ކޮވިޑުން ރައްކާތެރިވުމަށް ޖަހާ ވެކްސިންގެ ފުރަތަމަ ޑޯޒް ޖެހުމަށްފަހު 6 މަސް ވެގެން ދިޔަ ނަމަވެސް އަލުން ވެކްސިންގެ ފުރަތަމަ ޑޯޒް ފަށަން ޖެހުމަކީ ވަރަށް ނާދިރު ކަމެއް ކަމަށް ޑރ.އަޙުމަދު ފައިޞަލް ވިދާޅުވެއްޖެއެވެ.
އާދިއްތަ ދުވަހުގެ ހަވީރު ހެލްތް އިމަރޖެންސީ އޮޕަރޭޝަންސް ސެންޓަރު (އެޗްއީއޯސީ)ން ބޭއްވި ނޫސްވެރިންގެ ބައްދަލުވުމުގައި ވެކްސިނާ ގުޅޭ ގޮތުން ވާހަކަދައްކަވަމުން ޑރ.ފައިޞަލް ވިދާޅުވީ ކޮވިޑް ވެކްސިންގެ ފުރަތަމަ ޑޯޒްޖެހުމަށްފަހު ހަމަސްވުމުން، ވެކްސިން އަލުން ފަށަން ޖެހުމާމެދު މާ ގިނަ ދިރާސާތަކެއް ކުރެވިފައި ނެތް ކަމަށެވެ. ނަމަވެސް އެހެން ބަލިތަކަށް އުފައްދާފައިވާ ވެކްސިންތަކާ ބެހޭގޮތުން ހެދިފައިވާ ދިރާސާތަކަށް ބަލާއިރު އަލުން ބަލުން ވެކްސިން ޖަހަން ފެށުމަކީ ވަރަށް ނާދިރުކަމެއް ކަމަށް ލަފާ ކުރެއްވޭ ކަމަށެވެ.
މީގަ ދެން އަދި ހަގީގަތުގަ އެހާ ގިނަ ދިރާސާތަކެއް. ތަފާސްހިސާބުތަކެއް ވެސް މާގިނައެއްކޮށް ނެތް. އެއީ ސަބަބަކީ މި ވެކްސިން އަދި ޖަހަންފެށިތާވެސް ހަ މަސް ކިރިޔާ މިވީ. ރާއްޖޭގަ އަދި ވެކްސިން ޖަހަން ފެށިތާ ހަ މަސް ނުވެސްވޭ. ފެބްރުއަރީ އެކެއްގަ ރާއްޖޭގަ ވެކްސިން ޖަހަން ފެށީ. އަދި އެހެން ގައުމުތަކުގަ ވެސް، ގިނަ ގައުމުތަކުގަ މާގިނަ ދިރާސާތަކެއް ނެތް ކުރެވިފައެއް. ދެވަނަ ޑޯޒް ޖަހަން ވާއިރަށް ހަ މަސް ވެއްޖިއްޔާ އަލުން ފަށާނެތޯ ނުވަތަ ނޫންތޯ. އެހެން ނަމަވެސް އެހެން ވެކްސިނުގަ ދިރާސާތަކަށް ބަލާއިރުގަ އަޅުގަނޑުމެންނަށް ދެންނެވޭނީ އަލުން ބަލުން ފަށަން ޖެހުމަކީ ވަރަށް ނާދިރު ކަމެކޭ. ދުނިޔޭގަ އެންމެ ދެ ވެކްސިނެއް ހަގީގަތުގަ އުޅެނީ އަލުން ބަލުން ޖަހަންޖެހޭ ވެކްސިނެއް.ް ޑރ. އަޙުމަދު ފައިޞަލް
ހަ މަސް ވުމަށްފަހު އަލުން ވެކްސިން ފެށުމަކީ ނާދިރު ކަމެއް ކަމަށް ވިދާޅުވި ނަމަވެސް، މިހާރު އަލަށް ފެންނަ ވޭރިއެންޓްތަކުގައި ނުރައްކާތެރި ކަންތައްތައް ތަކެއް ފާހަގަކުރެވިފައި ވާކަމަށް އޭނާ ވިދާޅުވިއެވެ.
ޑރ. ފައިޞަލް ވިދާޅުވީ، ކޮވިޑް ބަލިން ރައްކާތެރިވުމަށް އަޅަންޖެހޭ ހަމައެކަނި ފިޔަވަޅަކީ ވެކްސިން ކަމަށް ދެކިގެން ނުވާނެ ކަމަށެވެ. ރާއްޖެއާއި މުޅި ދުނިޔޭގައި ވެސް ވެކްސިން ޖެހުނު އާބާދީ ނިސްބަތުން މަދު ކަން ފާހަގަ ކުރައްވަމުން ފައިސަލް ވިދާޅުވީ ބަލިން ރައްކާތެރިވުމަށް އިތުރު ފިޔަވަޅުތައް އަޅަން ޖެހޭކަމަށެވެ.
ކޮވިޝީލްޑް ވެކްސިން އެންމެ ފުރަތަމަ ރާއްޖޭގައި ޖަހަން ފެށީ މިދިޔަ ފެބްރުއަރީ މަހުގެ 1ވަނަ ދުވަހުއެވެ. އޭރު ކަނޑައަޅާފައިވާގޮތުން ދެވަނަ ޑޯޒު ޖަހަން ޖެހެނީ ވެކްސިންގެ ފުރަތަމަ ޑޯޒު ޖަހާތާ 4 ހަފުތާ އާއި 8 ހަފުތާއާ ދެމެދުގައެވެ. ރާއްޖޭގައި ކޮވިޝީލްޑްގެ ދެވަނަ ޑޯޒު ޖަހަންފެށީ މާޗުމަހުއެވެ.
ނަމަވެސް ވެކްސިން ހުސްވާން ގާތްވެފައިވާތީ، މެއިމަހުގެ ތެރޭ ދެވަނަ ޑޯޒު ދިނުން ހުއްޓާލައި ވަކި އުސޫލެއްގެ ތެރެއިން ނޫނީ ކޮވިޝީލްޑްގެ ދެވަނަ ޑޯޒު ނުޖަހާ ގޮތަށް ވަނީ ކަނޑައަޅާފައެވެ. ދެވަނަ ޑޯޒް ހުއްޓާލިއިރު ފުރަތަމަ ޑޯޒް ޖަހާފައިވާ ލައްކައެއްކާ މީހުން ތިއްބެވެ.
ވެކްސިން ލިބުން ދަތިވެފައިވާތީ ދުނިޔޭގެ ސިއްހަތު ޖަމިއްޔާއިން ނެރުނު ލަފާގައި ވާގޮތުން ވެކްސިންގެ ފުރަތަމަ ޑޯޒު ޖަހާތާ ހަ މަސް ދުވަހުގެ ތެރޭގައި ދެވަނަ ޑޯޒު ޖެހެއެވެ. އެހެންކަމުން ރާއްޖޭގެ ޓެކްނިކަލް އެޑްވައިޒަރީ ގްރޫޕް (ޓެގް)އިން ވެސް ވަނީ ހަމަސް ތެރޭގައި ކޮވިޝީލް ވެކްސިން ޖެހޭ ގޮތަށް ކަނޑައަޅާފައެވެ.
