ކްރިމިނަލް ކޯޓުގެ ގާޒީ ސަމީރު ޑްރަގް ކޯޓަށް

ކްރިމިނަލް ކޯޓުގެ ގާޒީ މުޙައްމަދު ސަމީރު ޑްރަގް ކޯޓަށް ބަދަލުކުރުމަށް ނިންމާފައިވާކަމަށް ޖުޑީޝަލް ސަރވިސް ކޮމިޝަން (ޖޭއެސްސީން) ބުނެފިއެވެ.

އެކަމާ ގުޅޭގޮތުން ޖޭއެސްސީން ބުނީ، ފަނޑިޔާރު ސަމީރު ޑްރަގް ކޯޓަށް ބަދަލު ކުރައްވަން ނިންމެވީ "ފަނޑިޔާރުން އަމިއްލައަށް އެދިގެން މަސައްކަތް ކުރަމުން އައި ކޯޓާ އެއް ދަރަޖައެއްގެ އެހެން ކޯޓަކަށް ބަދަލު ކުރުމުގައި އަމަލު ކުރާނެ ގޮތުގެ ޤަވާއިދު" ގެ ދަށުން ކަމަށެވެ. ފަނޑިޔާރު ސަމީރުގެ އެދިވަޑައިގަތުމުގެ މަތިން ޖޭއެސްސީން އެގޮތަށް ނިންމަވާފައިވަނީ 2021 ޖޫން 6ވަނަ ދުވަހު ބޭއްވި ކޮމިޝަނުގެ 45ވަނަ ބައްދަލުވުމުގައެވެ.

ފަނޑިޔާރު މުޙައްމަދު ސަމީރު ވަނީ މީގެ ކުރިން ފެމިލީ ކޯޓުގައިވެސް މަސައްކަތް ކުރައްވާފައެވެ. އޭގެ ކުރިން ހުންނެވީ ތުލުސްދޫ ކޯޓުގެ މެޖިސްޓްރޭޓް ކަމުގައެވެ.

ކްރިމިނަލް ކޯޓުގައި ފަނޑިޔާރު މުޙައްމަދު ސަމީރު ބައްލަވަމުން ގެންދެވި ބޮޑެތި މައްސަލަތަކުގެ ތެރޭގައި ރ މީދޫ ފެންފިޔާޒުގެ މުޙައްމަދު އަނަސްގެ މަރުގެ މައްސަލަ ހިމެނެއެވެ.