ކުރީގެ ރައީސް ނަޝީދު އެނބުރި އިނގިރޭސިވިލާތަށް!
ލަންކާ އަށް ވަޑައިގެންނެވީ މާޗް މަހުގެ ފަހުކޮޅު
ކުރީގެ ރައީސް މުހައްމަދު ނަޝީދު
މާޗްމަހުގެ ފަހުކޮޅު ލަންކާއަށް ވަޑައިގެން އުޅުއްވުމަށް ފަހު ކުރީގެ ރައީސް މުހައްމަދު ނަޝީދު އެނބުރި އިނގިރޭސި ވިލާތަށް ވަޑައިގަންނަވައިފިއެވެ.
މޯލްޑިވިއަން ޑިމޮކްރެޓިކް ޕާޓީގެ އިސް އޮފިޝލަކު ރާއްޖެއެމްވީއަށް ވިދާޅުވީ، ރައީސް ނަޝީދު މިހާރު އެނބުރި އެމަނިކުފާނު ހިމާޔަތް ހޯއްދަވައިގެން ހުންނެވި އިނގިރޭސި ވިލާތަށް އެނބުރި ބަޑައިގެންފި ކަމަށެވެ. އެމަނިކުފާނު އިނގިރޭސި ވިލާތަށް ވަޑައިގެންނެވީ ބުރާސްފަތި ދުވަހުގެ ރޭގެ ވަގުތެއްގައި ކަމަށް އޮފިޝަލް ވިދާޅުވިއެވެ.
ނަޝީދު ލަންކާގައި ހުންނަވައި ސިޔާސީ އެކި ފަރާތްތަކާއި، ބޭރުގެ ޑިޕްލޮމެޓުންނާ ވެސް ވަނީ ބައްދަލު ކުރައްވާފަ އެވެ. އަދި ރާއްޖޭގެ ކުރިމަގު ބަށްޓަން ކުރުމަށްޓަކައި ކަންކަން ދެން ކުރިއަށް ގެންދަންވީ ގޮތާ ގުޅޭގޮތުން ރާއްޖޭގެ ސިޔާސީ އިސް ބޭފުޅުންނާ ވަނީ މަޝްވަރާ ބައްދަލުވުންތައް ބާއްވާފައި ވެއެވެ.
ރައީސް ނަޝީދަށް 13 އަހަރުގެ ޖަލު ހުކުމެއް އިއްވާފައިވާއިރު، އެމަނިކުފާނު ބޭސްފަރުވާއަކަށް ލަންޑަނަށް ވަޑައިގަތުމުން އެގައުމުން ވަނީ އެމަނކުފާނަށް ހިމާޔަތްދީފައެވެ. އަދި އިނގިރޭސި ވިލާތަށް ވަޑައިގެން ފަހުން ރާއްޖެވަޑައިނުގެންނެވި ނަމަވެސް އަވަށްޓެރި ސްރީލަންކާއަށް ދޭތެރެ ދޭތެރެއިން ވަޑައިގަންނަވައެވެ.
ޖަލަށް އެނބުރި ދާންޖެހުނުނަމަވެސް ރާއްޖެ ވަޑައިގަންނަވާނެ ކަމަށް އެމަނިކުފާނު ތަކުރާރުކޮށް ގެންދަވަނީ ވިދާޅުވަމުންނެވެ. އެހެންނަމަސް ވަޑައިގަންނަވާނެ ވަކިދުވަހެއް ވިދާޅެއް ނުވެއެވެ.
ތޭރަ އަހަރުގެ ޖަލުހުކުމެއް އެމަނިކުފާނުގެ މައްޗަށް އިއްވީ ކްރިމިނަލް ކޯޓުގެ އިސްގާޒީ އަބްދުﷲ މުހައްމަދު ބަންދުކުރި މައްސަލާގަ އެވެ. މީގެ އިތުރުން އެމަނިކުފާނުގެ ވެރިކަމުގައި އެއިރުގެ މުލަކު ދާއިރާގެ މެންބަރު އަބްދުﷲ ޔާމީން އާރަށުގައި ބަންދުކުރި މައްސަލައިގައި ރައީސް ނަޝީދުގެ މައްޗަށް ޓެރަރިޒަމުގެ ދައުވާކުރަން ވަނީ ފޮނުވާފައެވެ. އެހެނަސް އެދައުވާ ކުރިއަށް ނުދަނީ ރައީސް ނަޝީދު ގައުމުން ބޭރުގައި ހުންނަވާތީއެެވެ.
