ކުރީގެ ރައީސް މައުމޫން އަބްދުލްގައްޔޫމްގެ އަނބިކަނބަލުން ނަސްރީނާ އިބްރާހީމް ކޮވިޑް-19ށް ޕޮޒިޓިވްވެއްޖެއެވެ.

މިކަމާއި ގުޅޭގޮތުން "ރާއްޖެއެމްވީ"އަށް މައުލޫމާތު ދެއްވަމުން މޯލްޑިވްސް ރިފޯމް މޫވްމެންޓް(އެމްއާރުއެމް)ގެ ސެކްރެޓަރީ ޖެނެރަލް އަބްދުލްއަލީމް ވިދާޅުވީ ނަސްރީނާ ކޮވިޑަށް ޕޮޒިޓިވްވެފައިވަނީ ހުކުރު ދުވަހު ގައި ކަމަށެވެ. އަދި ހާލުކޮޅު ރަނގަޅުކަމަށާއި ހުންނެވީ ގޭގައި ކަމަށް އަލީމް ވިދާޅުވިއެވެ.

ނަސްރީނާ ކޮވިޑަށް ޕޮޒިޓިވްވިއިރު މިދިޔަ އަހަރުގެ އޮގަސްޓްމަހު ރައީސް މައުމޫން ކޮވިޑަށް ޕޮޒިޓިވްވެގެން ދަރުމަވަންތަ ހޮސްޕިޓަލްގެ 11 ވަނަ ފަންގިފިލާއިން ވަނީ ފަރުވާ ހޯއްދަވާފައެވެ.

ރައީސް މައުމޫން ގެންދަވަނީ ކޮވިޑަށް މީހުން ހޭލުންތެރިކުރުވުމުގެ ގޮތުންނާއި ވެކްސިން ޖެހުމަށް ބާރުއަޅުއްވާ ޓްވީޓްތައް ކުރައްވަމުންނެވެ. އަދި ފިޔަވަޅުތަކަށް މާބޮޑު ދޫދޭ ދަނޑިވަޅުތަކުގައި ފިޔަވަޅުތައް ވަރުގަދަ ކުރުމަށް ގޮވާލައްވައެވެ.

ރާއްޖޭގައި ކޮވިޑްގެ ހާލަތު މެއި މަހުގެ ފުރަތަމަ ހަފްތާއިން ފެށިގެން ވަނީ ވަރަށް ބޮޑަށް ގޯސްވެފައެވެ. އެގޮތުން މެއި މަހުގެ 9 ވަނަ ދުވަހުން ފެށިގެން މެއި މަސް ނިމެންދެން ކަހަލަ ގޮތަކަށް ދުވާލެއްގެ މައްޗަށް ހާހުންމަތިން ދިޔައީ ކޮވިޑް ކޭސްތައް ރިޕޯޓްކުރަމުންނެވެ. ނަމަވެސް ވައިރަސް ފެތުރުން ކޮންޓްރޯލްކުރުމަށް އެޅި ވަރުގަދަ ފިޔަވަޅުތަކާއެކު މިހާރު ވަނީ ނަންބަރުތައް ދަށަށްދާން ފަށާފައެވެ. އެގޮތުން ޖޫން މަސް ފެށިގެން މިހާތަނަށް އައިއިރު ޖޫން މަހުގެ ފުރަތަމަ ދެދުވަހު ހަތްސަތޭކައިން ރިޕޯޓްކުރުމަށްފަހު އޭގެފަހުން ހުރިހާ ދުވަހަކުވެސް ކޭސްތައް ރިޕޯޓްކުރަމުން އަންނަނީ ހަތްސަތޭކައިން ދަށުންނެވެ.