ޔޫރޯ 2020 ގެ ގްރޫޕް ސީގައި ހިމެނޭ ޔޫކްރޭނާއި ނޯތު މެސެޑޯނިއާ ބައްދަލުކުރާއިރު، މި ދެ ޓީމު ވަނީ ކުޅުނު ފުރަތަމަ މެޗުތަކުން ބަލިވެފައެވެ. އެގޮތުން ޔޫކްރޭން ކުޅުނު ފުރަތަމަ މެޗުގައި ނެދަލެންޑްސް އަތުން 3-2 ގެ ނަތީޖާއަކުން ބަލިވިއިރު، އޮސްޓްރިއާ އަތުން ނޯތު މެސެޑޯނިއާ ބަލިވީ 3-1 ގެ ނަތީޖާއަކުންނެވެ. އެހެންކަމުން މުބާރާތުގައި އިތުރަށް ކުރިއަށްދިޔުމަށް މި މެޗުން ތިން ޕޮއިންޓް ހޯދުން ދެ ޓީމަށްވެސް މުހިންމެވެ.

ބުރާސްފަތި ދުވަހުގެ ހަވީރު ޔޫކްރޭނާއި ނޯތު މެސެޑޯނިއާ ބައްދަލުކުރާއިރު، މި މެޗު ކުޅޭނީ ބުކަރަސްޓުގެ ނެޝަނަލް އެރީނާގައެވެ.

ނޯތު މެސެޑޯނިއާ މެޗުގެ ކުރިން ޔޫކްރޭނުގެ ކޯޗު އެންޑްރީ ޝެވްޗެންކޯ ބުނީ ނެދަލެންޑްސް އަތުން ބަލިވެފައިވުމުން މި މެޗުން މޮޅުވާން ޔޫކްރޭނަށް މަޖުބޫރު ކަމަށާއި، އެހެންކަމުން މި މެޗަށް ނުކުންނާނީ އެޓޭކިން ގޭމަކަށް ވިސްނައިގެން ކަމަށެވެ. ޝެވްޗެންކޯ ބުނީ ނޯތު މެސެޑޯނިއާ މި މުބާރާތަށް އައު ނަމަވެސް، އެ ޓީމުން ފުރަތަމަ މެޗުގައި ދެއްކި ކުޅުމަށް ތައުރީފު ހައްގު ކަމަށާއި، އަދި ނޯތު މެސެޑޯނިއާއަކީ އާދައިގެ ޓީމެއްގެ ގޮތުގައި ނެގުމުގެ ފުރުސަތު ޔޫކްރޭނަށް ނެތް ކަމަށެވެ.

މެޗުގެ ކުރިން ވާހަކަ ދައްކަމުން ނޯތު މެސެޑޯނިއާގެ ކޯޗު އީގޯ އަންގްލޮވްސްކީ ބުނީ މި މުބާރާތުގެ ގިނަ މެޗުތަކުގައި ފުރަތަމަ ހާފު ލަނޑެއް ނުޖެހި ގިނަ ޓީމުތަކުން ނިންމާލާފައިވާ ކަމަށާއި، އެއިން ދޭހަވަނީ މެޗުތަކަށް ޓީމުތަކުން ތައްޔާރުވެފައިވާ މިންވަރު ކަމަށެވެ. އަދި އޭނާގެ ޓީމަށް މި ވަގުތު ދިމާވެފައިވާ އެންމެ ބޮޑު މައްސަލައަކީ ލަނޑު ޖެހުމުގެ މައްސަލަ ކަމަށާއި، ޔޫކްރޭން މެޗުގައި ލިބޭ ފުރުސަތުތަކުގެ ބޭނުން ނުހިފިއްޖެނަމަ، ލަނޑު ލިބުން އެކަށީގެންވާ ކަމަށްވެސް ވަނީ ބުނެފައެވެ.

ޔުއެފާ ޔޫރޯގެ ލޯކަލް އެކްސްކްލޫސިވް ބްރޯޑްކާސްޓިން ރައިޓްސް ރާއްޖެޓީވީން ނަގާފައިވުމާއެކު، މި މެޗު ދިވެހި ރައްޔިތުންނާއި ހަމައަށް ރާއްޖެޓީވީން ވަގުތުން ގެނަސްދޭނެއެވެ. އަދި ރާއްޖެ.އެމްވީ ވެބްސައިޓުންވެސް މި މެޗު ސްޓްރީމްކުރާނެއެވެ.

މެޗުގެ ކުރިން 17:00 ގައި މައިލޯ ޔޫރޯ ފޯރި ޝޯ ރާއްޖެޓީވީން ގެނެސްދޭއިރު، މި ޝޯ ހުށަހަޅާނީ ރާއްޖެޓީވީގެ ކުޅިވަރު ނޫސްވެރިޔާ އިސްމާޢީލް ޝާހެވެ. ޝާހާއެކު އެނަލިސްޓެއްގެ ގޮތުގައި ބައިވެރިވާނީ ގްރޫޕް ސީ ގެ އެނަލިސްޓް އިހުސާން އަބްދުލް ޣަނީ (ސާންތި) އެވެ. މީގެ އިތުރުން ޕްރީ-ޝޯގައި ޚާއްސަ މެހުމާނެއްގެ ގޮތުން މުޙައްމަދު ޝާހިދު (ޝާޑު) ބައިވެރިވެވަޑައިގަންނަވާނެއެވެ.

ޔޫކްރޭނާއި ނޯތު މެސެޑޯނިއާ ބައްދަލުކުރާ މެޗު ފަށާނީ ބުރާސްފަތި ދުވަހުގެ ހަވީރު ރާއްޖެ ގަޑިން 18:00 ގައެވެ.