އީޔޫއިން އެދުނުގޮތަށް އެސްޓްރަޒެނަކާއިން ބަދަލުދޭން ނުޖެހޭ ކަމަށް ކޯޓުން ނިންމައިފި
18 ޖޫން 2021 | ހުކުރު 18:24އީޔޫއިން ކޯޓަށް މައްސަލަ ހުށަހެޅީ މެއި މަހު
އެސްޓްރަޒެނަކާ ވެކްސިން - 130 ގައުމަކަށް މި ވެކްސިން ފޯރުކޮށްދޭ
އީޔޫއިން އެދުނުގޮތަށް އެސްޓްރަޒެނަކާއިން ބަދަލު ދޭން ނުޖެހޭނެ ކަމަށް ބްރަސަަލްސްގެ ކޯޓުން ނިންމައިފިއެވެ.
އީޔޫއިން އޯޑަރ ކޮށްފައިވާ 120 މިލިއަން ޑޯޒް މިމަހުގެ ނިޔަލަށް ނުލިބިއްޖެނަމަ ބަދަލު ހޯދަން އީޔޫއިން ކޯޓަށް މައްސަލަ ހުށަހެޅީ މެއި މަހުގައެވެ. އެއްމެ ފުރަތަމަ އެއްބަސްވެފައިވަނީ އީޔޫއަށް 300 މިލިއަން ޑޯޒް ފޯރުކޮށްދިނުމަށެވެ.
އީޔޫގެ މި ޑިމާންޑާ އެއްގޮތަށް ބަދަލު ދޭން ނުޖެހޭނެ ކަމަށް ކޯޓުން ނިންމިނަަމަވެސް ވެކްސިން ފޯރުކޮށްދިނުމަށް ކުންފުންޏަށް ސުންގަޑިތަކެއް ދީފައިވެއެވެ. ހުކުރު ދުވަހު ކޯޓުގައި ކުރިއަށްދިޔަ އަޑުއެހުމުގައި، ކުންފުނިން ބުނެފައިވަނީ އެސްޓްރަޒެނަކާ އެއީ އެންމެ ގިނަ ގައުމުތަކުން ބޭނުން ކުރަމުން އަންނަ ވެކްސިން ކަމަށެވެ. ޑިމާންޑާ އެއްވަރަށް ކުންފުނިން ވެކްސިން އުފެއްދުމަށް މަސައްކަތް ކުރަމުން އަންނަ ކަމަށެވެ.
ކޯޓުން އަމުރުކޮށްފައިވަނީ، ޖުލައި 26ގެ ކުރިން 15މިލިއަން ޑޯޒް، އޮގަސްޓް 23ގެ ކުރިން 20 މިލިއަން ޑޯޒް އަދި ސެޕްޓެމްބަރ 27ގެ ކުރިން 15 މިލިއަން ޑޯޒް އީޔޫއަށް ފޮނުވުމަށެވެ. މި އަމުރާ އެއް ގޮތަށް ވެކްސިން ނުފޮނުވައިފިނަމަ ކުންފުނިން ކޮންމެ ޑޯޒަކަށް ދިހަ ޔޫރޯގެ ރޭޓުން އީޔޫއަށް ބަދަލުދޭނެ ޖެހޭނެ ކަމަަށް ކޯޓުން ވަނީ ކުންފުންޏަށް އަމުރުކޮށްފައެވެ.
މިއަމުރާ އެއްގޮތަށް ވެކްސިން ފޮނުވާނެ ކަަމަށް އެއްބަސްވެ ކުންފުނިން ކޯޓުގައި ބުނެފައިވަނީ މިހާރުވެސް އީޔޫއަށް 70 މިލައަނަށްވުރެ ގިނަ ޑޯޒްގެ ވެކްސިން ފޮނުވާފައިވާނެ ކަމަށެވެ. މި އަދަދު މިމަސް ނިމެންވާއިރަށް 80 މިލިއަނާ ގާތް ކުރާނެ ކަމަށެވެ.
އަމުރަށް ތާއީދުކުރި ނަމަވެސް އީޔޫއިން ބުނީ އެސްޓްރަޒެނަކާއިން، އެއްބަސްވުމާ އެއްގޮތަށް އަމަލުކޮށްފައި ނުވާ ކަަމަށެވެ.
