އީޔޫއިން ބަރުމާއާއި ގުޅުން ކަނޑާލަނީ
12 އޮކްޓޯބަރު 2017 | ބުރާސްފަތި 18:16ދަތިކުރުމުގެ ފިޔަވަޅު އެޅުމަށްވެސް އީޔޫއިން ދަނީ ތައްޔާރުވަމުން
ރޮހިންޖާ މުސްލިމުން ބަރުމާގައި އުޅެމުންދަނީ ވަރަށް ހާލުގައި
ރޮހިންޖާ ދަރިކޮޅުގެ މުސްލިމުންނާއިމެދު ބަރުމާއިން އަމަލު ކުރަމުންދާ ލާއިންސާނީ އަދި އަނިޔާވެރި ގޮތްތަކުގެ ސަބަބުން ވިލާތުގެ އިއްތިޙާދުން ބަރުމާއާއިއެކު އޮންނަ ގުޅުން ކަނޑާލުމަށް ތައްޔާރުވަމުން އެބަދެއެވެ.
ބައެއް ރިޕޯރޓްތައް ބުނާ ގޮތުން ބަރުމާގެ އަނިޔާވެރިކަމަށް ނިމުމެއް ނުގެނެސްފިނަމަ އަދި ރޮހިންޖާ މައްސަލައަށް ހައްލެއް ނުގެނެސްފިނަމަ ބަރުމާއާއި އާއި ދެކޮޅަށް ދަތިކުރުމުގެ ފިޔަވަޅުތައް އެޅުމަށްވެސް އީޔޫއިން އޮތީ ތައްޔާރަށެވެ. އީޔޫގެ މެމްބަރު 27 ޤައުމުގެ މަންދޫބުން ވަނީ މިހާރު އެކަމާއި ގުޅޭ އެއްބަސްވުމެއް އެކުލަވާލާފައެވެ. އަދި، ވިލާތުގެ ޤައުމުތަކުގެ ޚާރިޖީ ވަޒީރުން މި އެއްބަސްވުމުގައި އަދި ސޮއެކުރައްވަން ޖެހެއެވެ.
މި އެއްބަސްވުމުގެ ދަށުން ބަރުމާއާއިއެކު އޮންނަ އަސްކަރީ ގުޅުންތައް އަލުން ރިވިއު ކުރުމަށް ހަމަޖެހިފައިވާއިރު، ބަރުމާގެ އަސްކަރިއްޔާގެ އިސްވެރިންނާއި ޔޫރަޕުގެ ޤައުމުތަކުން އެއްކޮށް ގުޅުން ކަނޑާލާނެއެވެ. މިހާރު ވެސް ރައްޔިތުންނާއި ދެކޮޅަށް ބޭނުންކުރެވިދާނެ ޒާތުގެ ހަތިޔާރު ބަރުމާއަށް ވިއްކުން ޔޫރަޕްގެ ޤައުމުތަކަށް ވަނީ މަނާކޮށްފައެވެ. އަދި ރޮހިންޖާ މައްސަލައަށް ހައްލެއް ނުގެނެސްފިނަމަ، މިދާއިރާއިން އިތުރު ފިޔަވަޅުތައް އަޅާފާނެކަމުގެ އިންޒާރު އީޔޫއިން ވަނީ ދީފައެވެ.
ބަރުމާގެ ސަރުިކާރުން ބުނާ ގޮތުގައި ރިޮހިންޖާ ދަރިކޮޅަކީ ބަރުމާގެ ރައްޔިތުންނެއް ނޫނެވެ. އަދި އެމީހުންނަކީ ބަންގްލަދޭޝްގެ މީހުންކަމަށް ބުނެ، އެމީހުން ބަރުމާއަށް ގެނައީ އިނގިރޭސީންކަމަށް ބަރުމާ ސަރުކާރުން ދަނީ ބުނަމުންނެވެ. ބަރުމާ ސަރުކާރުން ރޮހިންޖާ މުސްލިމުންނާއި ދެކޮޅަށް ހިންގަމުންދާ ޖަރީމާތައް އދއިން ސިފަކޮށްފައިވަނީ ނަސްލެއް ނައްތާލުމަށް ބަރުމާއިން ހިންގަމުންދާ ޖަރީމާއެއްގެ ގޮތުގައެވެ.
ރޮހިންޖާ މުސްލިމުންނާއި ދެކޮޅަށް ބަރުމާ ސަރުކާރު ސިފައިން ހިންގަމުންދާ ޖަރީމާތަކުން ސަލާމަތްވުމަށް ގިނަ އަދަދެއްގެ ބަޔަކު މިހާރުވެސްވަނީ ސަރަަަހައްދީ ރޮނގު ހުރަސްކޮށް ބަންގްލަދޭޝްއަށް ގޮސްފައެވެ.
