ފިލިޕީންސާ އެއްވަރުކޮށް ރާއްޖެ ޕްލޭއޮފަށް

ފީފާ ވޯލްޑް ކަޕާއި އޭއެފްސީ އޭޝިއަން ކަޕުގެ ޖޮއިންޓް ކޮލިފިކޭޝަނުގައި އަންގާރަ ދުވަހުގެރޭ ފިލިޕީންސާ އެއްވަރުކޮށް، އޭޝިއަން ކަޕުގެ ކޮލިފައިން ޕްލޭއޮފް ބުރުގައި ރާއްޖެ ވާދަކުރަން ޖެހިއްޖެއެވެ.

އަންގާރަ ދުވަހުގެރޭ ދުބާއީގައި ކުޅުނު މެޗު އެއްވަރުވީ 1-1 ގެ ނަތީޖާއަކުންނެވެ.

މި މެޗު ފަށައިގެން ރާއްޖެއިން މޮޅު އެޓޭކިން ގޭމެއް ކުޅުނުއިރު، މެޗުގެ ކުރީކޮޅު ރާއްޖެއަށް ވަނީ ލަނޑު ޖަހަން ގިނަ ފުރުސަތުތަކެއް ލިބިފައެވެ. އެގޮތުން މެޗުގެ ދެވަނަ މިނެޓުގައި އަލީ ފާސިރު (ސެންޓޭ) ފޮނުވާލި ހަމަލާ ގޯލުގެ ހުރަސް ދަނޑިމަތިން ބޭރަށް ދިޔައިރު، މެޗުގެ 10 ވަނަ މިނެޓުގައި ހަމްޒާ މުޙައްމަދު (ހަމްޕު) ފޮނުވާލި ހަމަލާގެ ހުރަހަކަށްވީ ފިލިޕީންސްގެ ގޯލްކީޕަރެވެ.

އެކަމަކު މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ ފިލިޕީންސްއިންނެވެ. މެޗުގެ 25 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ އެންހެލް ގިރާލްޑޯއެވެ. އެކަމަކު އޭގެ ހަ މިނެޓު ފަހުން ސެންޓޭ ވަނީ ލަނޑެއް ޖަހައި، ރާއްޖެއަށް ނަތީޖާ އެއްވަރުކޮށްދީފައެވެ.

މި މެޗުން މޮޅުވެގެން އޭޝިއަން ކަޕުގެ ކޮލިފައިން ގްރޫޕް ސްޓޭޖަށް ދިއުމުގެ ފުރުސަތު ރާއްޖެއަށް އޮތް ނަމަވެސް، ރާއްޖެ ދެން ޖެހޭނީ އޭޝިއަން ކަޕުގެ ކޮލިފައިން ގްރޫޕް ސްޓޭޖަށް ވަންނަން ޕްލޭއޮފް ބުރުގައި ކުޅޭށެވެ. ޕްލޭއޮފުގައި ކުޅެން ޖެހޭނީ ރާއްޖެއަށްވުރެ ދަށް ރޭންކުގެ ޓީމަކާއެވެ.

ވޯލްޑް ކަޕާއި އޭއެފްސީ އޭޝިއަން ކަޕުގެ ޖޮއިންޓް ކޮލިފިކޭޝަނުގެ ގްރޫޕް އޭގެ އެއްވަަނައިގައި މި ވަގުތު ސީރިއާ އޮތީ ކުޅުނު ހަތް މެޗުން ވެސް މޮޅުވެގެން 21 ޕޮއިންޓާއެކުއެވެ. އެ ޓީމަށް ވަނީ އޭޝިއަން ކަޕުގެ ގްރޫޕް ސްޓޭޖުން ފުރުސަތު ލިބިފައެވެ. ގްރޫޕުގެ ދެވަނައިގައި އޮތް ޗައިނާއަށް ހަތް މެޗުން ވަނީ 16 ޕޮއިންޓް ލިބިފައެވެ. އަދި ތިންވަނައިގައި އޮތީ އަށް މެޗުން 11 ޕޮއިންޓް ހޯދާފައިވާ ފިލިޕީންސެވެ. އަށް މެޗުން ހަތް ޕޮއިންޓް ހޯދައިގެން ރާއްޖެ ހަތަރުވަނައިގައި އޮތްއިރު، ފުލުގައި އޮތީ އަށް މެޗު ކުޅެގެން ޕޮއިންޓެއް ލިބިފައިނުވާ ގުއާމެވެ.