އާބާދީގެ ނިސްބަތުން ކޭސްތައް ފެންނަ މިންވަރު އަދި ދަށެއް ނުވޭ- ޑރ ނަޒްލާ
މާލެ ސަރަހައްދުގައި ޖޫން މަހުގެ 14 ވަނަ ދުވަހުގެ ޕޮޒިޓިވިޓީ ރޭޓް ހުރީ %7ގައި
ފުލުހުން މަގުމަތީގައި ހަރަކާތްތެރި ވަނީ
މާލެ ސަރަހައްދުން ފެންނަމުންދާ ކޮވިޑް ކޭސްތަކުގެ އަދަދު އާބާދީގެ ނިސްބަތުން އަަދިވެސް ދަށަށްނުދާ ކަމަށާއި، ފިޔަވަޅުތަކަށް ލުއިތައް ދިނުމުގައި ބަލަމުންދާ މިންގަނޑުތައް އެކަށީގެންވާ މިންވަރަށް އަދި ދަށަށް ނުދާކަމަށް ހެލްތު އެމަރޖެންސީ އޮޕަރޭޝަން ސެންޓަރ (އެޗްއީއޯސީ)ގެ ތަރުޖަމާން ޑރ ނަޒްލާ ރަފީޤް ވިދާޅުވެއްޖެއެވެ.
ރާއްޖޭގައި ކޮވިޑްގެ ހާލަތު ގޯސްވަމުން ދިޔުމާއެކު، މެއި މަހުގެ 26 ވަނަ ދުވަހުން ފެށިގެން ކާފިއު ގަޑި ހަވީރު 4ން ހެނދުނު 8ށް، އަދި އެނޫން ގަޑިތަކުގައި ބޭރަށް ނިކުންނަނަމަ ހުއްދަ ނަގައިގެން ބޭރަށް ނިކުތުމަށް ނިންމައި ފިޔަވަޅުތައް ވަރުގަދަކުރިއެވެ. މިފިޔަވަޅުތަކަށް ޖޫން މަހުގެ 16 ވަނަ ދުވަހުން ފެށިގެން ކޮންމެސް ވަރެއްގެ ލުއިތަކެއް ދޭނެކަން ވަނީ ހާމަކޮށްފައެވެ.
ނަޒްލާ ވިދާޅުވީ މާލެ ސަރަހައްދުގައި ޖޫން މަހުގެ 14ވަނަ ދުވަހުގެ ޕޮޒިޓިވިޓީ ރޭޓް ހުރީ 7 އިންސައްތައިގައި ކަމަށެވެ. އަދި މާލެ ސަރަހައްދުގައި ކުރިޔަށްގެންދާ އެކްޓިވް ސަރވިއަލަންސަށް ބަލާއިރު، އެކްޓިވް ސަރވިއަލަންސްގެ ދަށުން ޖޫން މަހުގެ 12 ވަނަ ދުވަހު ޕޮޒިޓިވިޓީ ރޭޓް ހުރީ 7.2 އިންސައްތައިގައި ކަމަށް ނަޒްލާ ވިދާޅުވިއެވެ. މީގެއިތުރުން ޖޫން މަހުގެ 2އާ 8އާ ދެމެދު ފްލޫ ކްލިނިކަށް ދެއްކި މީހުންގެ ތެރެއިން ޕޮޒިޓިވިޓީ ރޭޓް ހުރީ 23 އިންސައްތައިގައި ކަމަށް ނަޒްލާ ވިދާޅުވިއެވެ.
މީގެއިތުރުން ޖޫން މަހުގެ 14 ވަނަ ދުވަހު ފެނިފައިވާ ޕޮޒިޓިވް ކޭސްތަކުގެ ތެރެއިން 62 އިންސައްތަ ކޭސްއަކީ އަންލިންކް ކޭސްތައް (އެއްވެސް ކޭހަކާއި ގުޅުމެއްނެތި ޕޮޒިޓިވްވެފައިވާ ކޭސްތައް) ކަމަށް ނަޒްލާ ވިދާޅުވިއެވެ.
އަންލިންކް ކޭސްތައް މަތިވެފައި ހުރި ސަބަބަކަށް މިވަގުތު ކޮންޓެކްޓް ޓްރޭސިންގ ކުރިން ކުރިޔަށް ގެންދިޔަ ގޮތަށް ނުގެންދިޔުން ހިމެނިދާނެ ކަމަށް ނަޒްލާ ވިދާޅުވިއެވެ. އެއީ ކޭސްތައް އެއްކޮށް ޓްރޭސް ނުކުރެވިދާތީއެވެ. ނަމަވެސް ކޮންޓެކްޓް ޓްރޭސިންގ އާއި އެކްޓިވް ސަރވިއަލަންސްގެ މަސައްކަތް މިހާރު އަލުން ފަށާފައިވާތީ މިވަގުތު ފެންނަ އަދަދުތަކަށްވުރެ ރަނގަޅަށް ހާލަތު ދެނެގަނެވޭނެކަމަށް ނަޒްލާ ވިދާޅުވިއެވެ.
ރާއްޖޭގައި މިހާތަނަށް ކޮވިޑްގެ ހާލަތު އެންމެ ގޯސްވެގެން ރިޕޯޓްކޮށްފައިވަނީ މެއި މަހުއެވެ. އެއާއެކު އެމަހުގައި ވަނީ މާލެ ސަރަހައްދުގައާއި މުޅި ރާއްޖޭގައި ފިޔަވަޅުތައް ވަރުގަދަކޮށްފައެވެ.
