތުން މިނިސްޓަރ ވަނީ ސަރުކާރުން އިއުލާނުކޮށްފައިވާ އައު އިކޮނޮމިކް ރިލީފް ޕެކޭޖަކީ ރާއްޖޭގެ އުފެއްދުންތެރިކަން އިތުރުކުރުމަށާއި, އިޤްތިސާދުގެ ވިލުންވެރިކަން އިތުރުކުރުމަށް ވިޔަފާރިތަކަށް އެހީތެރިވުމަށް ހުޅުވާލައިފައިވާ ސްކީމެއް ކަމަށް ވިދާޅުވެފައެވެ.
ލޯން ދޫކުރުމުގެ މަސައްކަތްކުރާ ބީއެމްއެލް އިން ވަނީ ފިނޭންސް މިނިސްޓްރީން އެކުލަވާލާފައިވާ މިލޯން ސްކީމަކީ މެއި 27 ވަނަ ދުވަހު ސަރުކާރުން އިއުލާނުކުރި ސްޓިމިއުލަސް ޕެކޭޖްގެ ދަށުން ތައާރަފްކުރެވުނު ލޯން ސްކީމެއް ކަމަށް ބުނެފައެވެ. ބަލިމަޑުކަމާ ގުޅިގެން، މާލީ ގޮތުން ގެއްލުން ލިބިފައިވާ ވިޔަފާރިތަކަށް ހުޅުވާލެވިފައިވާ ކޮވިޑް-19 އިކޮނޮމިކް ސްޓިމިއުލަސް ލޯނު މެދުވެރިކޮށް 10 މިލިއަން ރުފިޔާއާ ހަމައަށް ފައިނޭންސަށް އެދިހުށަހެޅޭ އިރު، މިއީ ރަހުނަކާ ނުލައި 6 އިންސައްތައިގެ ކުޑަ އިންޓަރެސްޓެއްގައި ދޫކުރެވޭ ލޯނެކެވެ. ލޯނަށް އަނބުރާ ފައިސާ ދެއްކުމަށް ހަތަރު އަހަރުގެ މުއްދަތެއް ލިބޭ އިރު، ގްރޭސް ޕީރިއެޑްގެ ގޮތުގައި ގިނަވެގެން 12 މަސް ދުވަސް ލިބޭނެއެވެ.
ޖޫން 20 ވަނަ ދުވަހުން ފެށިގެން ލޯނަށް އެދި ހުށަހަޅާ ފޯމުތައް ބަލައިގަންނަން ފަށާފައިވާއިރު، މީގެ ކުރިން ބީއެމްއެލްއިން ވަނީ އިކޮނޮމިކް ސްޓިމިއުލަސް ޕެކޭޖްގެ ދަށުން ރިސޯޓްތަކަށާއި ބޮޑެތި ވިޔަފާރިތަކަށް 585.9 މިލިއަން ރުފިޔާގެ ލޯން ދޫކޮށްފައެވެ.
