ޕޮޒިޓިވް ކޭސްތައް މަޑުމަޑުން ދަށަށް، ހޯމަ ދުވަހު ޕޮޒިޓިވްވީ 552 މީހުން
ޕޮޒިޓިވްވި މީހުންގެ ޖުމްލަ އަދަދު 68،502ށް
ސަލާމަތީ ބާރުތައް- ކޮވިޑް-19 އިން ރައްކާތެރިވުމަށް އަޅާފައިވާ ފިޔަވަޅުތައް ތަންފީޒު ކުރުމުގެ މަސައްކަތުގައި
ހޯމަދުވަހު ރާއްޖެއިން ކޮވިޑް-19ށް ޕޮޒިޓިވްވީ 552 މީހުން ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.
އެޗްޕީއޭއިން އާންމުކުރި ތަފާސްހިސާބުތައް ދައްކާގޮތުން އާދިއްތަ ދުވަހުގެ އިރު އޮއްސި 6:00ން ހޯމަ ދުވަހުގެ އިރު އޮއްސި 6:00ށް ނެގި 5،043 ސާމްޕަލްގެ ތެރެއިން 552 ސާމްޕަލް ވަނީ ޕޮޒިޓިވްވެފައެވެ. އެއީ މާލެ ސަރަހައްދުން 271 މީހުންނާއި އަތޮޅުތެރެއިން 249 މީހުންނާއި، ރިސޯޓުތަކުން 31 މީހުންނާއި، އަދި ތަރައްގީކުރަމުން އަންނަ ރަށްރަށުން އެކަކެވެ.
މިއާއެކު ރާއްޖެއިން ޕޮޒިޓިވްވި މީހުންގެ ޖުމްލަ އަދަދު 68،502ށް އަރާފައިވާއިރު، އޭގެ ތެރެއިން 18،462 މީހުންނަށް ދަނީ ފަރުވާދެމުންނެވެ. 164 މީހުންނަށް އެޑްމިޓްކޮށްގެން ފަރުވާދެމުންދާއިރު 49،844 މީހުން ވަނީ ރަނގަޅުވެފައެވެ.
ރާއްޖެއިން މިހާތަނަށް 187 މީހުން ވަނީ މި ބަލީގައި ނިޔާވެފައެވެ.
ރާއްޖެއިން ކޮވިޑްގެ ކޭސްތައް މިދިޔަ މަހުގެ ތެރޭގައި އިންތިހާއަށް އިތުރުވުމާއިއެކު، ސަރުކާރުން ވަނީ އިތުރު ފިޔަވަޅުތަކެއް އަޅާފައެވެ.
މިގޮތުން، ކާފިއުގެ ވަގުތު އިތުރުކުރުމާއިއެކު ކާފިއު ނޫން ވަގުތުތަކުގައި ވެސް ބޭރުގައި އުޅުމަށް ފާހެއް ދިނުމަށް ވަނީ ނިންމާފައެވެ. އަދި މިފިޔަވަޅުތަކާއިއެކު ކޮވިޑްގެ ކޭސްތައް ފެންނަވަރު މިހާރު ވަނީ ވަރަށް ބޮޑަށް ދަށްވެފައެވެ
