ކޮވިޑް-19 ޖެހިގެން މުޅި ދުނިޔެއިން މަރުވި މީހުންގެ އަދަދު 4 މިލިއަނަށް އަރާފައިވާކަމަށް ރޮއިޓަރސްގެ ޓެލީން ހާމަވެއްޖެއެވެ.

ރޮއިޓަރސް އިން ރިޕޯޓްކޮށްފައިވާ ގޮތުގައި ކޮވިޑް ބަލީގައި މަރުވި މީހުންގެ އަދަދު ބުރާސްފަތި ދުވަހު ވަނީ 4 މިލިއަނަށް އަރާފައެވެ. އެހެންނަމަވެސް ގައުމުތަކުން އަންނަނީ އެކަށީގެންވާ މިންވަރަށް ވެކްސިން ނުލިބުމުގެ ދަތިކަން އިހުސާސްކުރަމުންނެވެ.

ދުވާލެއްގެ މައްޗަށް ވައިރަސް ޖެހޭ މީހުންނާއި މަރުވާ މީހުންގެ އަދަދު އެމެރިކާ އަދި އިނގިރޭސިވިލާތުގައި ދަށަށްދިޔަނަމަވެސް ގިނަ ގައުމުތަކަށް ވަނީ ވެކްސިންގެ ދަތިކަން ކުރިމަތިވެފައެވެ. އަނެއްކޮޅުން އިންޑިޔާއިން ފެނިފައިވާ ޑެލްޓާ ވޭރިއަންޓްގެ ސަބަބުން ގިނަ ގައުމުތަކެއްގައި ކޮވިޑްގެ ހާލަތު އަންނަނީ ގޯސްވަމުންނެވެ.

ކޮވިޑް ޖެހިގެން މަރުވާ މީހުންގެ އަދަދު 2 މިލިއަނަށް އަރާފައިވަނީ އަހަރަކަށްވުރެ ގިނަ ދުވަހުންނެވެ. ނަމަވެސް އިތުރު 2 މިލިއަން މީހުން މަރުވާން ނަގާފައިވަނީ 166 ދުވަހެވެ. އެއީ ގާތްގަނޑަކަށް 5 މަސްދުވަހެވެ.

އެންމެ ގިނަ މީހުން މިބަލީގައި މަރުވެފައިވާ ފަސް ގައުމަކީ އެމެރިކާ، ބްރެޒިލް، އިންޑިޔާ، ރަޝިޔާ އަދި މެކްސިކޯއެވެ. މުޅި ދުނިޔެއިން ކޮވިޑް ޖެހިގެން މަރުވެފައިވާ މީހުންގެ 50 އިންސައްތަ ހިއްސާކުރަނީ މި ފަސް ގައުމެވެ. އާބާދީއަށް ބަލާއިރު އެންމެ ގިނަ މީހުން މަރުވެފައިވާ ގައުމުތަކަކީ ޕެރޫ، ހަންގޭރީ، ބޮސްނިއާ އަދި ޗެކްރިޕަބްލިކެވެ.

ލެޓިން އެމެރިކާގެ ގައުމުތަކުގައި މިއަހަރުގެ މާރޗް މަހުން ފެށިގެން ވަނީ ކޮވިޑްގެ ހާލަތު ގޯސްވެފައެވެ. އެގޮތުން މުޅި ދުނިޔެއިން ކޮވިޑް ޖެހިގެން ރިޕޯޓްކުރަމުންދާ ކޮންމެ 100 މީހަކުން 43 މީހުންނަކީ ލެޓިން އެމެރިކާ މީހެކެވެ. ފާއިތުވި ހަފުތާގައި އާބާދީގެ ނިސްބަތުން އެންމެ ގިނަ މީހުން ކޮވިޑް ޖެހިގެން މަރުވި 9 ގައުމަކީ ލެޓިން އެމެރިކާއަށް ނިސްބަތްވާ ގައުމުތަކެވެ.

ބޮލީވިއާ، ޗިލީ އަދި އުރުގުއާއީ ފަދަ ގައުމުތަކުގެ ހޮސްޕިޓަލްތައް ފުރިފައިވަނީ ކޮވިޑް ޖެހިފައިވާ 25 އަހަރާއި 40 އަހަރާ ދެމެދުގެ މީހުންނާއިގެންނެވެ. ބްރެޒިލްގެ ސައުޕައުލޯގެ ހޮސްޕިޓަލްތަކުގެ އައިސީޔޫތަކުގެ 80 އިންސައްތައަކީ ކޮވިޑް ބަލި މީހުންނެވެ.

ކުރިއަރަމުން އަންނަ ގައުމުތަކުގައި ކޮވިޑް ޖެހިގެން މަރުވާ މީހުންގެ އަދަދު އިތުރުވަމުން ދިޔުމާއެކު މަރުވާ މީހުންގެ ހަށިތައް ވަޅުލުމަށް ނުވަތަ އަންދާލުމަށް އަންނަނީ ދަތިތަކާ ކުރިމަތިވަމުންނެވެ. އަދި ގައުމުތަކުގެ ގަބުރުސްތާނުތައް ބޮޑު ކުރުމަށް ވަނީ މަޖުބޫރުވެފައެވެ.

އިންޑިޔާ އާއި ބްރެޒިލް އަކީ ޖެހިޖެހިގެން 7 ދުވަސްވަންދެން އެންމެ ގިނަ އަދަދެއްގެ މީހުން މަރުވެގެން ރިޕޯޓްކުރި ދެ ގައުމެވެ. މިހާރުވެސް އެ ދެގައުމުގައި މީހުން ވަޅުލުމާއި ހަށިތައް އަންދާލުމުގައި އަންނަނީ ދަތިތަކާއި ކުރިމަތިވަމުންނެވެ. މިހާރުވެސް މުޅި ދުނިޔޭގައި މިބަލީގައި މަރުވާ ކޮންމެ ތިން މީހަކުން އެކަކު މަރުވަނީ އިންޑިޔާގައެވެ.

ސިއްހީ މާރިހުން ދެކޭގޮތުގައި ބަލި ޖެހިގެން މަރުވާ ކަމަށް ގައުމުތަކުން ހާމަކުރަމުންދާ ރަސްމީ އަދަދުތަކަށްވުރެ އަސްލު އަދަދު މާގިނަވާނެއެވެ. ޑަބްލިޔުއެޗްއޯއިން ފާއިތުވި މަހު އަންދާޒާކޮށްފައިވާ ގޮތުގައި މަރުވާ މީހުންގެ އަދަދު އަންނާނީ އިތުރުވަމުންނެވެ.

އަނެއްކޮޅުން ފަގީރު ގައުމުތަކަށް ވެކްސިން ލިބުމުގައި ވަނީ އިންތިހާއަށް ދަތިތައް ދިމާވެފައެވެ. އެއީ އެކަށީގެންވާ މިންވަރަށް ވެކްސިން ނެތުމުގެ ސަބަބުންނެވެ. މުއްސަނދި ގައުމުތަކަށް ވަނީ ވެކްސިން އެގައުމުތަކަށް ފޯރުކޮށްދިނުމުގެ ޕްރެޝަރ ބޮޑުވެފައެވެ.

ޖީ7 ގައުމުތަކުން ވަނީ 1 ބިލިއަން ޑޯޒް ފަގީރު ގައުމުތަކަށް ހަދިޔާކުރާނެ ކަމަށް ވައުދުވެފައެވެ. ޑަބްލިޔުއެޗްއޯއިންނާއި އދ ން ގެންދަނީ ވީއެންމެ އަވަހަކަށް ގައުމުތަކުން ވައުދުވެފައިވާ ގޮތަށް ވެކްސިން ފޯރުކޮށްދިނުމަށް އެގައުމުތަކަށް ބާރު އަޅަމުންނެވެ.