އެޗްޕީއޭއިން ލައިވް ޗެޓްގެ ޚިދުމަތް ފަށައިފި

ހެލްތު ޕްރޮޓެކްޝަން އެޖެންސީން އާންމު މައުލޫމާތު ސާފުކުރުމަށް ލައިވް ޗެޓުގެ ހިދުމަތް ފަށައިފިއެވެ.

އެޗްޕީއޭއިން ބުނީ ކޯލް ސެންޓަރުން ދޭ ޚިދުމަތް ރަނގަޅުކުރުމުގެ ގޮތުން، ސިއްހީ އެމަރޖެންސީތައް ނޫން އެހެނިހެން އާންމު މައުލޫމާތުތައް ސާފުކުރުމަށް ލައިވް ޗެޓްގެ ޚިދުމަތް ފަށާފައި ވާ ކަމަށެވެ. އެގޮތުން ޓުވިޓަރ ޑީއެމް އަދި ފޭސްބުކް މެސެންޖަރ މެދުވެރިކޮށް ކޮންމެ ދުވަހަކު ވެސް ހެނދުނު 9ން މެންދަމު 12ށް މައުލޫމާތު ސާފުކުރެވޭނެ ކަމަށެވެ.

ރާއްޖޭގައި ކޮވިޑް-19 އުޅޭތާ އެއް އަހަރަށް ވުރެ ގިނަ ދުވަސްވެފައިވާއިރު، ރާއްޖެއިން ބަލި ފެނުނީއްސުރެ، އެމަރޖެންސީ އޮޕަރޭޝަން ސެންޓަރެއް ގާއިމްކޮށް ވަނީ ޚިދުމަތް ދޭން ފަށާފައެވެ. ކޮވިޑްގެ ކަންކަމާ ގުޅޭ ގޮތުން އާންމު މައުލޫމާތު ސާފުކުރުމަށާއި، އެމަރޖެންސީ ހާލަތްތަކުގައި ވެސް ގުޅަން ޖެހެނީ ކޯލް ސެންޓަރަށެވެ. އޭގެ ސަބަބުން އެތައް ކޯލް އަކަށް ޖަވާބު ނުދެވި ގިނަ އިރުތަކެއް ކިއުގައި ހޭދަކުރަން ޖެހެއެވެ.

އަލަށް މި ފެށި ލައިވްޗެޓް ގެ އިތުރުން، އެޗްޕީއޭ ކޯލް ސެންޓަރުތަކުގެ ޚިދުމަތް ރަނގަޅު ކުރުމަށާއި، އެމަރޖެންސީ ފަރުވާ ލިބޭނެ މަގުފަހިކުރުމަށްޓަކައި ވެސް އުސޫލުތަކަށް ބަދަލުތައް ގެނެސްފައިވާއިރު، އޯބީ ސިސްޓަމް ފެއިލް ވެއްޖެ ނަމަ އަމަލުކުރާން އުސޫލަކާއި، އެމްބިއުލާންސް ޓްރިގަރކުރުމުގެ އައު އުސޫލެއް ވެސް ވަނީ ކަނޑައަޅާފައެވެ.