ޖެހިޖެހިގެން 18 މެޗުން މޮޅުވެ، އިނގިރޭސި ޕްރިމިއާ ލީގުގައި މެންޗެސްޓާ ސިޓީން ހަދާފައިވާ ރެކޯޑާ ލިވަޕޫލުން އެއްވަރުކޮށްފި އެވެ.

ލީގުގައި ހޯމަ ދުވަހުގެރޭ ވެސްޓް ހޭމް ޔުނައިޓެޑްގެ މައްޗަށް ލިވަޕޫލް ކުރިހޯދީ 3-2 ގެ ނަތީޖާއަކުންނެވެ. މިއީ ލީގުގައި ލިވަޕޫލުން ޖެހިޖެހިގެން ހޯދި 18 ވަނަ މޮޅެވެ. މިފަހަރުގެ ސީޒަނުގައި ލިވަޕޫލަށް ހަމައެކަނި ގެއްލުނު ޕޮއިންޓަކީ އޮކްޓޯބަރު މަހު މެންޗެސްޓާ ޔުނައިޓެޑާ އެއްވަރުވުމުން ގެއްލުނު ދެ ޕޮއިންޓެވެ.

ޖެހިޖެހިގެން 18 މޮޅު ހޯދާ ލިވަޕޫލުން ސިޓީގެ ރެކޯޑާ އެއްވަރުކުރިއިރު، ސިޓީން ރެކޯޑު ގާއިމުކޮށްފައިވަނީ 2017 ވަނަ އަހަރުގެ އޯގަސްޓް މަހުން ޑިސެމްބަރު މަހުގެ ނިޔަލަށެވެ.

މި ނަތީޖާއާއެކު ލިވަޕޫލް އެއްވަނައިގައި އޮތީ 27 މެޗުން ލިބުނު 79 ޕޮއިންޓާއެކު އެވެ. ދެވަނައިގައި އޮތް މެންޗެސްޓާ ސިޓީ އަށް 27 މެޗުން ލިބިފައިވަނީ 57 ޕޮއިންޓެވެ.

އަމިއްލަ ދަނޑުގައި ހޯމަ ދުވަހުގެރޭ ކުޅުނު މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ ލިވަޕޫލުންނެވެ. މެޗުގެ ނުވަވަނަ މިނެޓުގައި ޓްރެންޓް އަލެކްސަންޑަ-އާނޯލްޑް ނަގައިދިން ހުރަހަކުން މި ލަނޑު އެޓީމަށް ކާމިޔާބުކޮށްދިނީ ޖޯޖީނިއޯ ވައިނަލްޑަމް އެވެ. އެކަމަކު އޭގެ ތިން މިނެޓު ފަހުން ކޯނަރަކުން އިސްސަ ޑިއޯޕް ވަނީ ވެސްޓް ހޭމްއަށް ނަތީޖާ އެއްވަރުކޮށްދީފައެވެ.

މި މެޗުގައި ވެސްޓް ހޭމްއިން ލީޑު ނެގީ ދެވަނަ ހާފު ފަށައިގެން ނުވަވަނަ މިނެޓުގައެވެ. ޑެކްލަން ރައިސް ހުރަސްކޮށްދިން ބޯޅައަކުން މި ލަނޑު އެޓީމަށް ކާމިޔާބުކޮށްދިނީ ޕަބްލޯ ފޯނަލްސް އެވެ. އެކަމަކު 68 ވަނަ މިނެޓުގައި މުހައްމަދު ސަލާހުގެ ލަނޑުން ލިވަޕޫލުން ނަތީޖާ އެއްވަރުކުރިއިރު، މި މެޗުން އެޓީމު މޮޅުވީ 81 ވަނަ މިނެޓުގައި ސަޑިއޯ މާނޭ ކާމިޔާބުކޮށްދިން ލަނޑުންނެވެ.

ލީގުގައި ހޯމަ ދުވަހުގެރޭ ކުޅުނު މެޗުން ވެސްޓް ހޭމްގެ މައްޗަށް ލިވަޕޫލް ކުރިހޯދިއިރު، މި ސީޒަނުގައި މިހާތަނަށް ލިވަޕޫލް މެޗަކުން ބަލިވެފައެއް ނުވެއެވެ. ލިވަޕޫލް މިހާރު ވަނީ ލީގުގައި ބަލިނުވެ 44 މެޗު ހަމަކޮށްފައެވެ. ލިވަޕޫލަށްވުރެ ރެކޯޑް ރަނގަޅީ ބަލިނުވެ ލީގު ޗެމްޕިއަންކަން ހޯދައި ޖުމްލަ 49 މެޗު ހަމަކުރި އާސެނަލް އެވެ.

މީގެ އިތުރުން 30 އަހަރަށްފަހު ލީގު ޗެމްޕިއަންކަން ހޯދަން ދެން ލިވަޕޫލަށް ބޭނުންވަނީ 12 ޕޮއިންޓެވެ.