ބަންގްލަދޭޝްގައި 16 އަހަރުން ދަށުގެ ޓީމުތަކަށް އަމާޒުކޮށްގެން ބާއްވާ "ޔުއެފާ އެސިސްޓް ޑެވެލޮޕްމެންޓް ޓޯނަމަންޓް" ގައި ރާއްޖެއިން ކެމްބޯޑިއާއާ އެއްވަރުކޮށްފިއެވެ.

ހުކުރު ދުވަހު ރާއްޖެ އާއި ކެމްބޯޑިއާ ބައްދަލުކުރި މެޗު އެއްވަރުވީ 2-2 ގެ ނަތީޖާއަކުންނެވެ.

މެޗު ފަށައިގެން ފުރަތަމަ ލަނޑު ޖަހާ ލީޑު ނެގީ ކެމްބޯޑިއާއިންނެވެ. މި ލަނޑު 16 ވަނަ މިނެޓުގައި އޭރިޔާ ބޭރުން ފޮނުވާލި ހަމަލާއަކުން ކާމިޔާބުކުރީ ސައު ސޯސްއެވެ.

ނަމަވެސް ރާއްޖެއިން ވަނީ ކެމްބޯޑިއާއަށް ދޫ ނުދީ ރަނގަޅު ކުޅުމެއް ދައްކައި، 25 ވަނަ މިނެޓުގައި ނަތީޖާ ހަމަހަމަކޮށްފައެވެ. މި ލަނޑު ރާއްޖެއަށް ކާމިޔާބުކޮށްދިނީ މުހައްމަދު ހަންނާން އާދަމްއެވެ.

ދެވަނަ ހާފް ފެށިގެން ދެވަނަ މިނެޓުގައި ކެމްބޯޑިއާއިން އަނބުރާ ލީޑު ހޯދާފައިވާއިރު، ރާއްޖެއިން ވަނީ 56 ވަނަ މިނެޓުގައި ނަތީޖާ ހަމަހަމަކޮށްފައެވެ.

މުބާރާތުގައި ރާއްޖެ ކުޅުނު ފުރަތަމަ މެޗުން 3-10 ގެ ނަތީޖާއަކުން ފެރޯ އައިލޭންޑްސް އަތުން ވަނީ ބަލިވެފައެވެ. ނަމަވެސް އެ މެޗުގެ ފުރަތަމަ ހާފްގައި ރާއްޖެއިން ވަނީ ރަނގަޅު ކުޅުމެއް ދައްކާފައެވެ.

މުބާރާތުގައި ރާއްޖެ ކުޅޭ ފަހު މެޗުގައި އާދީއްތަ ދުވަހު ނިކުންނާނީ ބަންގްލަދޭޝްއާ ދެކޮޅަށެވެ. މުބާރާތުގައި ރާއްޖޭގެ އިތުރުން ވާދަކުރަނީ ފެރޯ އައިލޭންޑްސް އާއި ބަންގްލަދޭޝް އަދި ކެމްބޯޑިއާއެވެ.

ރާއްޖޭގެ 16 އަހަރުން ދަށުގެ ޓީމު ގިނަ މުބާރާތްތަކުގައި ވާދަކުރަމުން އަންނައިރު، އާ ކޯޗު މުހައްމަދު ނިޒާމް (ނިޒާމްބެ) އާއެކު އެޓީމުން އަންނަނީ ކުރިއެރުންތައް ހޯދަމުންނެވެ.