އިނގިރޭސިިވިލާތް އީޔޫއިން ވަކިވާން ބާކީ އެއް އަހަރު!
އީޔޫ އިން އިނގިރޭސި ވިލާތް ވަކިވާނީ 29 މާޗް 2019 ގައި
ްއިނގިރޭސި ބޮޑުވަޒީރު ތެރީސާ މޭ (ކ) ސްކޮޓްލެންޑްގެ ފެކްޓްރީއަކަށް ޒިޔާރަތްކުރައްވަނީ
އިނގިރޭސިވިލާތުގެ ރައްޔިތުންގެ ނިންމުމާ އެއްގޮތަށް ވިލާތުގެ އިއްތިޙާދުން އެޤައުމު ވަކިވާން ޖެހޭ ތާރީޚަށް ބާކީ އެއް އަހަރު ދުވަހަށް ވެއްޖެއެވެ.
ވިލާތުގެ އިއްތިޙާދުން އިނގިރޭސިވިލާތް ރަސްމީކޮށް ވަކިވާނީ އަންނަ އަހަރުގެ މާޗް މަހުގެ 29 ވަނަ ދުވަހުއެވެ. އަދި އެ އަށް ފަހު ވިލާތުގެ އިއްތިޙާދުގެ މެމްބަރު ޤައުމެއްގެ ހައިސިއްޔަތުން ހަދާފައިވާ އެއްބަސްވުންތައް ނިމުމަކަށް ގެނައުމަށް 21 މަސް ދުވަހުގެ މުއްދަތެއް އެޤައުމަށް ލިބޭނެއެވެ.
މިިދިޔަ އަހަރުގެ ޖޫން މަހުން ފެށިގެން އިނގިރޭސިވިލާތާއި ވިލާތުގެ އިއްތިޙާދާ ދެމެދު ކުރިމަގުގައި އޮންނާނެ ގުޅުމާއި، އަދި އިނގިރޭސިވިލާތް ވިލާތުގެ އިއްތިޙާދުން ވަކިވުމާ ގުޅޭ ގޮތުން ދެފަރާތުގެ މެދުގައި ވަނީ މަޝްވަރާތައް ފެށިފައެވެ. އެހެން ނަމަވެސް ވިޔަފާރީގެ ގުޅުންތަކާ ބެހޭ ގޮތުން ދެފަރާތަށް އަދިވެސް އެއްބަސްވުމަކަށް ނާދެވެއެވެ.
ބެލެވޭ ގޮތުގައި ވިލާތުގެ އިއްތިޙާދުން ވަކިވުމުގެ އެއްބަސްވުން އަންނަ އޮކްޓޯބަރު މަހުގެ ތެރޭގައި ބޮޑުވަޒީރު ތެރީސާ މޭ އިނގިރޭސި ޕާލަމެންޓަށް ހުށަހަޅާނެއެވެ.
ވިލާތުގެ އިއްތިޙާދުން ވަކިވާން އިނގިރޭސި ގިނަ ރައްޔިތުން ނިންމި ނަމަވެސް، އެނިންމުމާ ދެކޮޅަށް ވާހަކަ ދައްކާ އަޑުތައް ވަނީ ގަދަވެފައެވެ. އަދި ވިލާތުގެ އިއްތިޙާދުން ވަކިވުމަށް ފަހު ވެސް އެއިއްތިޙާދުގެ މެމްބަރު ޤައުމުތަކަށް ލިބޭ ޢިނާޔަތްތައް ހޯދުމަށް އިނގިރޭސި ސަރުކާރުން މަސައްކަތްކުރާތީ ގިނަ ފާޑުކިޔުންތަކެއް ވަނީ އަމާޒުވެފައެވެ.
އިނގިރޭސި ކުރީގެ ބޮޑުވަޒީރު ޓޯނީ ބްލެއަރ ބީބީސީއަށް ދެއްވި އިންޓަރވިއުއެއްގައި ވިދާޅުވީ އަދިވެސް ވަގުތު ފާއިތުނުވާ ކަމަށާއި، ނިންމުން ބަދަލުކުރެވިދާނެ ކަމަށެވެ. އެހެން ނަމަވެސް ބޮޑުވަޒީރު ތެރީސާ މޭ ވިދާޅުވީ ނިންމުން ބަދަލުނުކުރައްވާނެ ކަމަށާއި، ވިލާތުގެ އިއްތިޙާދުން ނިކުންނަން ނިންމި ނިންމުމަކީ އިނގިރޭސިވިލާތުގެ ފައިދާއަށް އެޤައުމުގެ ރައްޔިތުން ނިންމި ނިންމުމެއް ކަމަށެވެ. އަދި އެނިންމުމުގެ ސަބަބުން އިނގިރޭސީންގެ ޤާނޫނުތަކާއި، ފައިސާ އާއި ބޯޑަރު އިނގިރޭސީންގެ އަމިއްލަ ބާރުގެ ދަށަށް އަންނަނާނެ ކަމަށް އެކަމަނާ ވިދާޅުވިއެވެ.
ބޮޑުވަޒީރު ތެރީސާ މޭ ގެންދަވަނީ ވިލާތުގެ އިއްތިޙާދުން އިނގިރޭސިވިލާތް ވަކިވުމަށް އަޅަމުންދާ ފިޔަވަޅުތަކާ ބެހޭ މައުލޫމާތު ދެއްވުމަށް އިންގްލެންޑް، ސްކޮޓްލަންޑް، ވޭލްސް އަދި ނޮދަރން އަޔަލެންޑަށް ޒިޔާރަތް ކުރައްވަމުންނެވެ.
