މިޝްކާގެ މަރުގައި މީހެއްގެ އިހުމާލު އޮތްނަމަ ފިޔަވަޅު އެޅެންޖެހޭނެ - މަބްރޫކް
މީހެއްގެ އިހުމާލު ވާކަން ކަނޑައަޅާނީ އިހުމާލުވެފައި ހުރި ދާއިރާތަކުގެ ނުވަތަ ކްލަސްޓާތަކުގެ ވެރީންގެ މަޝްވަރާއާ އެކުގައި
ރައީސް އޮފީހުގެ ތަރުޖަމާނު މުހައްމަދު މަބްރޫކް އަޒީޒް
ކޮވިޑް ބަލީގައި ނިޔާވި އުމުރުން 10 އަހަރުގެ ފާތިމަތު މިޝްކާ މުހައްމަދު ނިޔާވި މައްސަލައިގައި, މީހެއްގެ އިހުމާލު ވާނަމަ އެމީހަކާ ދޭތެރޭ ފިޔަވަޅު އެޅެން ޖެހޭނެ ކަމަށް ރައީސް އޮފީހުގެ ތަރުޖަމާން މުޙައްމަދު މަބްރޫކް އަޒީޒް ވިދާޅުވެއްޖެއެވެ.
މިޝްކާއަށް ފަރުވާ ދިނުމުގައި ބޮޑެތި އިހުމާލުތަކެއް ހުރިކަން ހެލްތު މިނިސްޓްރީން ހެދި ރިވިއު ރިޕޯޓުން ވަނީ ހާމަވެފައެވެ. އެގޮތުން, ސިއްހީ ޚިދުމަތް ފޯރުކޮށްދިނުމުގައި, އެއީ އެމަރޖެންސީ ހާލަތެއްކަމުގައި ބެލިފައިނެތުމާއި އެފަދަ ހާލަތެއްގައި އަމަލުކުރަންޖެހޭ ގޮތަށް އަމަލުކޮށްފައި ނެތުމާއި އެމްބިޔުލަންސް ޓްރިގަރ ކުރަންޖެހޭ ވަގުތުގައި އެކަންކޮށްފައި ނުވާކަން ކަމަށް ރިޕޯޓުގައި ވެއެވެ.
މިކަމާ ގުޅިގެން މަބްރޫކް ވިދާޅުވީ, މިހާތަނަށް މި މައްސަލައިގައި ކުރެވުނު މަސައްކަތަކީ ކޭސް ރިވިއުއެއް ހެދި ފާހަގަ ކުރެވުނު ކަންކަން އާންމުކުރުން ކަމަށެވެ. އެއާއެކު ދެން ހެލްތު މިނިސްޓްރީން ކުރަންޖެހޭނެ ކަމަކީ, ކަންބޮޑުވުން ހުރި ދާއިރާތަށް ރަނގަޅު ކުރުމުގެ މަސައްކަތް ކުރުމާއި, ފަރުވާ ދިނުމުގައި ލަސްވާން ދިމާވި ސަބަބު ތަކަކީ ކޮބައިތޯ ބެލުން ކަމަށެވެ.
ދާއިރާތަކުން އިތުރަށް ކުރަންޖެހޭ މަސައްކަތްތަކާ ގުޅޭ ގޮތުން, މަބްރޫކް ވިދާޅުވީ މިޝްކާގެ ފަރުވާ ލަސްވާން ދިމާވި ސަބަބުތަކުގެތެރޭގައި މީހެއްގެ އިހުމާލު ވާނަމަ އެމީހަކާ ދޭތެރޭ ފިޔަވަޅު އެޅެން ޖެހޭކަމުގައެވެ. އެކަމަކު އެޔެއް ކަނޑައަޅާނީ އިހުމާލުވެފައި ހުރި ދާއިރާތަކުގެ ނުވަތަ ކްލަސްޓާތަކުގެ ވެރީންގެ މަޝްވަރާއާ އެކުގައި ކަމަށް މަބްރޫކް ވިދާޅުވިއެވެ.
މިޝްކާ އަކީ ކޮވިޑް ބަލީގައި ރާއްޖޭން ނިޔާވި ހަމައެކަނި ކުޑަކުއްޖާއެވެ. އޭނާ ކޮވިޑަށް ޕޮޒިޓިވްވެފައިވަނީ މެއި މަހުގެ 30 ވަނަ ދުވަހުއެވެ. މިޝްކާގެ ހާލު ދެރަވެގެން ބެލެނިވެރިޔާ ކޯލް ސެންޓަރަށް ގުޅާފައިވަނީ މެއި 31 ވަނަ ދުވަހުގެ ރޭ 9:06ގައެވެ. އެކަމަކު ފަރުވާ ދިނުމަށް އެމްބިޔުލަންސް އެކްޓިވޭޓްކޮށްފައިވަނީ އެމްބިޔުލަންސް ފޮނުވުމަށް ކުއްޖާގެ ބެލެނިވެރިޔާ އެތައް ފަހަރަކު ކޯލް ސެންޓަރަށް ގުޅައިގެން ވެސް އެމްބިޔުލަންސް ނައުމުން އާއިލާގެ ފަރާތުން މީހަކު ދަރުބާރުގެއަށް ދިޔަ ފަހުން ކަމަށް ހެލްތު މިނިސްޓްރީގެ ރިވިއު ރިޕޯޓުގައި ބަޔާންކޮށްފައިވެއެވެ.
ފަރުވާއަށް މިޝްކާ އައިޖީއެމްއެޗް އީއާރަށް ގެންދެވިފައިވަނީ ބެލެނިވެރިޔާ ކޯލް ސެންޓަރަށް ގުޅިތާ 2 ގަޑިއިރާއި 30 މިނެޓަށްވުރެ ގިނަ އިރުވި ފަހުން ކަމަށް އާއިލާގެ ފަރާތުން ހާމަކޮށްފައިވެއެވެ. މިޝްކާ ނިޔާވީ އޭގެ 24 ގަޑިއިރުފަހުން ޖޫން މަހުގެ 1 ވަނަ ދުވަހުގެ ރޭ މެންދަމު 12:10 ހާއިރުއެވެ.
