ހޭނެތިގެން އެރިކްސަން ވެއްޓުމާއެކު މެޗު ސަސްޕެންޑްކޮށްފި

ޑެންމާކްގެ މިޑްފީލްޑަރު ކްރިސްޓެން އެރިކްސަން ހޭނެތިގެން ދަނޑު މައްޗަށް ވެއްޓުމާއެކު ޑެންމާކާއި ފިންލެންޑް ބައްދަލުކުރި މެޗު ސަސްޕެންޑްކޮށްފިއެވެ.

ހޮނިހިރު ދުވަހުގެރޭ ކޯޕަންހޭގަންގެ ޕާކެން ސްޓޭޑިއަމުގައި މެޗު ކުޅެމުން ދަނިކޮށް އެރިކްސަން ހޭނެތިގެން ދަނޑު މައްޗަށް ވެއްޓުނީ މެޗުގެ 43 ވަނަ މިނެޓުގައެވެ. އެއާއެކު ދަނޑު މަތީގައި ގިނަ އިރުތަކެއް ވަންދެން އޭނާއަށް ސީޕީއާރް ދިންއިރު، އެއަށްފަހު އެރިކްސަން ވަނީ ހޮސްޕިޓަލަށް ގެންގޮސްފައެވެ.

މި ކަމާ ގުޅިގެން މެޗު ސަސްޕެންޑް ކުރަން ނިންމިކަން ޔުއެފާއިން ވަނީ ހާމަކޮށްފައެވެ. މެޗުގެ ކުޅުން ސަސްޕެންޑް ކުރިއިރު ނަތީޖާއަކީ 0-0 އެވެ.

ޔުއެފާއިން ދާދި ދެންމެ ނެރުނު ބަޔާނެއްގައި ވަނީ އެރިކްސަން ހޭއަރާފައިވާ ކަމަށް ބުނެފައެވެ. އަދި އޭނާއަށް ހޮސްޕިޓަލުގައި ފަރުވާ ދެމުން އަންނަ ކަމަށްވެސް ވަނީ ބުނެފައެވެ.