ހޯމަ ދުވަހުގެ ފުރަތަމަ މަރު، 86 އަހަރުގެ ފިރިހެނެއް
އެންމެ ގިނަ މީހުން ނިޔާވެފައިވަނީ، މިދިޔަ މެއި މަހުގެ 24 ވަނަ ދުވަހު
ހުޅުމާލެ ސަހަރާ
ކޮވިޑް-19 ޖެހިގެން ރާއްޖެއިން އުމުރުން 86 އަހަރު ފިރިހެނަކު ނިޔާވެއްޖެއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނީ، އެމީހާ ނިޔާވެފައިވަނީ ހޯމަ ވިލޭރޭ ހުޅުމާލެ މެޑިކަލް ފެސިލިޓީގައި ފަރުވާ ދެމުން ދަނިކޮށް 12:18ގައި ކަމަށެވެ.
މިއާއެކު ރާއްޖޭގައި ކޮވިޑް ޖެހިގެން ނިޔާވި މީހުންގެ އަދަދު މިވަނީ 186ށް އަރާފައެވެ. އަދި މިއީ ހޯމަ ދުވަހު ނިޔާވި ފުރަތަމަ މީހާއެވެ.
އާދީއްތަ ދުވަހު މިބަލީގައި ތިން މީހަކު ނިޔާވެފައިވެއެވެ.
އުމުރުން 41 އަހަރު އަންހެނަކަށް ހުޅުމާލެ ހޮސްޕިޓަލުގައި ފަރުވާދެމުން ދަނިކޮށް އާދީއްތަ ދުވަހުގެ ހެނދުނު 07:40ގައި ވަނީ ނިޔާވެފައެވެ.
އާދިއްތަ ދުވަހު އެންމެ ފުރަތަމަ ނިޔާވެފައިވަނީ އުމުރުން 93 އަހަރުގެ ފިރިހެނެކެވެ. އެމީހާ ނިޔާވެފައިވަނީ އާދިއްތަ ވިލޭރޭގެ 12:47 ގައެވެ.
އާދިއްތަ ދުވަހު ދެން ނިޔާވީ އުމުރުން 82 އަހަރުގެ މީހެކެވެ. އެމީހާ ނިޔާވެފައިވަނީ އާދިއްތަ ދުވަހުގެ ހެނދުނު 8 ޖެހިއިރުއެވެ.
އާދީއްތަ ދުވަހު 3 މީހުން ނިޔާވެފައިވާއިރު، މި ތިން މީހުންނަކީ ވެސް ހުޅުމާލެ މެޑިކަލް ފެސިލިޓީގައި ފަރުވާ ހޯދަމުން ދިޔަ ތިން މީހުންނެވެ.
ކޮވިޑް ބަލީގައި ހޮނިހިރު ދުވަހު ވަނީ ފަސް މީހަކު ނިޔާވެފައެވެ.
ރާއްޖޭގައި މިހާތަނަށް މިބަލީގައި އެއް ދުވަހެއްގެ ތެރޭގައި، އެންމެ ގިނަ މީހުން ނިޔާވެފައިވަނީ، މިދިޔަ މެއި މަހުގެ 24 ވަނަ ދުވަހު އެވެ. އެ ދުވަހު 13 މީހަކު ނިޔާވިއެވެ.
