ކޮވިޑް-19 ޖެހިގެން 27 އަހަރުގެ މީހަކު ނިޔާވެއްޖެއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)ން ބުނީ ހޯމަ ދުވަހު އިރުއޮއްސި 6 ޖެހިއިރު ހުޅުމާލެ މެޑިކަލް ފެސިލިޓީގައި އެޑްމިޓްކޮށްގެން ފަރުވާދެމުންދިޔަ ދިވެހި ފިރިހެނަކު ނިޔާވެފައިވާކަމަށެވެ. މިއީ ހޯމަ ދުވަހު މިބަލީގައި ނިޔާވީ ފުރަތަމަ މީހާއެވެ.

އަދި ރާއްޖޭގައި ކޮވިޑް ބަލީގައި ނިޔާވީ 198 ވަނަ މީހާއެވެ.

ކޮވިޑް ޖެހިގެން އާދިއްތަ ދުވަހު ވަނީ 83 އަހަރުގެ މީހަކު ނިޔާވެފައެވެ. ހޮނިހިރު ދުވަހު 4 މީހުން ނިޔާވެފައިވާއިރު އޭގެތެރޭގައި 25 އަހަރުގެ އަންހެނަކުވެސް ހިމެނެއެވެ.

ރާއްޖޭގައި ކޮވިޑް ހަލުވި ކަމާއެކު ފެތުރެމުން އަންނައިރު މި ބަލީގައި ނިޔާވާ މީހުންގެ އަދަދު ވެސް އަންނަނީ އިތުރު ވަމުންނެވެ. އެގޮތުން އެޗްޕީއޭގެ ތަފާސްހިސާބުތައް ދައްކާގޮތުން ކޮވިޑްގައި އެންމެ ގިނަ އަދަދަކަށް މީހުން ނިޔާވީ މެއި މަހުގައެވެ. ރާއްޖޭގައި މިހާތަނަށް މިބަލީގައި އެއް ދުވަހެއްގެ ތެރޭގައި، އެންމެ ގިނަ މީހުން ނިޔާވެފައިވަނީ، މިދިޔަ މެއި މަހުގެ 24 ވަނަ ދުވަހު އެވެ. އެ ދުވަހު އެކަނިވެސް 13 މީހަކު ނިޔާވިއެވެ. ހަމައެކަނި މެއި މަހު ކޮވިޑް ބަލީގައި 88 މީހުން ވަނީ ނިޔާވެފައެވެ.

ރާއްޖޭގައި މިބަލީގައި ނިޔާވާ މީހުންގެ ރޭޓް މަތިވެފައިވާއިރު، ކޭސްތައް ކޮންޓްރޯލް ކުރުމަށް މިހާރު ވަނީ ގިނަ ފިޔަވަޅުތަކެއް އަޅާފައެވެ. ހެލްތް އިމަރޖެންސީ އޮޕަރޭޝަން ސެންޓަރ ބޭއްވި ނޫސްވެރިންގެ ބައްދަލުވުމުގައި ޓެކްނިކަލް އެޑްވައިޒަރީ ގްރޫޕުގައި ހިމެނިވަޑައިގަންނަވާ ޑޮކްޓަރ އަޙުމަދު ޝަހީދު ވިދާޅުވީ މިހާރު ހެދިފައިވާ އެނަލިސިސްތައް ދައްކާގޮތުން އޭޕްރީލް މަހުގެ 28ން ފަށައިގެން ޖޫން މަހުގެ 5އާ ހަމައަށް 111 މީހުން ނިޔާވެފައިވާ ކަމަށެވެ.

ކޮވިޑްގައި ރާއްޖެއިން ނިޔާވި މީހުންގެ ތަފާސްހިސާބުތަކަށް ބަލާއިރު 80 އަހަރުން މަތީގެ 30 މީހުން ނިޔާވެފައިވާ ކަމަށާއި، 65 އަހަރާއި 80 އަހަރާ ދެމެދުގެ 37 މީހުން ނިޔާވެފައިވާ ކަމަށެވެ. އަދި ނިޔާވި 60 އިންސައްތަ މީހުންނަކީ 65 އަހަރުން މަތީގެ މީހުން ކަމަށް ޑޮކްޓަރ ވިދާޅުވިއެވެ. މީގެ އިތުރުން ނިޔާވި 30 އިންސައްތަ މީހުންނަކީ އުމުރުން 40 އަހަރާއި 65 އަހަރާ ދެމެދުގެ މީހުން ކަމަށާއި، 20 އިންސައްތައަކީ 40 އަހަރުން ދަށުގެ މީހުން ކަމަށް ޑޮކްޓަރ ވިދާޅުވިއެވެ.