މެއި މަހު ހުޅުމާލެ މެޑިކަލް ފެސިލިޓީގައި އެޑްމިޓްކުރި މީހުންގެ 93 އިންސައްތަ މީހުން ވެކްސިންގެ ދެ ޑޯޒް ފުރިހަމަކޮށްފައެއް ނުވޭ
މެއި މަހުގެ ތެރޭގައި ހުޅުމާލެ މެޑިކަލް ފެސިލިޓީގައި 725 މީހުން އެޑްމިޓްކޮށްފައިވޭ
ހުޅުމާލެ މެޑިކަލް ފެސިލިޓީ
ހުސްވި މެއި މަހު ހުޅުމާލެ މެޑިކަލް ފެސިލިޓީގައި އެޑްމިޓްކުރި މީހުންގެ ތެރެއިން 93 އިންސައްތަ މީހުން ވެކްސިންގެ ދެ ޑޯޒް ފުރިހަމަކޮށްފައިނުވާ ކަމަށް ހެލްތު އެމަރޖެންސީ އޮޕަރޭޝަން ސެންޓަރ (އެޗްއީއޯސީ)ން ބުނެފިއެވެ.
އެސެންޓަރުން އާދިއްތަ ދުވަހުގެ ރޭ ކުރިޔަށް ގެންދިޔަ ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާން މުހައްމަދު މަބްރޫކް އަޒީޒް ވިދާޅުވީ މެއި މަހުގެ ތެރޭގައި ހުޅުމާލެ މެޑިކަލް ފެސިލިޓީގައި 725 މީހުން އެޑްމިޓްކުރިކަމަށެވެ. އަދި މެއި މަސްތެރޭގައި 718 މީހުން ބަލިން ރަނގަޅުވެގެން ދޫކޮށްލާފައިވާކަމަށް މަބްރޫކް ވިދާޅުވިއެވެ. އޭގެތެރޭގައި މެއި މަހުގެ ކުރިން އެފެސިލިޓީގައި އެޑްމިޓްކުރި މީހުން ވެސް ހިމެނެއެވެ.
މިވަގުތު ހޮސްޕިޓަލުގައި އެޑްކޮށްގެން ފަރުވާދެމުންދާ މީހުންނަށް ބަލާއިރު ދަރުމަވަންތަ ހޮސްޕިޓަލްގެ 17 ވަނަ ފަންގިފިލާގައި 5 މީހަކަށް ވޯރޑްގައި ފަރުވާދެމުން އަންނައިރު އެ ހޮސްޕިޓަލްގެ 16 ވަނަ ފަންގިފިލާގައި 2 މީހުންނަށް އަންނަނީ ފަރުވާ ހޯދަމުންނެވެ. މީގެއިތުރުން ދަރުމަވަންތަ ހޮސްޕިޓަލްގެ 11 ވަނަ ފަންގިފިލާގައި 9 މީހަކަށް ފަރުވާދެމުން އަންނައިރު އޭގެތެރެއިން 5 މީހަކަށް އަންނަނީ ވެންޓިލޭޓަރުގައި ފަރުވާދެމުންނެވެ.
އައިޖީއެމްއެޗްގެ ހިޔާ ވިންގގުގައި 6 މީހުންނަށް ފަރުވާދެމުން އަންނަކަމަށް މަބްރޫކް ވިދާޅުވިއެވެ.
ހުޅުމާލެ މެޑިކަލް ފެސިލިޓީގައި 89 މީހުންނަށް އަންނަނީ ފަރުވާދެމުންނެވެ. އޭގެތެރެއިން 8 މީހަކަށް އަންނަނީ އައިސީޔޫގައި ފަރުވާދެމުންނެވެ. އައިސީޔޫގައި ފަރުވާ ދެމުން އަންނަ މީހުންގެ ތެރެއިން 5 މީހަކަށް ފަރުވާދެމުން އަންނަނީ ވެންޓިލޭޓަރުގައެވެ.
ހުޅުމާލެ ހޮސްޕިޓަލްގައި 20 މީހަކަށް އަންނަނީ ފަރުވާދެމުންނެވެ.
މިވަގުތު ހޮސްޕިޓަލްތަކުގައި 165 މީހަކަށް އަންނަނީ އެޑްމިޓްކޮށްގެން ފަރުވާދެމުންނެވެ.
