ޑިބްރޭނާ ބުނަނީ ސިޓީން ލިވަޕޫލް އަންޑަ އެސްޓިމޭޓް ނުކުރާނެ ކަމަށް

އެންފީލްޑުގައި ލިވަޕޫލާ ދެކޮޅަށް ނުކުންނައިރު، މެންޗެސްޓަރ ސިޓީން އެ ޓީމު އަންޑަ އެސްޓިމޭޓް ނުކުރާނެ ކަމަށް ކެވިން ޑިބްރޭނާ ބުނެފިއެވެ.

ޑިބްރޭނާ މިހެން ބުނީ ޕްރިމިއާ ލީގުގައި ލިވަޕޫލާ ދެކޮޅަށް އާދިއްތަ ދުވަހުގެ ރޭ ނުކުންނަ މެޗުގެ ކުރިންނެވެ. އޭނާ ބުނީ މެޗަށް ތައްޔާރުވާނީ އެންމެ ފުރިހަމަ އަށް ކަމަށެވެ. މި ސީޒަންގެ ލީގުގައި މިހާތަނަށް ލިވަޕޫލްގެ ފަރާތުން އެދެވޭ ކުޅުމެއް ނުފެނެއެވެ. އެ ޓީމުގައި އަނިޔާގެ މައްސަލަތައް ބޮޑު އިރު، ލިވަޕޫލް އޮތީ ލީގު ތާވަލްގެ 11 ވަނަ މަގާމުގައެވެ.

ޑިބްރޭނާ ބުނީ ލިވަޕޫލްގެ މެޗަކީ ސިޓީ އަށް ބޮޑު އިމްތިހާނަކަށް ވެގެންދާނެ ކަމަށެވެ. އޭނާ ބުނީ މިދިޔަ ސީޒަންގައި ލިވަޕޫލްގެ ފަރާތުން ފެނުނު ކުޅުނު މި ސީޒަންގައި ނުފެނުނު ނަމަވެސް، އެ ޓީމަކީ ނުރައްކާތެރި، ދަނޑުމަތީގައި ކޮލެޓީ ޓީމެއް ކަމަށެވެ. އޭނާ ފާހަގަ ކުރި ގޮތުގައި ލިވަޕޫލްގެ ދަނޑު އެންފީލްޑަކީ އަބަދުވެސް އުނދަގޫ ތަނެކެވެ. ނަމަވެސް ކުރިން ވެސް ސިޓީން އެ ދަނޑުގައި މޮޅުވެފައިވާނެ ކަމަށް ޑިބްރޭނާ ބުންޏެވެ.

މީގެ އިތުރުން ޑިބްރޭނާ ބުނީ ލިވަޕޫލަށް އިދިކޮޅު ޓީމަށް ކޮންމެ ވަރެއްގެ "ހަމަލާ"އެއް ވެސް ދެވިދާނެ ކަމަށެވެ. ނިމުނު ހަފްތާގައި ރޭންޖާސް ކޮޅަށް ހަތް ލަނޑު ޖެހުމުން ލިވަޕޫލްގެ ނުރައްކާތެރިކަން ފެންނަ ކަމަށް އޭނާ ބުންޏެވެ. އޭނާ ބުނީ ސިޓީން އަބަދުވެސް ފަރިތަކުރުންތައް ކުރިއަށް ގެންދަނީ ހުރިހާ ދިމާލަކަށް އަމާޒުކޮށްގެން ކަމަށެވެ. އަދި ޓީމުގެ ހުރިހާ ކުޅުންތެރިން ވެސް އެންމެ ހައި ލެވެލްގައި ފަރިތަކުރަމުން އަންނަ ކަމަށް ވެސް އޭނާ ބުންޏެވެ.

ލިވަޕޫލާއި ސިޓީ ބައްދަލުކުރާ މެޗު އޮންނާނީ އާދިއްތަ ދުވަހުގެ ރޭ 20:30 ގައެވެ.،