ޓެސްޓް ކުރަން ފޮނުވި 30 ސާމްޕަލްގެ 47 އިންސައްތަ ހިއްސާކުރަނީ ނުރައްކާތެރި 2 ވޭރިއަންޓް

ރާއްޖޭގައި ކޮވިޑްގެ ވޭރިއަންޓް އުޅެނީ ކިހާ މިންވަރަކަށްތޯ ދެނެގަތުމަށް ބޭރަށް ފޮނުވި 30 ސާމްޕަލްގެ ނަތީޖާ ލިބިފައިވާއިރު ނުރައްކާތެރި ދެ ވޭރިއަންޓްކަމުގައިވާ އިންޑިޔާއިން ފެނިފައިވާ ޑެލްޓާ ވޭރިއަންޓް އަދި އިނގިރޭސިވިލާތުން ފެނިފައިވާ އަލްފާ ވޭރިއަންޓްގެ 47 އިންސައްތަ ކޭސް ހިމެނެއެވެ.

އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި ހެލްތު އެމަރޖެންސީ އޮޕަރޭޝަން ސެންޓަރ (އެޗްއީއޯސީ)ގެ ތަރުޖަމާން ޑރ ނަޒްލާ ރަފީޤް ވިދާޅުވީ ރާއްޖޭގެ ބައެއް ސާމްޕަލްތައް ސީކުއަންސަށް ތިން ފަހަރެއްގެ މަތިން ފޮނުވާފައިވާކަމަށެވެ. އޭގެތެރެއިން ތިން ވަނަ ފަހަރު ފޮނުވި ސާމްޕަލްތަކުގެ ނަތީޖާ މިހާރު ލިބިފައިވާ ކަމަށް ނަޒްލާ ވިދާޅުވިއެވެ. މިއިން ކޮންމެ ފަހަރެއްގައިވެސް ފޮނުވާފައިވަނީ 30 ސާމްޕަލްއެވެ.

ސާމްޕަލްތަކުގެ ނަތީޖާ ދައްކާގޮތުން 20 އިންސައްތަ އަކީ އަލްފާ ވޭރިއަންޓެވެ. މިއީ މިދިޔަ އަހަރުގެ ޑިސެމްބަރ މަހު އިނގިރޭސިވިލާތުން ފެނުނު ވޭރިއަންޓެވެ. އަދި އިންޑިޔާގައި ހަލުވި ކަމާއެކު ފެތުރެމުން އަންނަ ޑެލްޓާ ވޭރިއަންޓްގެ 27 އިންސައްތަ ވަނީ ފެނިފައެވެ.

ނަޒްލާ ވިދާޅުވީ އޭގެއިތުރަށްވެސް އެކިކަހަލަ ވޭރިއަންޓްތައް ފެނިފައިވާކަމަށެވެ. އެހެނިހެން ވޭރިއަންޓްގެ 27 އިންސައްތަ ކޭސް ފެނިފައިވެއެވެ. މީގެއިތުރުން ކޮވިޑް-19ގެ ޖެނޮމިކް ވޭރިއަންޓްތައް ކަމަށް ފާހަގަކޮށްފައިވާ އެކި ކްލޭޑްސްތައްވެސް ރާއްޖެއިން ވަނީ ފެނިފައެވެ. ނަޒްލާ ވިދާޅުވީ އެގޮތުން ފާހަގަކުރެވިފައިވާ ޖީ ކްލޭޑްސްގެ 13 އިންސައްތަ ފެނިފައިވާކަމަށެވެ.

މުޅި ދުނިޔެއަށް ބަލާލާއިރު އެންމެ ހަލުވި މިނެއްގައި ފެތުރެމުން އަންނަ ކްލޭޑްސް އަކީ ޖީއާރެވެ. މި ކްލޭޑްސްގެ ތިނެއް އިންސައްތަ ވަނީ ރާއްޖެއިން ފެނިފައެވެ. މީގެއިތުރުން ޕެރޫ އާއި ޗިލީން ފެނިފައިވާ ސަބްލިނޭޖްގެ 13 އިންސައްތަ ކޭސްވެސް ވަނީ ރާއްޖެއިން ފެނިފައެވެ.

ޑރ ނަޒްލާ ވިދާޅުވީ ރާއްޖޭގައި ދަތުރުފަތުރުތައް ކުރިޔަށް ދިޔުމާއި ދިވެހިން ބޭރަށް ދަތުރުކުރުމާއި އަދި ރާއްޖެއަށް އެހެން މީހުން އައުމާއި މިހުރިހާ ކަމެއްގެ ތެރެއިން ދުނިޔޭގެ އެހެން ތަންތަނެކޭ އެއް ފަދައިން ރާއްޖޭގައިވެސް، އަލަށް ތައާރަފްވާ ވޭރިއަންޓްތައް ފެތުރުމުގެ ފުރުސަތު އޮންނާނެކަމަށެވެ. އަދި ދުނިޔޭގެ ނިސްބަތުން އެންމެ ފާހަގަކޮށްލެވުނު ދެ ވޭރިއަންޓްވެސް ރާއްޖޭގެ ސާމްޕަލްތަކުގެ ތެރެއިން ފެނިފައިވާކަން ނަޒްލާ ފާހަގަކުރެއްވިއެވެ.

ނަޒްލާ ވިދާޅުވީ ކުރިޔަށް އޮތްތަނުގައިވެސް ޑަބްލިޔުއެޗްއޯއާ ގުޅިގެން ސީކުއެންސިންއަށް ރާއްޖޭގެ ސާމްޕަލްތައް ބޭރަށް ފޮނުވުމުގެ މަސައްކަތް ކުރިޔަށްގެންދާނެކަމަށެވެ. އަދި މިހާރު މިފޮނުވޭ 30 ސާމްޕަލްގެ އިތުރަށް ކޮންމެ ބެޗެއްގައިވެސް ފޮނުވޭތޯ މަސައްކަތްކުރަމުންދާ ކަމަށް ޑރ ނަޒްލާ ވިދާޅުވިއެވެ.

ކޮވިޑްގެ ސާމްޕަލްތަކުގެ ސީކުއަންސް ކޮށްގެން ވައިރަސް މިޔުޓޭޓް ވަމުންދާ މިންވަރު ދެނެގަނެވޭނެއެވެ. ވައިރަސްގެ ޖެނޯމް ސީކުއެންސިންގ އަކީ ވައިރަސް ބަދަލުވަމުންދާ ގޮތް ދެނެގަތުމަށްޓަކައި ކުރާކަމެކެވެ. އެކަމުގެ ސަބަބުން ކޮވިޑް-19 ފެތުރެމުންދާ ގޮތް ދެނެގަތުމަށް ފަސޭހަވެ ވައިރަސް ފެތުރުން ކޮންޓްރޯލްކުރުމަށް އަޅަންވީ ފިޔަވަޅުތައް ދެނެގަތުމަށް ފަސޭހަވެގެންދާނެއެވެ. ދުނިޔޭގެ ކުރިއަރާފައިވާ ގައުމުތަކުގައި އަންނަނީ މިދިރާސާ ފުޅާ ދާއިރާއެއްގައި ކުރަމުންނެވެ. އަދި ގައުމުތަކުން ސީކުއަންސް ކުރާ ސާމްޕަލްތައް ފެންނާނެ ގޮތް ވަނީ ހަދާފައެވެ.

ރާއްޖޭގައި ކޮވިޑްގެ ހާލަތު ވަނީ އޭޕްރީލް މަހުގެ ފަހު ކޮޅުން ފެށިގެން ގޯސްވެފައެވެ. އަދި މެއި މަހު ވަނީ މިހާތަނަށް އެންމެ ގިނަ ކޭސް ފެނިގެން ރިޕޯޓްކޮށްފައެވެ. ރާއްޖޭގައި މިހާތަނަށް އެންމެ ގިނަ މީހުންނަށް ވައިރަސް ޖެހި އަދި މަރުވެގެން ރިޕޯޓްކޮށްފައިވަނީ ނިމިގެންދިޔަ މެއި މަހުއެވެ. މެއި މަސް ތެރޭގައި 34،159 މީހަކު ވަނީ ކޮވިޑް-19 އަށް ޕޮޒިޓިވްވެފައެވެ. އަދި 88 މީހަކު ވަނީ މިބަލީގައި ނިޔާވެފައެވެ.