އިޓާލިއަން ލީގުގައި އާދީއްތަ ދުވަހުގެ ހަވީރު ލާޒިއޯ އަދި ޔުވެންޓަސް ބައްދަލުކުރި މެޗު އެއްވަރުވެގެން ނިމިއްޖެއެވެ.

ލާޒިއޯގެ ދަނޑުގައި ކުޅުނު މި މެޗު އެއްވަރުވީ 1-1 ގެ ނަތީޖާއަކުންނެވެ.

މި މެޗުގެ ވަރަށް ކުރީ ކޮޅު ޔުވެންޓަސްއިން ވަނީ ލަނޑު ޖަހާ ލީޑު ނަގާފައެވެ. މެޗު ފަށައިގެން 15 ވަނަ މިނެޓުގައި މި ލަނޑު އެޓީމަށް ކާމިޔާބުކޮށްދިނީ އިތުބާރު ފޯވާޑް ކްރިސްޓިއާނޯ ރޮނާލްޑޯއެވެ. މި ލަނޑަށްފަހުވެސް ޔުވެންޓަސްއިން ވަނީ ލާޒިއޯގެ ހާފަށް ބާރު ބޮޑުކޮށް ގިނަ ހަމަލާތަކެއް އުފައްދާފައެވެ. އެގޮތުން ފުރަތަމަ ހާފު ނިމުމުގެ ކުރިން ރޮނާލްޑޯ އާއި އަލްވާރޯ މޮރާޓާއަށްވެސް ވަނީ ލީޑު ފުޅާކުރުމަށް ފުރުސަތުތަކެއް ލިބި ބޭކާރުވެފައެވެ.

މެޗުގެ ދެވަނަ ހާފުގައި ލާޒިއޯއިން އެ ޓީމުގެ ކުޅުން ރަނގަޅުކުރިއިރު، މި ހާފުގައި އެ ޓީމުން ވަނީ ޔުވެންޓަސްގެ ގޯލަށް ނުރައްކާކޮށް ގިނަ ހަމަލާތަކެއް އުފައްދާފައެވެ. އެގޮތުން ލާޒިއޯގެ ފޯވާޑް ހޮއަކީން ކޮރެއާއަށް ލިބުނު ފުރުސަތުތައް ފާހަގަކޮށްލެވެއެވެ.

މި މެޗުން ޔުވެންޓަސް މޮޅުވާން ދަނިކޮށް ލާޒިއޯއިން މެޗުގެ ނަތީޖާ އެއްވަރުކުރީ އިތުރު ވަގުތު ނިމެން މިނެޓަކަށް ވެފައި ވަނިކޮށެވެ. މި ލަނޑު އެޓީމަށް ކާމިޔާބުކޮށްދީފައިވަނީ ފެލީޕޭ ކައިސޭޑޯއެވެ.

މި ނަތީޖާއާއެކު އެންމެ ފަހުގެ ޗެމްޕިއަން ޔުވެންޓަސް ވަނީ އިޓާލިއަން ލީގުގެ ތިންވަނައަށް ވެއްޓިފައެވެ. ޔުވެންޓަސް ތާވަލުގެ ތިންވަނައިގައި އޮތީ ކުޅުނު ހަތް މެޗުން ލިބުނު 13 ޕޮއިންޓާއެކުއެވެ. ތާވަލުގެ އެއްވަނައިގައި އޮތީ އޭސީ މިލާނަށް ކުޅުނު ހަ މެޗުން 16 ޕޮއިންޓް ލިބިފައިވާއިރު، ތާވަލުގެ ދެވަނައިގައި އޮތް ސަސުއޯލޯއަށް ވަނީ ކުޅުނު ހަތް މެޗުން 15 ޕޮއިންޓް ލިބިފައެވެ.