ރެއާލުން އެތުލެޓިކޯއާ ޕޮއިންޓުގެ ގޮތުން އެއްވަރުކޮށްފި

ސްޕެނިޝް ލީގުގައި ބުދަ ދުވަހުގެރޭ ގްރަނާޑާ ބަލިކޮށް އެންމެ ފަހުގެ ޗެމްޕިއަން ރެއާލް މެޑްރިޑުން ތާވަލުގެ އެއްވަނައިގައި އޮތް އެތުލެޓިކޯ މެޑްރިޑާ ޕޮއިންޓުގެ ގޮތުން އެއްވަރުކޮށްފިއެވެ.

އަމިއްލަ ދަނޑުގައި ކުޅުނު މެޗުން ގްރަނާޑާގެ މައްޗަށް ރެއާލް ކުރި ހޯދީ 2-0 ގެ ނަތީޖާއަކުންނެވެ.

ރެއާލުގެ ފަރާތުން މި މެޗުގައި މޮޅު ކުޅުމެއް ފެނިގެންދިޔަ ނަމަވެސް، މެޗުގެ ފުރަތަމަ ހާފުގައި ލަނޑެއް ފެނިގެން ގޮސްފައެއް ނުވެއެވެ. އެކަމަކު ދެވަނަ ހާފު ފަށައިގެން 12 ވަނަ މިނެޓުގައި ރެއާލުން ވަނީ މެޗުގައި ލީޑު ނަގާފައެވެ. މާކޯ އެސެންސިއޯ ނަގައިދިން ހުރަހަކުން މި ލަނޑު އެ ޓީމަށް ކާމިޔާބުކޮށްދިނީ މިޑްފީލްޑަރު ކަސެމީރޯއެވެ. އަދި މި މެޗުގައި ރެއާލުން ލީޑު ފުޅާކޮށްފައިވަނީ މެޗުގެ އިތުރު ވަގުތުގައެވެ. އިސްކޯ ދިން ޕާހަކުން މި ލަނޑު އެ ޓީމަށް ކާމިޔާބުކޮށްދިނީ އިތުބާރު ފޯވާޑް ކަރިމް ބެންޒެމާއެވެ.

މި މެޗުން ރެއާލް މޮޅުވިއިރު، މި ފަހަކަށް އައިސް ތަފާތު މޮޅު ކުޅުމެއް ދައްކަމުން އަންނަ ރެއާލުން ވަނީ ލީގުގައި އެންމެ ފަހުން ކުޅުނު ފަސް މެޗުންވެސް މޮޅުވެފައެވެ. މި ނަތީޖާއާއެކު ރެއާލް ދެވަނައިގައި އޮތީ ކުޅުނު 15 މެޗުން 32 ޕޮއިންޓާއެކުއެވެ. އެއްވަނައިގައި އޮތް އެތުލެޓިކޯއަށްވެސް 32 ޕޮއިންޓް ލިބިފައިވާއިރު، އެ ޓީމުން އެ އަދަދަށް ޕޮއިންޓް ހަމަކޮށްފައިވަނީ 13 މެޗުންނެވެ. އަދި ބުދަ ދުވަހުގެރޭ ރެއާލް އަތުން ބަލިވި ގްރަނާޑާ އޮތީ ތާވަލުގެ ހަތްވަނައިގައި 14 މެޗުން 21 ޕޮއިންޓާއެކުއެވެ.