މާލެ ސަރަހައްދުގައި ޕަބްލިކް ޓްރާންސްޕޯޓްގެ ހިދުމަތް ނުވަތަ މިނީ ބަހުގެ ހިދުމަތް ނުފެށި ލަސްވަނީ އެކަމަށް ކަނޑައެޅިފައިވާ ބަޖެޓުން އެހިދުމަތް ފެށެންނެތުމުން ކަމަށް ޓްރާންސްޕޯޓް މިނިސްޓަރ އައިޝަތު ނަހުލާ ވިދާޅުވެއްޖެއެވެ.
ޓެކްސީ ޑްރައިވަރުންގެ ހުރި ކަންބޮޑުވުންތަކަށް ހައްލު ހޯދައިދިނުމަށް ރައްޔިތުންގެ މަޖިލީހަށް ކުރެވެން ހުރި ކަންކަން ބެލުމަށް އިގްތިޞާދީ ކޮމިޓީން ވަނީ ޓްރާންސްޕޯޓް މިނިސްޓަރ އައިޝަތު ނަހުލާ އާ ބައްދަލުކުރައްވާފައެވެ. އަންގާރަ ދުވަހު އޮންލައިންކޮށް ކުރިޔަށް ގެންދިޔަ ކޮމިޓީ ބައްދަލުވުމުގައި މިނީ ބަހުގެ ހިދުމަތަކީ ރައީސުލްޖުމްހޫރިއްޔާގެ ރިޔާސީ ވައުދަކަށްވާއިރު އެހިދުމަތް ދިނުމުގެ ކަންކަން ގޮސްފައިވާ ހިސާބާގުޅޭގޮތުން މެމްބަރަކު ވަނީ މިނިސްޓަރ އަރިހުން ސުވާލު އައްސަވާފައެވެ.
އެސުވާލަށް ޖަވާބު ދެއްވަމުން މިނިސްޓަރ ވިދާޅުވީ ޕަބްލިކް ޓްރާންސްޕޯޓް ހިދުމަތް ގާއިމުކުރުމަކީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ރިޔާސީ ވައުދަކަށްވާއިރު އެކަމަށް ވަރަށް ބޮޑަށް އިސްކަމެއްދެއްވައިގެން އެމަސައްކަތް ކުރިޔަށް ގެންދަވާކަމަށެވެ. އެގޮތުން ހިދުމަތް ފެށުމަށް ބޭނުންވާ ބަޖެޓް ލިބުމުގައި ދިމާވެފައިވާ ދަތިތަކުގެ ސަބަބުން ބޭރުގެ އެހީތެރިކަން ހޯދުމަށް އެެދިފައިވާނެކަމަށް މިނިސްޓަރ ވިދާޅުވިއެވެ.
ފުރަތަމަ ފޮރިން މިނިސްޓްރީ މެދުވެރިކޮށް އެހީ ލިބޭނެ މަގެއް އޮތްތޯ ބެލުމަށް ސިޓީއަކުން ވާނީ ދަންނަވާފައި. އެބޭފުޅުންވެސް މަސައްކަތްކުރަމުންދަނީ. އެހެންނަމަވެސް އަދިވެސް އަލިމަގެއް ފެނިފައިނުވޭ. ޔޫއެންއަށް ހުށަހަޅައިގެންވެސް އެމަސައްކަތް ކުރަމުންދާކަން ފާހަގަކުރަން. އަދި އިންޑިއަން އެއިޑް އަށް ހުށަހަޅައިގެން އެހީ ލިބޭތޯ ބަލަމުންދަނީ.އައިޝަތު ނަހުލާ/ ޓްރާންސްޕޯޓް މިނިސްޓަރ
މިނިސްޓަރ ވިދާޅުވީ ހޯދަން މަސައްކަތްކުރަމުން އަންނަނީ ތިމާވެއްޓާ ރައްޓެހި އިލެކްޓްރިކް ބަސްތަކެއް ކަމަށެވެ. އެހެންނަމަވެސް އެއްވެސް ފަރާތަކުން އެދެވޭ ޖަވާބެއް ނުދޭކަމަށް މިނިސްޓަރ ވިދާޅުވިއެވެ. އަދި މިކަމަށް ބޭނުންވާ ފައިސާ ނުލިބުމުގެ ސަބަބުން އެކަން ރައީސުލްޖުމްހޫރިއްޔާގެ ސަމާލުކަމަށްވެސް ގެންނެވިކަމަށް މިނިސްޓަރ ވިދާޅުވިއެވެ.
އޭގެފަހުގައި އަޅުގަނޑުމެންނަށް މިއަހަރު ލިބުނު ބަޖެޓްގެ ތެރެއިން ކޮންމެސްވަރެއް ކަނޑައެޅުނު. އެއީ 16 މިލިއަން ރުފިޔާ. އެކަމަކު 16 މިލިއަން ރުފިޔާއިން ދެ ބަސް ނުވަތަ ތިން ބަސް ގަނެގެން މިހިދުމަތް ނުފެއްޓޭނެތީ އެބަޖެޓް ހުރި ގޮތަށް ބަހައްޓާފައި ހުންނާނީ. ހިލޭ އެހީގެ ދަށުން އެއްވެސް ފަރާތަކުން އިނާޔަތެއް ލިބޭތޯ މަސައްކަތްކުރަމުންދަނީއައިޝަތު ނަހުލާ/ ޓްރާންސްޕޯޓް މިނިސްޓަރ
މިނީ ބަހުގެ ހިދުމަތް ނުފެށި ލަސްވަނީ ފައިސާގެ ދަތިކަން ހުރުމުންކަމަށް މީގެކުރިންވެސް ޓްރާންސްޕޯޓް މިނިސްޓްރީން ބުނެފައިވެއެވެ. އެކަން ކުރުމަށްޓަކައި 2019 ވަނަ އަހަރު އެމްޓީސީސީއާއެކު ސޮއިކޮށްފައިވެސްވެއެވެ. އެހިދުމަތް ފެށުމަށް އޭރު ރާވާފައިވަނީ ހުސްވި 2020 ވަނަ އަހަރުއެވެ.
