ސްޕެނިޝް ލީގުގައި ހޮނިހިރު ދުވަހުގެރޭ ގެޓާފޭ އަތުން މޮޅުވެ ބާސެލޯނާއިން ތާވަލުގެ އެއްވަނައިގައި އޮތް ރެއާލް މެޑްރިޑާ ޕޮއިންޓުގެ ގޮތުން އެއްވަރުކޮށްފިއެވެ.

ގެޓާފޭ އަތުން ބާސާ މޮޅުވީ 2-1 ގެ ނަތީޖާއަކުންނެވެ. މި މޮޅާއެކު ބާސާ ދެވަނައިގައި އޮތީ 24 މެޗުން 52 ޕޮއިންޓާއެކު އެވެ. އެއްވަނައިގައި އޮތް ރެއާލްއަށް 23 މެޗުން ވަނީ 52 ޕޮއިންޓު ލިބިފައެވެ. ރެއާލްއަށް ކުރިލިބެނީ ލަނޑުގެ ތަފާތުންނެވެ. އެހެންކަމުން ލީގުގައި އާދީއްތާ ދުވަހުގެރޭ ސެލްޓާ ވީގޯ އަތުން މޮޅުވެ، އެއްވަނައިގައި ތިން ޕޮއިންޓުގެ ލީޑެއް އަލުން ނެގުމުގެ ފުރުސަތު ރެއާލަށް އެބައޮތެވެ.

މީގެ އިތުރުން ބާސާ އަތުން ބަލިވުމުން ގެޓާފޭ ތިންވަނައިގައި އޮތީ 24 މެޗުން 42 ޕޮއިންޓާއެކު އެވެ. ބާސާ އާއި ގެޓާފޭއާ ދެމެދު 10 ޕޮއިންޓުގެ ފަރަގެއް މިހާރު އެބައޮތެވެ.

ހޮނިހިރު ދުވަހުގެރޭ ބާސާގެ ދަނޑުގައި ކުޅުނު މެޗުގައި އެޓީމުން ކާމިޔާބުކުރި ދެ ލަނޑުވެސް ފެނިގެންގޮސްފައިވަނީ ފުރަތަމަ ހާފުގައެވެ. އެގޮތުން 33 ވަނަ މިނެޓުގައި ކެޕްޓަން ލިއޮނެލް މެސީ ދިން ޕާހަކުން ބާސާއަށް ލީޑު ނަގައިދިނީ އެންޓޮއިން ގްރީޒްމަން އެވެ. އަދި އޭގެ ހަ މިނެޓު ފަހުން ޖޫނިއޯ ފިރްޕީ ދިން ޕާހަކުން ސާޖީ ރޮބޭޓޯ ވަނީ ބާސާއަށް ލީޑު ފުޅާކޮށްދީފައެވެ.

ދެވަނަ ހާފުގައި ގެޓާފޭއިން ރަނގަޅު ކުޅުމެއް ދެއްކިއިރު، އެޓީމުން ފަރަގު ކުޑަކޮށްފައިވަނީ މެޗުގެ 66 ވަނަ މިނެޓުގައެވެ. ޖެއިމީ މަޓާ ނަގައިދިން ހުރަހަކުން މި ލަނޑު އެޓީމަށް ކާމިޔާބުކޮށްދިނީ އެންހެލް ރޮޑްރިގުއޭޒް އެވެ.

ލީގުގައި ދެން ބާސާއިން މެޗެއް ކުޅޭނީ މި މަހުގެ 22 ވަނަ ދުވަހު އެވެ. އެ ދުވަހު ބާސާ ނުކުންނާނީ އެއިބާއާ ދެކޮޅަށެވެ.