އަސްކަރީ ބަޣާވާތެއް ރޭވުމުގެ ކުށް ސާބިތުވެ ބްރެޒިލްގެ ކުރީގެ ރައީސް ބޮލްސޮނާރޯ ޖަލަށް ލާން ހުކުމް ކޮށްފި

ބްރެޒިލްގެ ކުރީގެ ރައީސް ޖައިރު ބޮލްސޮނާރޯގެ މައްޗަށް އަސްކަރީ ބަޣާވާތެއް ރޭވުމުގެ ކުށް ސާބިތުވުމާ ގުޅިގެން 27 އަހަރާއި 3 މަސްދުވަހުގެ ޖަލު ޙުކުމެއް އިއްވައިފިއެވެ.

ބްރެޒިލްގެ ސުޕްރީމް ކޯޓުގެ 5 ފަނޑިޔާރުންގެ ޕެނަލަކުން މި ޙުކުމް އިއްވާފައި ވަނީ ކުރީގެ ވެރިޔާގެ މައްޗަށް ކުށް ސާބިތުވިތާ ގަޑިއިރުތަކެއްގެ ތެރޭގައެވެ.

2022 ވަނަ އަހަރުގެ އިންތިޚާބުގައި އޭނާގެ ވާދަވެރިޔާ ލުއިސް އިނާޝިއޯ ލޫލާ ޑަ ސިލްވާ އަށް ކާމިޔާބު ލިބުމާއެކު ވެސް، ވެރިކަމުގައި ދެމި ހުރުމަށް ރޭވި ރޭވުމެއްގެ އިސްމީހެއްގެ ގޮތުގައި އޭނާ ހުރި ކަމަށް ފަނޑިޔާރުން ނިންމިއެވެ.

4 ފަނޑިޔާރުން އޭނާގެ މައްޗަށް ކުށް ސާބިތު ކުރި އިރު، އެއް ފަނޑިޔާރު ވަނީ އޭނާ ކުށުން ބަރީއަ ކުރުމަށް ތާއީދު ކޮށްފައެވެ. ބޮލްސޮނާރޯގެ ވަކީލުން މިއީ "ހައްދުފަހަނައަޅާފައިވާ" ޙުކުމެއްގެ ގޮތުގައި ސިފަކޮށް، "އިސްތިއުނާފު" ކުރާނެ ކަމަށް ބުނެފައެވެ.

ސުޕްރީމް ކޯޓުގެ ޕެނަލުން އޭނާއަށް 2033 އަށް ދާންދެން އާންމު އިންތިޚާބުތަކަށް ކުރިމަތިލުން ވެސް މަނާ ކޮށްފައި ވެއެވެ.

ފިލާފާނެ ކަމުގެ ފުރުސަތު އޮތް ކަމަށް ބުނެ ގޭ ބަންދުގައި ބެހެއްޓި ބޮލްސޮނާރޯ، ޝަރީޢަތުގެ މި ފަހު މަރުޙަލާގައި ބައިވެރިވެފައެއް ނުވެއެވެ.

ނަމަވެސް އޭނާ ކުރިން ބުނެފައި ވަނީ މިއީ 2026 ގެ ރިޔާސީ އިންތިޚާބުގައި ވާދަކުރުން ހުއްޓުވުމަށް ރޭވިފައިވާ ކަމެއް ކަމަށެވެ.

ބްރެޒިލްގެ ކުރީގެ ރައީސްގެ މައްޗަށް ކުރެވުނު ޝަރީއަތަށް އެމެރިކާގެ ރައީސް ޑޮނަލްޑް ޓްރަމްޕް ވެސް ވަނީ ވަރަށް ބޮޑަށް ފާޑުވިދާޅުވެފައެވެ. އަދި ބޮލްސޮނާރޯގެ މައްޗަށް އުފުލި ދަޢުވާތަކަށް ބަދަލުހިފުމުގެ ގޮތުން ބްރެޒިލްގެ މުދަލަށް 50% ޓެރިފް ނަގާނެ ކަމަށް ޓްރަމްޕް ވަނީ އިއުލާނު ކުރައްވާފައެވެ.

ކުށް ސާބިތުވުމާ ގުޅިގެން ޓްރަމްޕް ވިދާޅުވެފައި ވަނީ އެއީ "ވަރަށް ހައިރާންވާ" ކަމެއް ކަމަށާއި، އެއީ ޓްރަމްޕް އާ ދޭތެރޭ ވެސް ކުރަން އުޅުނު ކަހަލަ ކަމެއް ކަމަށާއި އެކަމަކު އެމީހުންނަކަށް އެކަމެއް އޭނާ އާ ދެކޮޅަށް ނުކުރެވުނު ކަމަށެވެ.

އެމެރިކާގެ ޚާރިޖީ ވަޒީރު މާކޯ ރޫބިއޯ ވިދާޅުވެފައި ވަނީ ބްރެޒިލްގެ ސުޕްރީމް ކޯޓުން "ކުރީގެ ރައީސް ޖައިރު ބޮލްސޮނާރޯ ޖަލަށްލުމަށް އަނިޔާވެރި ނިންމުމެއް ނިންމާފައިވާ" ކަމަށާއި، މި ކަމަށް "އެކަށީގެންވާ ގޮތަށް ރައްދު ދޭނެ" ކަމަށެވެ.

ބްރެޒިލްގެ ފޮރިން މިނިސްޓްރީން ރޫބިއޯގެ މި ވާހަކަތަކަށް ޖަވާބުދީ، އެކްސްގައި ކުރި ޕޯސްޓުގައި "ޙަޤީޤަތްތަކާއި ރެކޯޑުގައި ހުރި ހެކިތަކަަށް ބެލުމެއް ނެތި ބްރެޒިލްގެ ޑިމޮކްރަސީ އަށް ބިރެއް ނުދެއްކޭނެ" ކަމަށެވެ.

70 އަހަރުގެ ބޮލްސޮނާރޯ ގެ މައްޗަށް އައި މި ހުކުމާ އެކު މިހާރު ބެލެވެނީ އޭނާގެ އުމުރުގެ ބާކީ ބައި ދެން ހޭދަކުރަން ޖެހޭނީ ޖަލުގައި ކަމަށެވެ.

ޖަލަށްލުމުގެ ބަދަލުގައި ގޭ ބަންދުގައި ބެހެއްޓުމަށާއި، ހުކުމް ލުއި ކުރުމަށް އޭނާގެ ވަކީލުން އެދޭނެ ކަމަށް ބެލެވެއެވެ.

އަދި އޭނާގެ މައްޗަށް ކުށް ސާބިތުވި ކަމަށް ނިންމުން އިސްތިއުނާފު ކުރާނެ ކަމަށް ވެސް ވަކީލުން ބުނެފައިވެއެވެ. ނަމަވެސް ޤާނޫނީ މާހިރުން ބުނެފައި ވަނީ މިކަން އުނދަގޫވެދާނެ ކަމަށެވެ. އެއީ އާންމު ގޮތެއްގައި އިސްތިއުނާފު ކުރެވޭނީ 5 ފަނޑިޔާރުންގެ ތެރެއިން 2 ފަނޑިޔާރުން ކުށުން ބަރީއަ ކުރުމަށް ވޯޓު ދީފައިވާނަމަ ކަމަށްވާތީއެވެ.

2022 ގެ އިންތިޚާބުގައި ބަލިވުމަށްފަހު ވެރިކަމުގައި ދެމިހުރުމަށް މަސައްކަތް ކުރުމާ ގުޅޭ 5 ދަޢުވާއެއް ބޮލްސޮނާރޯގެ މައްޗަށް ސާބިތުވެފައިވެއެވެ.

ޕްރޮސިކިއުޓަރުން ބުނެފައި ވަނީ އޭނާ މާ ކުރިން އެކަން ރާވަން ފަށާފައިވާ ކަމަށެވެ. އެގޮތުން މިލިޓަރީ ކޮމާންޑަރުންނަށް ބަޣާވާތެއްގެ ހުށަހެޅުން ހުށަހަޅައި، އިންތިޚާބީ ނިޒާމާ މެދު އަސާސެއްނެތް ޝައްކުތައް އުފެއްދި ކަމަށެވެ.

އަދި ލޫލާ އާއި އޭނާގެ ރަނިންގ މޭޓް، އަދި ސުޕްރީމް ކޯޓުގެ ފަނޑިޔާރެއް މަރާލުމުގެ ރޭވުމެއް އޮތްކަން ބޮލްސޮނާރޯ އަށް އެނގިފައިވާ ކަމަށް ވެސް އެމީހުން ބުނެފައިވެއެވެ.

ފަނޑިޔާރުން ނިންމާފައި ވަނީ ރޭވުމުގެ އިސްމީހެއްގެ ގޮތުގައި އޭނާ ހުރި ކަމަށާއި، އޭނާއާ އެކު މިކަމުގައި ބައިވެރިވި އަނެއް 7 އެކުވެރިން ވެސް ކުށްވެރިވާ ކަމަށެވެ. އޭގެ ތެރޭގައި ހިމެނެނީ ކުރީގެ 2 ދިފާޢީ ވަޒީރުންނާއި، ކުރީގެ ޖާސޫސީ އިސްވެރިއަކާއި އަދި ކުރީގެ ސަލާމަތީ ވަޒީރެކެވެ.