12 އަހަރުން މަތީގެ ކުދިންނަށް ފައިޒާ ވެކްސިން ދިނުމުގެ ހުއްދަ ބްރެޒިލުން ދީފި

ކުޑަކުދިންނަށް ވެކްސިން ޓެސްޓް ކުރަން ފަށާފައިވާ ފައިޒާ/ބައޯއެންޓެކްގެ ކޮވިޑް ވެކްސިން 12 އަހަރުން މަތީގެ ކުދިންނަށް ދިނުމުގެ ހުއްދަ ބްރެޒިލުން ދީފިއެވެ.

ރޮއިޓަރސްގައި ބުނެފައިވަނީ ބްރެޒިލްގެ ސިއްހީ ކަންކަން ބަލަހައްޓާ އިދާރާ އަންވިސާ އިން 12 އަހަރުން މަތީގެ ކުދިންނަށް ފައިޒާ ވެކްސިން ދިނުމުގެ ހުއްދަ ހުކުރު ދުވަހު ދީފައިވާ ކަމަށެވެ.

އަންވިސާއިން ބުނެފައިވަނީ 12 އަހަރުން މަތީގެ ކުދިންނަށް ވެކްސިން ދިނުމުގެ ހުއްދަ ދީފައިވަނީ ބްރެޒިލް ނޫން އެހެން ގައުމުތަކުގައި ކުރިއަށްގެންދާ ޓެސްޓް މަރުހަލާތައް ބެލުމަށްފަހުގައި ކަމަށެވެ. އެގޮތުން މި ނަތީޖާތައް ކާމިޔާބުކަމަށް ދައްކާ ކަމަށާއި، އިތުބާރު ބޮޑުކަމަށް އެ އިދާރާއިން ވަނީ ބުނެފައެވެ.

12 އަހަރުން މަތީގެ ކުދިންނަށް ފައިޒާ ވެކްސިން ދިނުމުގެ ހުއްދަ ދީފައިވާ އިރު، އަންވިސާއިން ވަނީ މީގެ ކުރިން 16 އަހަރުން މަތީގެ ކުދިންނަށް ވެސް ފައިޒާ ވެކްސިން ދިނުމުގެ ހުއްދަ ދީފައެވެ.