މި ފަސް އަހަރުގެ ތެރޭގައި އޮންނަން ޖެހޭނީ ރިޔާސީ ނިޒާމު: ބިގޭ
ރައްޔިތުން ބޭނުންވާ ތަސައްވުރު ތަންފީޒު ކުރެވިގެންދާނީ ރިޔާސީ ނިޒާމުގެ ތެރެއިން
އަލިފުށީ ދާއިރާގެ މެމްބަރު މުހައްމަދު ރަޝީދު ހުސައިން،
މި ފަސް އަހަރުގެ ތެރޭގައި އޮންނަން ޖެހޭނީ ރިޔާސީ ނިޒާމު ކަމަށާއި، މި ނިޒާމުގެ ތެރެއިން ސަރުކާރު ހިންގުމަށް ފުރިހަމަ އެއްބާރުލުން ދޭނެ ކަމަށް ރައްޔިތުންގެ މަޖިލީހުގެ އަލިފުށީ ދާއިރާގެ މެމްބަރު މުހައްމަދު ރަޝީދު ހުސައިން (ބިގޭ) ވިދާޅުވެއްޖެއެވެ.
ރާއްޖެޓީވީގެ "ފަށާއިރު" ޕްރޮގްރާމްގައި ވާހަކަދައްކަވަމުން ބިގޭ ވިދާޅުވީ ފަސް އަހަރުގެ ވެރިކަމަށް ރިޔާސީ ނިޒާމުގެ ތެރެއިން ރައްޔިތުން ރައީސުލްޖުމްހޫރިއްޔާ ކަމަށް ބޭފުޅަކު އިންތިޚާބު ކޮށްފައިވާ ކަމަށެވެ. ބިގޭ ވިދާޅުވީ މި ފަސް އަހަރު ދުވަހުގެ ތެރޭގައި ރައްޔިތުން ބޭނުންވާ ތަސައްވުރު ތަންފީޒު ކުރެވިގެންދާނީ ރިޔާސީ ނިޒާމުގެ ތެރެއިން ކަމަށެވެ.
ބިގޭ ވިދާޅުވީ މި ފަސް އަހަރު ކުރިއަށްދާން ޖެހޭނީ ރިޔާސީ ނިޒާމުގެ ތެރެއިން ކަމަށާއި، ސަރުކާރަށް އެއްބާރުލުން ދޭން ޖެހޭ ކަމަށެވެ. އެގޮތުން ރައްޔިތުންގެ މަޖިލީހުންނާއި، އެމްޑީޕީގެ ތެރެއިން ދެވެން ހުރި ހުރިހާ އެއްބާރުލުމެއް ދޭނެކަމުގެ ޔަގީންކަން ބިގޭ ދެއްވިއެވެ. އަދި ވިދާޅުވީ ރިޔާސީ އިންތިޚާބުގެ ތެރޭގައި އެމްޑީޕީގެ ފަރާތުން ވެސް ރައްޔިތުންނަށް ވައުދުތަކެއް ވެފައިވާއިރު، މިކަންކަން ތަންފީޒު ކުރެވިގެންދާނީ އެއްބާރުލުންދީގެން ކަމަށެވެ.
މީގެ އިތުރުން ބިގޭ ވިދާޅުވީ މިވަގުތު ތާއީދުކުރަނީ ރިޔާސީ ނިޒާމަށް ކަމަށާއި، ބަރުލަމާނީ ނިޒާމަކަށް ދާކަމަށްވާ ނަމަ ވަރަށް ގިނަ ގޮތްތަކަށް ވިސްނާނެ ކަމަށެވެ. އެގޮތުން ބަރުލަމާނީ ނިޒާމުގައި ލިބޭ ފައިދާއާއި ރިޔާސީ ނިޒާމުގައި ލިބޭ ފައިދާ ބަލާނެ ކަމަށް އޭނާ ވިދާޅުވިއެވެ. ބިގޭ ވިދާޅުވީ ރާއްޖެއަށް ކަމުދަނީ ކޮން ނިޒާމެއްތޯ ކަނޑައެޅުމުގައި ވަގުތާއި ހާލަތަށް ބަލަން ޖެހޭ ކަމަށާއި، މިހާރުގެ ހާލަތުގައި ބޮޑަށް ފައިދާކުރާނީ ރިޔާސީ ނިޒާމުގައި ކަމަށެވެ.
ބިގޭ ވިދާޅުވީ ބަރުލަމާނީ ނިޒާމުގައި މިނިސްޓަރުންނަށް ތިއްބަވާނީ ރައްޔިތުން މަޖިލިސް މެމްބަރުން ކަމަށެވެ. ނަމަވެސް މަޖިލިސް މިއީ މިހާރު މިނިސްޓަރުން ޖަވާބުދާރީ ކުރަން އޮންނަ ފަރާތްކަމަށެވެ. އަދި ވިދާޅުވީ މާޒީގައި ކަންކަން ހިނގާފައިވާ ގޮތަށް ބަލާއިރު، ތަޖުރިބާއަށް ބެލުމަށްފަހު ކަންކަން ނިންމަން ޖެހޭ ކަމަށެވެ.
