ޗިލީން އާޖެންޓީނާއާ އެއްވަރުކޮށްފި

ދެކުނު އެމެރިކާގެ ފީފާ ވޯލްޑް ކަޕް ކޮލިފައިން ބުރުގައި ހުކުރު ދުވަހުގެ ފަތިހު ކުޅުނު މެޗުން ޗިލީން އާޖެންޓީނާއާ އެއްވަރުކޮށްފިއެވެ.

އާޖެންޓީނާގައި ކުޅުނު މި މެޗު އެއްވަރުވީ 1-1 ގެ ނަތީޖާއަކުންނެވެ.

މި މެޗުގައި ދެ ގައުމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މެޗުގައި އެންމެ ފުރަތަމަ ލަނޑު ޖަހާ ލީޑު ނަގާފައިވަނީ އާޖެންޓީނާއިންނެވެ. މެޗުގެ 23 ވަނަ މިނެޓުގައި ލިބުނު ޕެނަލްޓީއަކުން މި ލަނޑު އެ ގައުމަށް ކާމިޔާބުކޮށްދިނީ ކެޕްޓަން ލިއޮނެލް މެސީއެވެ. މިއީ އޭރިއާ ތެރެއިން އާޖެންޓީނާގެ ލަޓާރޯ މާޓިނޭޒަށް ޗިލީގެ ގިލެރްމޯ މަރިޕަން ކުރި ފައުލަކަށް ރެފުރީ ދިން ޕެނަލްޓީއެކެވެ.

އެކަމަކު އޭގެ ފަހުން ޗިލީން ކުޅުން ރަނގަޅުކުރިއިރު، ފުރަތަމަ ހާފު ނިމުމުގެ ކުރިން އެ ގައުމުން ވަނީ ނަތީޖާ އެއްވަރުކޮށްފައެވެ. މެޗުގެ 36 ވަނަ މިނެޓުގައި ގެރީ މެޑަލް ދިން ބޯޅައަކުން މި ލަނޑު ޗިލީއަށް ކާމިޔާބުކޮށްދިނީ އަލެކްސިސް ސަންޗޭޒެވެ.

މި މެޗުން މޮޅުވެގެން ކޮލިފައިންގެ އެއްވަނައަށް އެރުމުގެ ފުރުސަތު އާޖެންޓީނާއަށް އޮތް ނަމަވެސް، މެޗު އެއްވަރުވުމުން އެ ގައުމު އޮތީ ދެވަނައިގައި ކުޅުނު ފަސް މެޗުން ލިބުނު 11 ޕޮއިންޓާއެކުއެވެ. ތާވަލުގެ އެއްވަނައިގައި އޮތީ ކުޅުނު ހަތަރު މެޗުންވެސް މޮޅުވެގެން 12 ޕޮއިންޓް ހަމަކޮށްފައިވާ ބްރެޒިލެވެ. އަދި އާޖެންޓީނާއާ އެއްވަރުކުރި ޗިލީ އޮތީ ކޮލިފައިންގެ ހަތްވަނައިގައި ފަސް މެޗުން ފަސް ޕޮއިންޓާއެކުއެވެ.