ކޮވިޑް ޖެހިގެން އުމުރުން 41 އަހަރުގެ މީހަކު ނިޔާވެއްޖެ
6 ޖޫން 2021 | އާދީއްތަ 17:46މިމަހުގެ މިހާތަނަށް 24 މީހަކު ވަނީ ނިޔާވެފައި
ހުޅުމާލެ ސަހަރާ
ކޮވިޑް-19 ޖެހިގެން ރާއްޖެއިން އުމުރުން 41 އަހަރު އަންހެނަކު ނިޔާވެއްޖެއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނީ، އެމީހާ ނިޔާވެފައިވަނީ އާދިއްތަ ދުވަހުގެ ރޭ 07:40ގައި ކަމަށެވެ.
މިއާއެކު ރާއްޖޭގައި ކޮވިޑް ޖެހިގެން ނިޔާވި މީހުންގެ އަދަދު މިވަނީ 185ށް އަރާފައެވެ. އަދި މިއީ އާދިއްތަ ދުވަހު ނިޔާވި ތިން ވަނަ މީހާއެވެ.
އާދިއްތަ ދުވަހު އެންމެ ފުރަތަމަ ނިޔާވެފައިވަނީ އުމުރުން 93 އަހަރުގެ ފިރިހެނެކެވެ. އެމީހާ ނިޔާވެފައިވަނީ އާދިއްތަ ވިލޭރޭގެ 12:47 ގައެވެ.
އާދިއްތަ ދުވަހު ދެން ނިޔާވީ އުމުރުން 82 އަހަރުގެ މީހެކެވެ. އެމީހާ ނިޔާވެފައިވަނީ އާދިއްތަ ދުވަހުގެ ހެނދުނު 8 ޖެހީއިރުއެވެ.
އާދީއްތަ ދުވަހު 3 މީހުން ނިޔާވެފައިވާއިރު، މި ތިން މީހުންނަކީ ވެސް ހުޅުމާލެ މެޑިކަލް ފެސިލިޓީގައި ފަރުވާ ހޯދަމުން ދިޔަ ތިން މީހުންނެވެ.
ކޮވިޑް ބަލީގައި ހޮނިހިރު ދުވަހު ވަނީ ފަސް މީހަކު ނިޔާވެފައެވެ.
ރާއްޖޭގައި މިހާތަނަށް މިބަލީގައި އެއް ދުވަހެއްގެ ތެރޭގައި، އެންމެ ގިނަ މީހުން ނިޔާވެފައިވަނީ، މިދިޔަ މެއި މަހުގެ 24 ވަނަ ދުވަހު އެވެ. އެ ދުވަހު 13 މީހަކު ނިޔާވިއެވެ.
އަދި މެއި މަހަކީ މިހާތަނަށް އެންމެ ގިނަ މީހުން މިބަލީގައި ނިޔާވި މަސްވެސް މެއެވެ. މެއި މަހު 88 މީހުން ވަނީ ނިޔާވެފައެވެ.
އަދި މިހިނގާ ޖޫންމަހުގެ މިހާތަނަށް 24 މީހަކު ވަނީ ނިޔާވެފައެވެ.
