ގަވާއިދާ ޚިލާފުވެގެން 24 ގަޑިއިރުތެރޭގައި 1000ށް ވުރެ ގިނަ މީހުން ޖޫރިމަނާކޮށްފި
މާސްކު ނާޅައި އުޅުނު 267 މީހަކު ޖޫރިމަނާކޮށްފައިވޭ
ފުލުހުން މަގުމަތީގައި ހަރަކާތްތެރި ވަނީ
ކޮވިޑް-19 ފެތުރުން ކޮންޓްރޯލް ކުރުމަށް އަޅާފައިވާ ފިޔަވަޅުތަކާ ޚިލާފުވި 1،017 މީހަކު، 24 ގަޑިއިރުގެ ތެރޭގައި ޖޫރިމަނާކޮށްފައިވާ ކަމަށް ހެލްތު އެމަޖެންސީ އޮޕަރޭޝަން ސެންޓަރ (އެޗްއީއޯސީ)ން ބުނެފިއެވެ.
އެޗްއީއޯސީގެ ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާނު މުޙައްމަދު މަބްރޫކް ޢަޒީޒް ވިދާޅުވީ، މާސްކު ނާޅައި އުޅުނު 267 މީހަކާއި، ކާފިއު ވަގުތު ބޭރުގައި އުޅުނު 603 މީހަކާއި، ގަވާއިދާ ޚިލާފަށް ވެހިކަލް ދުއްވި 147 މީހަކު، ވޭތުވެދިޔަ 24 ގަޑިއިރުގެ ތެރޭގައި ޖޫރިމަނާކޮށްފައިވާ ކަމަށެވެ.
ކޮވިޑް-19 ފެތުރޭ މިންވަރު އިތުރުވުމާއެކު ސަރުކާރުން ވަނީ ހަރުކަށި ފިޔަވަޅުތަކެއް އަޅާފައެވެ. އެގޮތުން ކާފިއު ވަގުތު ވަނީ ހަވީރު 4:00އިން ފެށިގެން ހެނދުނު 8.00އާ ހަމައަށް އިތުރުކޮށްފައެވެ. އަދި ކާފިއު ނޫން ވަގުތުތަކުގައި ވެސް ޚާއްސަ ހުއްދައަކާއިލައިގެން ނޫނީ ބޭރަށް ނުކުތުމަކީ މަނާކަމެއް ކަމަށް ވަނީ ކަނޑައަޅާފައެވެ.
ފިޔަވަޅުތައް ވަރުގަދަ ކުރުމުގެ ގޮތުން ކެފޭ, ރެސްޓޯރެންޓް ފަދަ އާންމުންނަށް ކާބޯތަކެތީގެ ޚިދުމަތްދޭ ތަންތަނުން, ޓޭކްއަވޭއާއި ޑެލިވަރީގެ ޚިދުމަތް ފިޔަވައި އެހެން ޚިދުމަތްތައް ހުއްޓާލުމަށް އަންގާފައި ވެއެވެ. އެތަންތަނުން ހެނދުނު 6.00އިން ރޭގަނޑު 12:00އަށް ޑެލިވަރީގެ ޚިދުމަތް ދެވޭއިރު, ޓޭކްއަވޭގެ ޚިދުމަތް ދެވެނީ ހެނދުނު 8:00އިން ފެށިގެން ހަވީރު 4:00އަށެވެ. ކާފިއު ވަގުތު ކެފޭ ރެސްޓޯރެންޓްތަކުން ޓޭކްއަވޭ ހަދާކަން އެނގިއްޖެނަމަ އެންމެ މަދުވެގެން 5000 ރުފިޔާއިން ޖޫރިމަނާ ކުރުމަށް ވެސް ވަނީ ނިންމާފައެވެ.
ކޮވިޑް ފެތުރުން މަދުކުރުމަށް ސަރުކާރުން އަޅާފައިވާ ފިޔަވަޅުތަކާ ޚިލާފުވެގެން ޖޫރިމަނާކުރަންޖެހޭ މީހުންގެ އަދަދު ދުވަހެއް އަންނަނީ އިތުރު ވަމުންނެވެ. މިގޮތަށް ގަވާއިދާ ޚިލާފުވުން އިތުރުވާ ނަމަ ހަރުކަށި ފިޔަވަޅުތަކާއެކު އުޅެންޖެހޭ ދުވަސްތައް އިތުރުވެދާނެ ކަމުގެ އިންޒާރު މަބްރޫކް މީގެ ކުރިންވެސް ދެއްވާފައިވެއެެވެ.
