ސެލޫންތަކުން ޚިދުމަތް ދިނުމުގެ ހުއްދައަށް އެދި ހުށަހެޅުމަށް ހުޅުވާލައިފި
ހުއްދަދިނުމުގެ ކަންތައްތައް 48 ގަޑިއިރުތެރޭގައި ކުރިއަށް ގެންދެވޭނެ
ސެލޫނެއްގެ ތެރެ، ޚާއްސަ އުސޫލެއްގެ ދަށުން ސެލޫންތަކުން ޚިދުމަތް ދިނުމުގެ ފުރުސަތު މިހާރު ވަނީ ހުޅުވާލާފައި
ހެލްތު ޕްރޮޓެކްޝަން އޭޖެންސީ (އެޗްޕީއޭ)ގެ ގައިޑްލައިނާ އެއްގޮތްވާ ގޮތުގެ މަތިން ސެލޫންތަކުން ޚިދުމަތް ދިނުމުގެ ހުއްދައަށް އެދި ހުށަހެޅުމުގެ ފުރުސަތު ހުޅުވާލައިފިއެވެ.
ކޮވިޑް-19 ފެތުރުން ކޮންޓްރޯލް ކުރުމަށް މާލެ ސަރަހައްދުގައި އެޅިފައިވާ ފިޔަވަޅުތަކަށް 16 ޖޫން 2021ން ފެށިގެން ލުއިދިނުމުގެ ތެރޭގައި، މާލެ ސަރަހައްދުގައި ޚިދުމަތްދެމުންދާ ބޯކޮށާ ތަންތަނާއި ސެލޫންތަކުން، އެޕޮއިންޓްމަންޓު އުސޫލުން ޚިދުމަތް ދިނުމަށް މިހާރުވަނީ ފުރުސަތު ދީފައެވެ.
އެގޮތުން އެޕޮއިންޓްމަންޓު އުސޫލުން ޚިދުމަތް ދިނުމަށް ބޭނުންވާ ބޯކޮށާތަންތަނާއި ސެލޫންތަކުން އެޗް.ޕީ.އޭގެ ގައިޑްލައިންތަކާ އެއްގޮތްވާގޮތުގެ މަތިން ތަނުގައި ޚިދުމަތްދިނުމުގައި އަމަލުކުރާނެ ގޮތުގެ އުސޫލެއް ތައްޔާރުކޮށްinspection.heoc@health.gov.mvއަށް މެއިލްކުރުމަށް އެޗްޕީއޭއިން މިހާރު ވަނީ އިއުލާނު ކޮށްފައެވެ.
އުސޫލު ތައްޔާރު ކުރާއިރު، ތަނުގައި މަސައްކަތްކުރުމަށް ކަނޑައަޅާފައިވާ ގަޑިތަކާއި، ކޯވިޑް-19އިން ރައްކާތެރިވުމަށް ކަނޑައެޅިފައިވާ ގައިޑްލައިންތަކާ އެއްގޮތްވާގޮތުގެ މަތިން ދުވާލެއްގެ މައްޗަށް ޚިދުމަތް ދެވޭ މީހުންގެ އަދަދާއި، އެޕޮއިންޓްމަންޓު ހެދުމަށް ކަނޑައަޅާގޮތުގެ މައުލޫމާތު ހިމަނަން ޖެހެއެވެ.
މައުލޫމާތާއެކު ޚިދުމަތް ފެށުމަށް އެދި ހުށަހެޅުމުން ހެލްތު އިމަރޖެންސީ އޮޕަރޭޝަން ސެންޓަރުގެ އިންސްޕެކްޝަންތަކާބެހޭ ބައިން، ތަންތަނުން ހުށަހަޅާފައިވާ އުސޫލު ރިވިއުކޮށް ތަން އިންސްޕެކްޓް ކުރާނެއެވެ. މިގޮތުން ޚިދުމަތް ފަށަންވާނީ އިންސްޕެކްޝަންއަށް ފަހު ޚިދުމަތް ފެށުމަށް ހުއްދަ ދިނުމުން ކަމަށް އެޗްޕީއޭއިން ބުނެއެވެ.
ސެލޫންތަކުން ހުށަހަޅާ އުސޫލު ރިވިއުކޮށް އިންސްޕެކްޝަންހަދައި ހުއްދަދިނުމުގެ ކަންތައްތައް 48 ގަޑިއިރުތެރޭގައި ކުރިއަށް ގެންދެވޭނެ ކަމަށް އެޗްޕީއޭއިން ބުނެއެވެ.
