ހުޅުމާލޭގައި މެޑިކަލް ފެސިލިޓީއަކަށް ބަދަލުކުރަމުންދާ އިމާރާތް ރައީސުލްޖުމްހޫރިއްޔާ ބައްލަވާލައްވައިފި
13 ޖޫން 2021 | އާދީއްތަ 16:33މި އިމާރާތަކީ މީގެކުރިން ޑިސްޓްރިބިއުޝަން ސެންޓަރެއްގެ ގޮތުގައި ބޭނުންކުރަމުންއައި ތަނެއް
ހުޅުމާލޭގައި ތައްޔާރު ކުރަމުންދާ މެޑިކަލް ފެސިލިޓީ އިމާރާތަށް ރައީސް ޒިޔާރަތް ކުރެއްވުން
ހުޅުމާލޭގައި ކޮވިޑް-19ގެ ބަލިމީހުންނަށް ޚާއްޞަކޮށްގެން ތައްޔާރުކުރަމުންދާ މެޑިކަލް ފެސިލިޓީ ހަދަމުންދާ އިމާރާތަށް، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، ވަޑައިގެން އެތަނުގެ ހާލަތު ބައްލަވާލައްވައިފިއެވެ.
މި އިމާރާތަކީ މީގެކުރިން ޑިސްޓްރިބިއުޝަން ސެންޓަރެއްގެ ގޮތުގައި ބޭނުންކުރަމުންއައި އިމާރާތެކެވެ.
ރައީސްގެ މި ޒިޔާރަތުގައި، ހުޅުމާލެ ޑިވެލޮޕްމަންޓް ކޯޕަރޭޝަންގެ މެނޭޖިންގ ޑިރެކްޓަރ ސުހައިލް އަޙްމަދު އާއި ޑެޕިއުޓީ މެނޭޖިން ޑިރެކްޓަރ އަޙްމަދު ޢާޠިފް ބައިވެރިވެވަޑައިގެން، މި އިމާރާތާއި ގުޅޭ މައުލޫމާތު ރައީސުލްޖުމްހޫރިއްޔާއަށް އަރުވާފައިވެއެވެ.
މީގެ އިތުރުން ޕްލޭނިންގ މިނިސްޓްރީގެ ބައެއް އިސްވެރިންވެސް ވަނީ މި އިމާރާތާ ގުޅޭ ގޮތުން ރައީސްއަށް ބައެއް މައުލޫމާތު އަރުވާފައެވެ.
އަލަށް ހަދާ މި މެޑިކަލް ފެސިލިޓީއަކީ 270 އެނދުގެ މެޑިކަލް ފެސިލިޓީއެކެވެ. ހުޅުމާލޭގައި މިހާރު ހުރި ފެސިލިޓީއަކީ 276 އެނދުގެ ފެސިލިޓީއެކެވެ. އައު ފެސިލިޓީއެއް ގާއިމު ކުރެވުމާއެކު މިހާރު ދިމާވެފައިވާ ޖާގައިގެ ދަތިކަމާއި، ޚިދުމަތުގެ ފެންވަރަށް ވެސް ރަނގަޅު ބަދަލުތަކެއް އަންނާނެ ކަމަށް ބެލެވެއެވެ.
