ނެދަލެންޑްސްއިން ފަހު ވަގުތު ޔޫކްރޭން ބަލިކޮށްފި

ޔޫރޯ 2020 ގެ ގްރޫޕް ސީ ގެ ދެވަނަ މެޗުގައި ފަހު ވަގުތު ޔޫކްރޭން އަތުން ނެދަލޭންޑްސް މޮޅުވެއްޖެއެވެ.

އެމްސްޓެޑަމްގެ ޔޯހަން ކްރައިފް އެރީނާގައި ކުޅުނު މެޗުން ނެދަލެންޑްސް މޮޅުވީ 3-2 ގެ ނަތީޖާއަކުންނެވެ.

މި މެޗު ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މެޗުގެ ހަވަނަ މިނެޓުގައި ނެދަލެންޑްސްގެ ކެޕްޓަން ޖިއޮޖީނިއޯ ވައިނަލްޑަމަށް ވަނީ ލަނޑު ޖަހަން ރަނުގެ ފުރުސަތެއް ލިބި ބޭކާރުވެފައެވެ. އަދި އޭގެ ފަހުން މެޗުގެ 29 ވަނަ މިނެޓުގައި ޔޫކްރޭނުގެ އަންދްރޭ ޔާމޮލެންކޯއަށްވެސް ވަނީ ލަނޑު ޖަހަން ހުސް ފުރުސަތެއް ލިބި ބޭކާރުވެފައެވެ.

މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، ދެވަނަ ހާފުގައި ވަނީ ޖުމްލަ ފަސް ލަނޑު ފެނިގެންގޮސްފައެވެ. އެގޮތުން މެޗުގެ 52 ވަނަ މިނެޓުގައި ވައިނަލްޑަމް ނެދަލެންޑްސްއަށް ލީޑު ނަގައިދިންއިރު، އޭގެ ހަ މިނެޓު ފަހުން ވައުޓް ވެހޯސްޓް ވަނީ އެ ގައުމަށް ލީޑު ފުޅާކޮށްދީފައެވެ.

އެއާއެކު ޔޫކްރޭންއިން ވަނީ އެ ޓީމުގެ ކުޅުން ރަނގަޅުކޮށްފައެވެ. އެގޮތުން މެޗުގެ 75 ވަނަ މިނެޓުގައި ޔޫކްރޭނުން ފަރަގު ކުޑަކުރިއިރު، މި ލަނޑު އެ ޓީމަށް ކާމިޔާބުކޮށްދިނީ ކެޕްޓަން އަންދްރޭ ޔާމޮލެންކޯއެވެ. އަދި އޭގެ ހަތަރު މިނެޓު ފަހުން ޔޫކްރޭނަށް ނަތީޖާ އެއްވަރުކޮށްދިނީ ރޯމަން ޔަރެމްޗަކެވެ. ނަމަވެސް މެޗުގެ 85 ވަނަ މިނެޓުގައި ނެދަލެންޑްސްގެ ޑެންޒެލް ޑަމްފްރީސް ވަނީ ލަނޑެއް ޖަހައި، މި މެޗުން ނެދަލެންޑްސް މޮޅު ކޮށްދީފައެވެ.

ގްރޫޕް ސީ ގައި ކުޅުނު ފުރަތަމަ މެޗުން ނެދަލެންޑްސް މޮޅުވިއިރު، މި ގްރޫޕުގެ ކުރީގައި އޮތީ ނެދަލެންޑްސް އަދި އޮސްޓްރިއާއެވެ.