އެސްއެމްއީ ލޯނަށް އެދި ހުށައެޅުމުގެ ފުރުސަތު ހުޅުވާލައިފި
ސެޕްޓެމްބަރ މަހުގެ 27 ވަނަ ދުވަހާ ހަމައަށް ފޯމް ބަލައިގަންނާނެ
އިކޮނިމިކް މިނިސްޓްރީގެ ނައިބް އާދަމް ތައުފީޤު
ކުދި އަދި މެދުފަންތީގެ ވިޔަފާރިތައް ފެށުމަށާއި ފުޅާކުރުމަށް މާލީ އެހީތެރިކަން ފޯރުކޮށްދިނުމުގެ ގޮތުން ސަރުކާރުން ކުރިއަށް ގެންދާ "އެސްއެމްއީ ލޯން" ސްކީމަށް އެދި ހުށައެޅުމުގެ ފުރުސަތު ހުޅުވާލައިފިއެވެ.
އިކޮނިމިކް މިނިސްޓްރީގެ ނައިބް އާދަމް ތައުފީޤު ވިދާޅުވީ އެސްއެމްއީ ލޯން ސްކީމްގެ ދަށުން މި އަހަރު ދޫކުރަން ހަމަޖައްސާފައި ވަނީ 38 މިލިއަން ރުފިޔާ ކަމަށެވެ. އެސްއެމްއީ ލޯނަށް އެދޭ ފޯމް ހުށަހެޅުމުގެ މުއްދަތު ސެޕްޓެމްބަރ މަހުގެ 17 އިން ފެށިގެން ސެޕްޓެމްބަރ މަހުގެ 27 ވަނަ ދުވަހާހަމައަށް ހުޅުވާލާފައިވާ ކަމަށް ވެސް އާދަމް ތައުފީޤު ވަނީ ވިދާޅުވިއެވެ.
އެ ސްކީމްގެ ދަށުން ވަކިފަރުދަކު ކުރާ ވިޔަފާރިއަކަށް ދެވޭނެ އެންމެ މަތީ އަދަދަކީ ފަސް ލައްކަ ރުފިޔާއެވެ. ޕާޓްނަރޝިޕް، ކުންފުނި ނުވަތަ ކޯޕަރޭޓިވް ސޮސައިޓީއެއް ނަމަ ދޫކުރެވޭނެ އެންމެ މަތީ އަދަދަކީ 1.5 މިލިއަން ރުފިޔާއެވެ.
އެސްއެމްއީ ސްކީމްގެ ދަށުން ލޯން ދޫކުރަން ހަމަޖައްސާފައިވާ ދާއިރާތަކަކީ ފަތުރުވެރިކަމުގެ ދާއިރާ އާއި ދަތުރުފަތުރު ކުރުމުގެ ދާއިރާ އާއި އިމާރާތް ކުރުމުގެ ދާއިރާ އާއި ދަނޑުވެރިކަމާއި މަސްވެރިކަމުގެ ދާއިރާގެ އިތުރުން ކޯޕަރޭޓިވް ސޮސައިޓީގެ ދާއިރާ އާއި ޚިދުމަތް ފޯރުކޮށްދިނުމުގެ ދާއިރާ އަދި ވޭސްޓް މެނޭޖްމަންޓް ދާއިރާ އާއި އޯޕަން ކެޓަގަރީ އެވެ.
ކޮންމެ ވިޔަފާރިއަކަށް ވެސް ހުށަހެޅޭނީ ބޭނުންވާ އެއް ދާއިރާއަކުން، އެއް އެޕްލިކޭޝަނެވެ.
ލޯނު އަދާކުރުމުގެ މުއްދަތު ކަނޑައަޅާނީ ހުށަހަޅާ ވިޔަފާރީގެ މާލީ ހިސާބުތަކަށް ރިއާޔަތް ކުރުމަށް ފަހު، ނުވަ އަހަރަށް ވުރެ މުއްދަތު އިތުރުނުވާ ގޮތަށް ކަމަށް އިކޮނިމިކް މިނިސްޓްރީން ބުނެއެވެ. އަދި މުއްދަތުގައި ގިނަވެގެން އެއް އަހަރު ދުވަހުގެ ގްރޭސްގެ މުއްދަތެއް ހިމެނިދާނެއެވެ. ގްރޭސްގެ މުއްދަތުގައި އަލަށް ފަށާ ވިޔަފާރި ފިޔަވައި ލޯންގެ އިންޓްރަސްޓަށް ވާ މިންވަރު ދައްކަންޖެހޭނެއެވެ.
