ޑި ބްރޭނާ އަނިޔާއިން ރަނގަޅުވުން
އޮޕަރޭޝަނަށްފަހު ޑި ބްރޭނާ ބެލްޖިއަމުގެ ސްކޮޑާ ގުޅެނީ
 
ނޭފަތާއި ލޯ ކައިރިއަށް އަނިޔާވެ ޑި ބްރޭނާ އޮޕަރޭޝަނެއް ކުރި
 
ފޭސް މާސްކް އަޅައިގެން ކުޅެން ޑި ބްރޭނާއަށް ވަނީ ލަފާދީފައި
ކ. މާލެ |
ޗެމްޕިއަންސް ލީގުގެ ފައިނަލް މެޗުގެ ތެރެއިން ޑި ބްރޭނާއަށް އަނިޔާވެފައި ވަނިކޮށް
ގެޓީ އިމޭޖަސް

މޫނަށް ލިބުނު އަނިޔާއިން ރަނގަޅުވާން ކުރި އޮޕަރޭޝަނަށްފަހު، އަންނަ ހޯމަ ދުވަހު ބެލްޖިއަމުގެ ފަރިތަކުރުންތަކުގައި މިޑްފީލްޑަރު ކެވިން ޑި ބްރޭނާ ބައިވެރިވާނެ ކަމަށް އެ ގައުމުގެ ކޯޗު ރޮބާޓޯ މާޓިނޭޒް ބުނެފިއެވެ.

އުމުރުން 29 އަހަރުގެ ޑި ބްރޭނާއަށް އަނިޔާވީ ޔުއެފާ ޗެމްޕިއަންސް ލީގުގެ ފައިނަލް މެޗުގެ ތެރެއިންނެވެ. އެ މެޗުން ޗެލްސީ އަތުން 1-0 ގެ ނަތީޖާއަކުން މެންޗެސްޓާ ސިޓީ ބަލިވިއިރު، ދެވަނަ ހާފުގައި ޑި ބްރޭނާގެ މޫނަށް ލިބުނު އަނިޔާއަކާ ގުޅިގެން އޭނާ ވަނީ ބަދަލުކޮށްފައެވެ.

ރިޕޯޓުތައް ބުނާ ގޮތުން ޗެލްސީގެ އެންޓޯނިއޯ ރުޑިގާ ކުރި ފައުލަކާއެކު ޑި ބްރޭނާގެ ނޭފަތާއި ލޯ ކައިރިއަށް ވަނީ އަނިޔާވެފައެވެ. އެއާއެކު އޭނާ ވަނީ އެ އަނިޔާއިން ރަނގަޅުވުމަށް ކުޑަވަރެއްގެ އޮޕަރޭޝަނެއް ކޮށްފައެވެ.

މީގެ ކުރިން ބެލްޖިއަމުގެ ކޯޗު ރޮބާޓޯ މާޓީނޭޒް ވަނީ އަންނަ ހޮނިހިރު ދުވަހު ޔޫރޯގައި ރަޝިއާ ދެކޮޅަށް ބެލްޖިއަމުން ކުޅޭ ފުރަތަމަ މެޗަށް ޑި ބްރޭނާ ފިޓްވުމުގެ ފުރުސަތު ކުޑަކަމަށް ބުނެފައެވެ. އެކަމަކު ދާދި ފަހުން ދިން އިންޓަވިއުއެއްގައި މާޓިނޭޒް ބުނީ ޑި ބްރޭނާގެ އޮޕަރޭޝަން ވަރަށް ކާމިޔާބު ކަމަށާއި، އެހެންކަމުން ޔޫރޯގައި ބެލްޖިއަމުން ކުޅޭ ފުރަތަމަ މެޗުގައި އޭނާ ކުޅެވޭނެކަމުގެ އުއްމީދު އެބައޮތް ކަމަށެވެ. އަދި އެ އޮޕަރޭޝަނަށްފަހު ހޯމަ ދުވަހުގެ ވަގުތެއްގައި ޑި ބްރޭނާ ބެލްޖިއަމުގެ ސްކޮޑާ ގުޅޭނެ ކަމަށްވެސް ވަނީ ބުނެފައެވެ.

މޫނަށް ލިބުނު އަނިޔާއިން ރަނގަޅުވުމަށް ޑި ބްރޭނާ އޮޕަރޭޝަނެއް ކުރިއިރު، ރިޕޯޓުތައް ބުނާ ގޮތުން އޮޕަރޭޝަން ކުރި ޑޮކްޓަރު ވަނީ މި ފަހަރުގެ ޔޫރޯގައި ޑި ބްރޭނާ މެޗުތައް ކުޅޭއިރު، ފޭސް ޕްރޮޓެކްޓް މާސްކެއް އަޅަން އަންގާފައެވެ.

މި މަހުގެ 11 ވަނަ ދުވަހު ޔޫރޯ ފަށާއިރު، އެ މުބާރާތަށް ތައްޔާރުވުމުގެ ގޮތުން ދުނިޔޭގެ ރޭންކިންގެ އެއްވަނައިގައި އޮތް ބެލްޖިއަމުން ވަނީ ދާދި ފަހުން އެކުވެރިކަމުގެ މެޗެއް ކުޅެފައެވެ. އެ މެޗުގައި ގްރީސްއާ ދެކޮޅަށް ބެލްޖިއަމް ނުކުތްއިރު، އެ މެޗު ނިމުނީ 1-1 ގެ ނަތީޖާއަކުން ދެ ގައުމު އެއްވަރުވެގެންނެވެ.

މި ފަހަރުގެ ޔޫރޯގައި ބެލްޖިއަމް ހިމެނުނީ ގުރޫޕް ބީ ގައެވެ. އެ ގުރޫޕުގައި ދެން ހިމެނެނީ ޑެންމާކާއި، ފިންލެންޑް އަދި ރަޝިއާއެވެ. ޔޫރޯގެ ފުރަތަމަ މެޗުގައި މި މަހުގެ 13 ވަނަ ދުވަހު ބެލްޖިއަމް ނުކުންނާނީ ރަޝިއާއާ ދެކޮޅަށެވެ.

އެންމެ ފަހުން އަޕްޑޭޓް ކުރީ: 1 ހަފްތާ ކުރިން
ރިވިއު ކުރީ: ހުސައިން ފަރިޔާޒް
100%
އަންތަރީސް ވެއްޖެ
0%
އުފާ ވެއްޖެ
0%
ދެރަ ވެއްޖެ
0%
ރުޅި ގަދަ ވެއްޖެ
0%
މޮޔަވެއްޖެ
0%
ލިޔުން ރަނގަޅު
ކޮމެންޓް
raajjemv logo

All rights reserved