މާލެސިޓީގެ މޭޔަރަކަށް ހުންނަވައިގެން ވެސް އެމަނިކުފާނު ހިންގެވި ކޮރަޕްޝަންގެ އަމަލުތައް ހާމަކުރަންޖެހޭ
19 ވަނަ ރައްޔިތުންގެ މަޖިލީހުގެ މާފަންނު ހުޅަނގު ދާއިރާގެ މެންބަރު މުހައްމަދު ފަލާހު
ރައީސުލްޖުމްހޫރިއްޔާ ޑރ.މުހައްމަދު މުއިއްޒު ޕީއެންސީގެ މެންބަރުންނަށް ބައިލައްކަ ރުފިޔާ ނަގުދު ފައިސާ ދިން ކަމަށް ބުނާ މައްސަލަ އެންޓި ކޮރަޕްޝަން ކޮމިޝަނުން ތަހުގީގު ކުރުމަށް ގޮވާލައިފިއެވެ.
''ކުރީ ސަރުކާރު ކުރީ ސަރުކާރުގެ'' ނަމުގައި ބުރާސްފަތި ދުވަހުގެ ރޭ ބޭއްވި ޖަލްސާގައި 19 ރައްޔިތުންގެ މަޖިލީހުގެ މާފަންނު ހުޅަނގު ދާއިރާގެ މެންބަރު މުހައްމަދު ފަލާހު ވިދާޅުވީ ރައީސް މުއިއްޒަކީ ކޮރަޕްޝަންގެ އައްޕަ ކަމަށާއި، މާލެސިޓީގެ މޭޔަރަކަށް ހުންނަވައިގެން ވެސް އެމަނިކުފާނު ހިންގެވި ކޮރަޕްޝަންގެ އަމަލުތައް ހާމަކުރަންޖެހޭ ކަމަށެވެ. ކޮރަޕްޝަންގެ ގިނަ އަމަލުތަކެއް ހިންގަވާފައިވާ ކަމަށް ފަލާހު ތުހުމަތު ކުރެއްވިއެވެ.
ފަލާހު ވިދާޅުވީ މުޅި މާލޭގެ ޕާކިންއާ ގުޅޭގޮތުން ވެސް ކޮރަޕްޝަން ހިންގާފައިވާ ކަމަށާއި، އެކަމާ ގުޅިގެން ވެސް 700ށް ވުރެ ގިނަ މައްސަލަ ހުށަހަޅާފައިވާ ކަމަށެވެ. އަދި އިތުރު ކަންކަން މިހާރުގެ މޭޔަރު އާދަމް އާޒިމް ހާމަކޮށްދިނުމަށް ފަލާހު ގޮވާލެއްވިއެވެ.
ޕީއެންސީގެ މެންބަރުންނަށް ރައީސް މުއިއްޒު ފައިސާދިން ކަމަށް ބުނާ މައްސަލައަށް އިޝާރާތް ކުރައްވައި ފަލާހު ވިދާޅުވީ އެ މައްސަލަ އޭސީސީން އަދި އެޓާނީ ޖެނަރަލް ބަލަންޖެހޭ ކަމަށެވެ. ނޫހަކުން އެމައްސަލަ ރިޕޯޓުކޮށްފައިވާއިރު، އެއީ ތަހުގީގު ކުރަންޖެހޭ މައްސަލައެއް ކަމަށް އޭނާ ވިދާޅުވިއެވެ.
ޕީއެންސީގެ މެންބަރުންނަށް ރައީސް މުއިއްޒު 50،000 ރުފިޔާދޭ ވާހަކަ ސަރުކާރުން ދޮގުކުރެއެވެ. ނަމަވެސް އަދަދު ނޫހަށް ޕީއެންސީގެ މެންބަރުން ވަނީ ފައިސާދޭކަން ކަށަވަރުކޮށްދީފައެވެ.
މިމައްސަލަ އޭސީސީގެ ސަމާލުކަމަށް އައިސްފައިވޭތޯ ނުވަތަ ތަހުގީގުކުރޭތޯ އޭސީސީއަށް ގުޅި ނަމަވެސް މިހާތަނަށް ވަކި ޖަވާބެއް ދީފައެއްނުވެއެވެ.
