އިންޓަގެ ކޯޗަކަށް ލާޒިއޯ ދޫކޮށްލި އިންޒާގީ

އިޓަލީގެ ޗެމްޕިއަން އިންޓަ މިލާނުގެ ކޯޗަކަށް ދާދި ފަހުން ލާޒިއޯ ދޫކޮށްލި ސިމޯން އިންޒާގީ ހަމަޖަައްސައިފިއެވެ.

އިންޓަގެ ކޯޗަކަށް އިންޒާގީ ހަމަޖެއްސީ، އިޓާލިއަން ލީގުގެ ޗެމްޕިއަންކަން އިންޓައަށް ހޯދައިދިނުމަށް ފަހު އެ ޓީމުގެ ކޯޗުކަން އެންޓޯނިއޯ ކޮންޓޭ ދޫކޮށްލުމުންނެވެ. މި ސީޒަނުގެ ލީގު ޗެމްޕިއަންކަން އިންޓައިން ހޯދިއިރު، މިއީ މިދިޔަ 11 އަހަރު ތެރޭ އެ ޓީމުން ލީގު ހޯދި ފުރަތަމަ ފަހަރެވެ. އަދި މިއީ އިންޓައިން އެ ކުލަބުގެ ތާރީޚުގައި ލީގު ކާމިޔާބުކުރި 19 ވަނަ ފަހަރެވެ.

ރިޕޯޓުތައް ބުނާ ގޮތުން ކޮންޓޭ އިންޓަގެ އެއްބަސްވުން އުވާލަން ނިންމީ އެ ޓީމުގެ ދަރަނިތައް ކުޑަކުރުމުގެ ގޮތުން 80 މިލިޔަން ޔޫރޯއަށް ވާ ވަރަށް ކުޅުންތެރިން ވިއްކާލަން އެ ޓީމުގެ ވެރިން ނިންމުމާ ގުޅިގެންނެވެ. އޭގެ ތެރޭގައި ރޮމެލޫ ލުކާކޫ، އަޝްރަފް ހަކީމީ، ނިކޯލޯ ބަރެއްލާ، ލަޓާރޯ މާޓިނޭޒް އަދި މިލާން ސްކްރިނިއޭ ހިމެނޭ ކަމަށްވެސް ރިޕޯޓުތައް ބުނެއެވެ. އެކަމަކު ދާދި ފަހުން ދިން އިންޓަވިއުއެއްގައި ލުކާކޫ ވަނީ އޭނާ އަންނަ ސީޒަނުގައި އިންޓައިން ފެންނާނެ ކަމަށް ބުނެފައެވެ.

މިދިޔަ ހަފުތާގައި ކޮންޓޭ އިންޓަ ދޫކޮށްލާފައިވާއިރު، ބުރާސްފަތި ދުވަހު އެ ޓީމުން ވަނީ އުމުރުން 45 އަހަރުގެ އިންޒާގީއަށް ކޯޗުގެ މަގާމު ހަވާލުކޮށްފައެވެ. އަންނަ ސީޒަނަށް އިންޓަގެ ކޯޗުގެ މަގާމާ އިންޒާގީ ހަވާލުވިއިރު، އޭނާ މިހާތަނަށް އިރުޝާދުދީފައިވަނީ ލާޒިއޯއަށް އެކަންޏެވެ. އެގޮތުން 2016 ވަނަ އަހަރުގެ އޭޕްރީލް މަހުން ފަށައިގެން މިދިޔަ މެއި މަހާ ހަމަށް އިންޒާގީ ލާޒިއޯއަށް އިރުޝާދުދިންއިރު، މި މުއްދަތުގައި އޭނާ ވަނީ އެ ޓީމާއެކު އިޓާލިއަން ކަޕް އެއް ފަހަރު އަދި އިޓާލިއަން ސުޕަ ކަޕް ދެ ފަހަރު ކާމިޔާބުކޮށްފައެވެ.