ދަގަނޑޭއަށް ފަރިތަކުރުންތަކުގައި ބައިވެރިވެވޭނީ ކަރަންޓީން މުއްދަތަށްފަހު

ކޮވިޑް-19 އަށް އެންމެ ފަހުން ކުރި ޓެސްޓު ނެގެޓިވްވި ނަމަވެސް، ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާގު (ދަގަނޑޭ) އަށް ގައުމީ ފުޓްބޯޅަ ޓިމުގެ ފަރިތަކުރުންތަކުގައި ބައިވެރިވެވޭނީ ކަރަންޓީނުގެ މުއްދަތު ހަމަކުރުމަށްފަހު ކަމަށް މައުލޫމާތު ލިބިއްޖެއެވެ.

ފީފާ ވޯލްޑް ކަޕާއި އޭއެފްސީ އޭޝިއަން ކަޕުގެ ޖޮއިންޓް ކޮލިފިކޭޝަނުގައި ރާއްޖެ ހިމެނޭ ގްރޫޕް އޭގެ ބާކީ ހުރި މެޗުތައް ދުބާއީގައި ކުޅޭއިރު، ދަގަނޑޭ އާއި ޒުވާން ޑިފެންޑަރު އަލީ ޝާމިސް (ތޮއްޕޭ) ވައިރަހަށް ޕޮޒިޓިވްވީ ގައުމީ ޓީމުން ދުބާއީގައި ހަދަމުން އައި ތަމްރީނުތަކުގެ ތެރެއިން މިދިޔަ މެއި މަހުގެ 30 ވަނަ ދުވަހުއެވެ.

އެއާއެކު އެ ދެ ކުޅުންތެރިން ވަނީ 10 ދުވަހަށް ކަރަންޓީނުވެފައެވެ. އެކަމަކު މިދިޔަ ހުކުރު ދުވަހު ހެދި ޓެސްޓުން ދަގަނޑޭ ވަނީ ވައިރަހަށް ނެގެޓިވްވެފައެވެ. އެއާއެކު ގައުމީ ޓީމުގެ ފަރިތަކުރުންތަކުގައި ދަގަނޑޭއަށް ބައިވެރިވެވޭނެ ކަމަށް ބެލެވުނު ނަމަވެސް، އެ ހުއްދަ އޭނާއަށް ލިބިފައެއް ނުވެއެވެ. އެގޮތުން ދަގަނޑޭއަށް ފަރިތަކުރުންތަކުގައި ބައިވެރިވެވޭނީ ކަރަންޓީން މުއްދަތަށްފަހު އިތުރު ޓެސްޓެއް ހަދައިގެން ކަމަށް ވަނީ މައުލޫމާތު ލިބިފައެވެ. މިހާރު އޮތްގޮތުން އަންނަ ހުކުރު ދުވަހުގެރޭ ޗައިނާއާ ދެކޮޅަށް ރާއްޖެ ކުޅޭއިރު، ދަގަނޑޭގެ ކަރަންޓީނު މުއްދަތު ހަމަވާނީ އަންނަ އަންގާރަ ދުވަހުއެވެ.

ކޮވިޑަށް ޕޮޒިޓިވްވެ ދަގަނޑޭއަށް ސީރިއާ މެޗު ގެއްލުނުއިރު، މީގެ ކުރިން މާލޭގައި ކުރިއަށްގެންދިޔަ ކޭމްޕުގެ ތެރެއިން އޭނާ ވަނީ އަންހެނުން ޕޮޒިޓިވްވުމާ ގުޅިގެން ކޭމްޕް ދޫކޮށްލާފައެވެ. އެކަމަކު ފަހުން ދަގަނޑޭ ކޭމްޕާ ގުޅުނީ ކޮވިޑަށް ޓެސްޓުކޮށް، ނަތީޖާ ނެގެޓިވްވުމުންނެވެ.

އޭޝިއަން ކަޕަށް ކޮލިފައިވުމަށް ރާއްޖެއިން އަމާޒުހިފާފައިވާއިރު، ކޮލިފައިންގައި ރާއްޖެ އޮތީ ހަ މެޗުން ހަ ޕޮއިންޓާއެކު ގްރޫޕުގެ ހަތަރުވަނައިގައެވެ. ގްރޫޕުގެ އެއްވަނައިގައި އޮތީ ހަ މެޗުން 18 ޕޮއިންޓާއެކު ސީރިއާއެވެ. ފަސް މެޗުން 10 ޕޮއިންޓާއެކު ދެވަނައިގައި ޗައިނާ އޮތްއިރު، ތިންވަނައިގައި އޮތީ ފަސް މެޗުން ހަތް ޕޮއިންޓް ހޯދާފައިވާ ފިލިޕީންސެވެ. އަދި ރާއްޖޭގެ ފަހަތުން ފަސްވަނައިގައި އޮތީ ހަ މެޗު ކުޅެގެން ޕޮއިންޓެއް ލިބިފައިނުވާ ގުއާމެވެ.