ގާޒާ އާރާސްތުކުރުމަށް މިސްރުން އެހީ ފޮނުވައިފި
7 ޖޫން 2021 | ހޯމަ 02:23މިސްރުން ވަނީ ގާޒާ އާރާސްތު ކުރުމަށް 500 މިލިއަން ޑޮލަރުގެ ހޭދަކުރުމަށް ނިންމާފައި
އިސްރާއީލުގެ ހަމަލާގައި ގެދޮރު ގެއްލުނު އާއިލާއެއް
އިސްރާއީލުން ފަލަސްތީނުގެ ގާޒާއަށް ދިން އުދުވާނީ ހަމަލާތަކުގައި ލިބުނު ގެއްލުމުން އަރައިގަތުމަށް އެ ސަރަހައްދު އަލުން އާރާސްތުކުރުމަށް ބޭނުންވާ ބަރު މެޝިނާއި ވެހިކަލްތައް މިސްރުން ގާޒާއަށް ފޮނުވައިފިއެވެ.
މިސްރުން ބުނީ ގާޒާއަށް ބުލްޑޯޒަރާއި ކެރޭނާއި ލޮރީއާއި އެނޫންވެސް ބަރު މެޝިންތަކާއި ވެހިކަލްތައް ހިމެނޭ ގޮތަށް 50 އުޅަނދު ގާޒާއަށް ފޮނުވާފައިވާ ކަމަށެވެ.
އިސްރާއީލުން އެންމެ ފަހުން ގާޒާއަށް ދިން ހަމަލާތަކާ ގުޅިގެން މިސްރުން އަންނަނީ ފަލަސްތީނުގެ ރައްޔިތުންނަށް އެކި ގޮތްގޮތުން އެހީތެރިވަމުންނެވެ. އެގޮތުން މިސްރުން ވަނީ އިސްރާއީލުން ދިން ލާއިންސާނީ ހަމަލާތަކުގައި ޒަހަމްވި ފަލަސްތީނުގެ ރައްޔިތުން މިސްރަށް ގެންގޮސް މިސްރުގެ ހޮސްޕިޓަލުތަކުގައި ވެސް ފަރުވާދީފައެވެ. އަދި ގާޒާގެ ހޮސްޕިޓަލަށް ބޭނުންވާ މެޑިކަލް ސާމާނު ގާޒާއަށް ފޯރުކޮށްދީފައިވެއެވެ.
ގާޒާ އަލުން އާރާސްތުކުރުމަށް މަދުވެގެން ދެ ބިލިއަން ޑޮލަރު ބޭނުންވާނެ ކަމަށް އދ. އިން ބުނެއެވެ. މިސްރުން ވަނީ ގާޒާ އާރާސްތު ކުރުމަށް 500 މިލިއަން ޑޮލަރު ހޭދަކުރާނެކަން އިއުލާން ކޮށްފައެވެ. މީގެ އިތުރުން ގަތަރުން ވެސް ވަނީ 500 މިލިއަން ޑޮލަރު ގާޒާ އާރާސްތުކުރުމަށް ދޭން ނިންމާފައެވެ.
އިސްރާއީލުން ގާޒާއަށް ދިން ހަމަލާތަކުގައި 600ށް ވުރެ ގިނަ އިމާރާތް ވަނީ ހަލާކުވެފައެވެ. މީގެ ތެރޭގައި އެއްކޮށް ބިމާ ހަމަކުރި އިމާރާތްތަކާއި ބޭނުން ނުކުރެވޭވަރަށް ހަލާކު ކޮށްލާފައިވާ އިމާރާތްތައް ހިމެނެއެވެ. މީގެ ސަބަބަން ފަލަސްތީނުގެ 80،000ށް ވުރެ ގިނަ މީހުން ވަނީ ގެދޮރު ގެއްލިފައެވެ.
