ކޮވިޑް-19 އަކީ ވުހާންގެ ލެބަކުން ލީކުވެފައިވާ ވައިރަސްއަކަށްވުމުގެ ފުރުސަތު ބޮޑު: އެމެރިކާގެ ލެބް ރިޕޯޓް

ކޮވިޑް-19 ގެ އަސްލު ދެނެގަތުމަށް އެމެރިކާގެ ނޭޝަނަލް ލެބޯޓްރީން ކުރިޔަށް ގެންދިޔަ ތަހުގީގުތަކުން، އެވައިރަސްއަކީ ވުހާންގެ ލެބޯޓްރީއަކުން ލީކުވެފައިވާ ވައިރަސް އެއްކަމަށް ގަބޫލުކުރުމުގެ ފުރުސަތު ބޮޑުކަމަށާއި އެކަން އިތުރަށް ތަހުގީގުކުރަންޖެހޭކަމަށް ބުނެފިއެވެ.

އެމެރިކާގެ ނޭޝަނަލް ލެބޯޓްރީން ކުރިޔަށްގެންދިޔަ ތަހުގީގުތަކުން އެގޮތަށް ކަނޑައެޅުމަށްފަހު ތަހުގީގު ނިންމާލައި، އެ ރިޕޯޓް މިހާރު ވަނީ ވޯލް ސްޓްރީޓްރ ޖަރނަލްގައި ޝާއިއުކޮށްފައެވެ. މިދިރާސާތައް ކުރިޔަށް ގެންދިޔުމުގެ ތައްޔާރީތައް ފަށާފައިވަނީ 2020 ވަނަ އަހަރުގެ މެއި މަހުއެވެ. ކެލިފޯރނިއާގެ ލޯވްރެންސް ލިވަރމޯރ ނޭޝަނަލް ލެބޯޓްރީގައި ކުރިޔަށްގެންދިޔަ މިތަހުގީގުތައް، ކޮވިޑްގެ އަސްލު ދެނެގަތުމުގެ އިންކުއަރީ ސްޓޭޓް ޑިޕާޓްމަންޓުގެ ފަރާތުން ކުރިޔަށް ގެންގޮސްފައިވަނީ ޑޮނަލްޑް ޓްރަމްޕްގެ ވެރިކަމުގެ ފަހު ދުވަސްތަކުގައެވެ.

ވޯލް ސްޓްރީޓް ޖަރނަލްގައި ޝާއިއުކޮށްފައިވާ ރިޕޯޓްގައި ބުނެފައިވާ ގޮތުގައި ލެބޯޓްރީން ބަލާފައިވަނީ ކޮވިޑް-19 ގެ ޖެނޮމިކް އެވެ. އެލެބޯޓްރީން ވަނީ މިކަމާމެދު އެއްޗެއް ބުނުމަށް ދެކޮޅު ހަދާފައިކަމަށް ވޯލް ސްޓްރީޓް ޖަރނަލް އިން ރިޕޯޓްކޮށްފައިވެއެވެ.

އެމެރިކާގެ ރައީސް ޖޯ ބައިޑަން ވަނީ މިދިޔަ މަހު ވައިރަސްގެ އަސްލު ދެނެގަތުމަށް ކަމާބެހޭ ފަރާތްތަކަށް އަންގަވާފައެވެ.

އެމެރިކާގެ އިންޓަލިޖެންސް އެޖެންސީތަކުން ވައިރަސްގެ އަސްލާމެދު ދެ ގޮތަކަށް ގަބޫލުކުރެއެވެ. އެއްގޮތަކީ ލެބޯޓްރީގެ ތެރޭގައި ހިނގި ކަމެއްގެ ތެރެއިން ވައިރަސް ލީކުވުމެވެ. އަނެއްގޮތަކީ ވައިރަސް ޖެހިފައިވާ ޖަނަވާރެއްގެ ފުށުން އިންސާނުންނާ ހަމައަށް ވައިރަސް އައުމެވެ. ވައިރަސް އިންސާނުންނާ ހަމައަށް އައީ މިތަނުން ކޮން ގޮތަކުން ކަމެއް އަދި އެމެރިކާއިން ނުނިންމައެވެ.

ޓްރަމްޕްގެ ވެރިކަމުގައި އެމެރިކާގެ އިންޓަލިޖެންސް އިދާރާތަކުން މިކަމާ ގުޅޭގޮތުން ކުރިޔަށްގެންދިޔަ ތަހުގީގުތަކުގެ ރިޕޯޓްގައި ވުހާންގެ ލެބޯޓްރީގައި މަސައްކަތްކުރަމުންދިޔަ ތިން މީހަކު 2019 ވަނަ އަހަރުގެ ނޮވެމްބަރ މަހު ވަރަށް ބޮޑަށް ބަލިވެގެން ހޮސްޕިޓަލުން ފަރުވާ ހޯދިކަމަށް ބަޔާންކޮށްފައިވެއެވެ.

އެމެރިކާގެ އޮފިޝަލުން ތަކުރާރުކޮށް އަންނަނީ ވައިރަސްގެ އަސްލު ހާމަކުރުމުގައި ޗައިނާއިން ކަންތައްތަކެއް ފޮރުވަން މަސައްކަތްކުރާ ކަމުގެ ތުހުމަތު ކުރަމުންނެވެ. އެހެންނަމަވެސް ޗައިނާއިން އަންނަނީ އެކަން ދޮގުކުރަމުންނެވެ.

އަނެއްކޮޅުން ވައިރަސްގެ އަސްލު ދެނެގަތުމަށް ޑަބްލިޔުއެޗްއޯއިން ކުރަމުންދާ މަސައްކަތްތަކާ ގުޅޭގޮތުން ވާހަކަދައްކަވަމުން މައިކް ރިޔާން ވިދާޅުވީ ވައިރަސްގެ އަސްލު ދެނެގަތުމަށް ކޮވިޑް-19 އެންމެ ފުރަތަމަ ޗައިނާއިން ފެނުނުއިރުގެ އިތުރު ޑާޓާތަކެއް ދިނުމަށް ޗައިނާއަށް ދެން އިތުރަށް ބާރެއް ނޭޅޭނެކަމަށެވެ. ނަމަވެސް ވައިރަސްގެ އަސްލު ދެނެގަތުމަށް ކުރަމުންދާ މަސައްކަތުގައި ދެން ކުރެވޭނެ ކަންކަމާ ގުޅޭގޮތުން ޕްރޮޕޯސަލްއެއް ތައްޔާރުކުރުމަށްފަހު ހުށަހަޅުއްވާނެކަމަށް މައިކް ވިދާޅުވިއެވެ.

މި މަހުގެ ކުރީކޮޅު އެމެރިކާގެ އިންފެކްޝިއަސް ޑިޒީސް އެކްސްޕާޓް ޑރ. އެންތޮނީ ފައުޗީ ވަނީ ވުހާންގެ ލެބޯޓްރީގައި މަސައްކަތްކުރި މީހުންގެ މެޑިކަލް ރިޕޯޓްސް ހާމަކުުރުމަށް ޗައިނާއަށް ގޮވާލައްވާފައެވެ.