ޔުނައިޓެޑުން ލިވަޕޫލާ ޕޮއިންޓުގެ ގޮތުން އެއްވަރުކޮށްފި

އިނގިރޭސި ޕްރިމިއާ ލީގުގައި ހުކުރު ދުވަހުގެރޭ އެސްޓަން ވިލާ ބަލިކޮށް މެންޗެސްޓާ ޔުނައިޓެޑުން ތާވަލުގެ އެއްވަނައިގައި އޮތް އެންމެ ފަހުގެ ޗެމްޕިއަން ލިވަޕޫލާ ޕޮއިންޓުގެ ގޮތުން އެއްވަރުކޮށްފިއެވެ.

އަމިއްލަ ދަނޑުގައި ކުޅުނު މެޗުން ވިލާގެ މައްޗަށް ޔުނައިޓެޑް ކުރި ހޯދީ 2-1 ގެ ނަތީޖާއަކުންނެވެ.

މި މެޗުގައި ޔުނައިޓެޑުން ގިނަ ހަމަލާތަކެއް އުފެއްދިއިރު، ފުރަތަމަ ހާފުގައި އެ ޓީމުން ވަނީ ލީޑު ނަގާފައެވެ. ފުރަތަމަ ހާފު ނިމެން ފަސް މިނެޓަށް ވެފައި ވަނިކޮށް އާރޮން ވަން-ބިސާކާ ނަގައިދިން ހުރަހަކުން މި ލަނޑު އެ ޓީމަށް ކާމިޔާބުކޮށްދިނީ އެންތަނީ މާޝިއަލެވެ. އެކަމަކު މެޗުގެ ދެވަނަ ހާފު ފަށައިގެން 13 ވަނަ މިނެޓުގައި ޖެކް ގްރީލިޝް ތަނަވަސްކޮށްދިން ފުރުސަތެއްގައި ބާޓްރަންޑް ޓްރައޯރޭ ކާމިޔާބުކޮށްދިން ލަނޑުން ވިލާއިން ވަނީ ނަތީޖާ އެއްވަރުކޮށްފައެވެ.

ވިލާއިން ނަތީޖާ ހަމަހަމަކުރިތާ ތިން މިނެޓު ތެރޭ ޔުނައިޓެޑުން އަލުން ލީޑު ނެގިއިރު، ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ ބްރޫނޯ ފެނާންޑޭސްއެވެ. މިއީ އޭރިއާ ތެރެއިން ޔުނައިޓެޑުގެ ޕައުލް ޕޮގްބާއަށް ވިލާގެ ޑަގްލަސް ލުއީޒް ކުރި ފައުލަކަށް ރެފުރީ ދިން ޕެނަލްޓީއެކެވެ. އޭގެ ފަހުން މި މެޗުގައި ޔުނައިޓެޑަށް ލީޑު ފުޅާކޮށްދިނުމަށް ޕޮގްބާއަށް ވަނީ ރަނގަޅު ފުރުސަތެއް ލިބި ބޭކާރުވެފައެވެ. އަދި ނަތީޖާ ހަމަހަމަކުރަން ވިލާގެ އަންވަރު އެލް-ޣާޒީ އާއި މެޓީ ކޭޝް ފޮނުވާލި ހަމަލާތައް ޔުނައިޓެޑުގެ ގޯލްކީޕަރު ޑޭވިޑް ޑެ ހެއާ ވަނީ މަތަކޮށްފައެވެ.

މި ނަތީޖާއާއެކު އެއްވަނައިގައި އޮތް ލިވަޕޫލާއި ދެވަނައިގައި އޮތް ޔުނައިޓެޑަށްވެސް ކުޅުނު 16 މެޗުން ވަނީ 33 ޕޮއިންޓް ލިބިފައެވެ. އަދި ތިންވަނައިގައި އޮތް ލެސްޓާ އާއި ހަތަރުވަނައިގައި އޮތް އެވަޓަނަށް 16 މެޗުން ލިބިފައިވަނީ 29 ޕޮއިންޓެވެ. މީގެ އިތުރުން ހުކުރު ދުވަހުގެރޭ ޔުނައިޓެޑް އަތުން ބަލިވި ވިލާ އޮތީ ތާވަލުގެ ހަވަނައިގައި 15 މެޗުން 26 ޕޮއިންޓާއެކުއެވެ.