ޕްރިމިއާ ލީގުގައި ޓޮޓެންހަމް ހޮޓްސްޕާ ބަލިކޮށް މެންޗެސްޓާ ޔުނައިޓެޑުން އާސެނަލްއާ ޕޮއިންޓްގެ ގޮތުން އެއްވަރުކޮށްފިއެވެ.

އާދީއްތަ ދުވަހުގެ ރޭ ކުޅުނު މެޗު ޓޮޓެންހަމްއާ ވާދަކޮށް ޔުނައިޓެޑުން މެޗު ކާމިޔާބުކުރީ 0-1 ގެ ނަތީޖާއަކުންނެވެ.

ޓޮޓެންހަމް ދަނޑުގައި ކުޅުނު މި މެޗު ފަށައިގެން ބޯޅަ ކޮންޓްރޯލްކޮށްގެން ރަނގަޅަށް ކުޅެމުންދިޔައީ އެ ޓީމުންނެވެ. އެގޮތުން އެޓީމުން ވަނީ ޔުނައިޓެޑުގެ ހާފަށް ބާރުބޮޑުކޮށް ހަމަލާތަކެއް އުފައްދާފައެވެ.

މި ހާފްގައި ޓޮޓެންހަމް އިން ފޮނުވާލި ގިނަ ހަމަލާތައް ޔުނައިޓެޑުގެ ކީޕަރު ޑޭވިޑް ޑެހެއާ ވަނީ ދިފާއުކޮށްފައެވެ. ޔުނައިޓެޑުން މެޗުގެ ލީޑު ނެގީ 44 ވަނަ މިނެޓުގައި ޕައުލް ޕޮގްބާގެ އެހީތެރިކަމާ އެކު މާކަސް ރަޝްފޯޑް ކާމިޔާބުކުރި ލަނޑުންނެވެ.

ފުރަތަމަ ހާފް ނިމުނީ ރަޝްފޯޑްގެ ލަނޑުން ޓޮޓެންހަމްގެ މައްޗަށް 0-1 ގެ ނަތީޖާއިން ޔުނައިޓެޑު ކުރީގައި އޮވެގެންނެވެ.

ދެވަނަ ހާފް ފެށިގެން ޓޮޓެންހަމް އިން އެ ޓީމުގެ އެޓޭކްތައް ވަރުގަދަކޮށްފައިވާއިރު، ގިނަ ހަމަލާތަކެއް ޔުނައިޓެޑުގެ ގޯލަށް ވަނީ ފޮނުވާލާފައެވެ. ނަމަވެސް އެޓީމަށް ލަނޑެއް ޖެހޭ ގޮތް ވަނީ ނުވެފައެވެ.

މި ހާފްގައި ޔުނައިޓެޑަށް ވެސް ލަނޑު ޖެހުމަށް ފުރުސަތުތަކެއް ލިބިފައިވާއިރު، އެ ފުރުސަތުތަކުގެ ބޭނުން އެޓީމަށް އެންމެ އެދެވޭ ގޮތެއްގައި ހިފިފައެއް ނުވެއެވެ.

މި ނަތީޖާއާ އެކު ޔުނައިޓެޑު ވަނީ ކުޅުނު 22 މެޗުން 41 ޕޮއިންޓް ހަމަކޮށް، ފަސްވަނައިގައި އޮތް އާސެނަލްއާ ޕޮއިންޓްގެ ގޮތުން ހަމަހަމަކޮށްފައެވެ. ޔުނައިޓެޑަށް ހަވަނަ ލިބުނީ ލަނޑުގެ ތަފާތުންނެވެ.

މެޗުން ބަލިވި ޓޮޓެންހަމް އޮތީ ކުޅުނު 22 މެޗުން ލިބުނު 48 ޕޮއިންޓާއެކު ޕޮއިންޓް ތާވަލުގެ ތިންވަނައިގައެވެ. މެޗުން ޓޮޓެންހަމް މޮޅުވިނަމަ ދެވަނައިގައި އޮތް މެންޗެސްޓާ ސިޓީއަށްވުރެ އެއް މެޗު އިތުރަށް ކުޅެގެން ދެވަނަ ލިބޭނެއެވެ.