ޔޫރޯގައި ޑި ބްރޭނާއަށް ކުޅެވޭނެކަން ހަފުތާއެއްގެ ތެރޭގައި އެނގޭނެ

މި މަހު ފަށާ ޔޫރޯ ފުޓްބޯޅަ މުބާރާތުގައި މެންޗެސްޓާ ސިޓީއަށް ކުޅެމުން އަންނަ މިޑްފީލްޑަރު ކެވިން ޑި ބްރޭނާއަށް ކުޅެވޭނެކަން ހަފުތާއެއްގެ ތެރޭގައި އެނގޭނެ ކަމަށް ބެލްޖިއަމުގެ ކޯޗު ރޮބާޓޯ މާޓިނޭޒް ބުނެފިއެވެ.

އުމުރުން 29 އަހަރުގެ ޑި ބްރޭނާއަށް އަނިޔާވީ މިދިޔަ ހޮނިހިރު ދުވަހުގެރޭ ކުޅުނު ޔުއެފާ ޗެމްޕިއަންސް ލީގުގެ ފައިނަލް މެޗުގެ ތެރެއިންނެވެ. އެ މެޗުން ޗެލްސީ އަތުން 1-0 ގެ ނަތީޖާއަކުން ސިޓީ ބަލިވިއިރު، ދެވަނަ ހާފުގައި ޑި ބްރޭނާގެ މޫނަށް ލިބުނު އަނިޔާއަކާ ގުޅިގެން އޭނާ ވަނީ ބަދަލުކޮށްފައެވެ.

ރިޕޯޓުތައް ބުނާ ގޮތުން ޗެލްސީގެ އެންޓޯނިއޯ ރުޑިގާ ކުރި ފައުލަކާއެކު ޑި ބްރޭނާގެ ނޭފަތާއި ލޮލަށް ވަނީ އަނިޔާވެފައެވެ. އެ އަނިޔާގެ ތަފުސީލު އަދި މިހާތަނަށް ހާމަކޮށްފައި ނުވި ނަމަވެސް، ދާދި ފަހުން ބެލްޖިއަމުގެ ކޯޗު ރޮބާޓޯ މާޓިނޭޒް ވަނީ އެ އަނިޔާތަކާ ގުޅިގެން ޑި ބްރޭނާ އޮޕަރޭޝަނެއް ކުރަން ނުޖެހޭނެ ކަމަށް ބުނެފައެވެ. މާޓިނޭޒް ބުނީ ޔޫރޯގައި ޑި ބްރޭނާއަށް ކުޅެވޭނެކަން ކުރިއަށް އޮތް ހަފުތާގެ ތެރޭގައި އެނގޭނެ ކަމަށާއި، އުންމީދަކީ އަންނަ ހަފުތާގައި އޭނާ އެއްކޮށް ފިޓްވެ، ޓީމުގެ ފަރިތަކުރުންތަކުގައި ބައިވެރިވުން ކަމަށެވެ.

ޔޫރޯގައި ޑި ބްރޭނާއަށް ކުޅެވޭނެކަން ހަފުތާއެއްގެ ތެރޭގައި އެނގޭނެ ކަމަށް މާޓިނޭޒް ބުނިއިރު، ޗެމްޕިއަންސް ލީގުގެ ފައިނަލް މެޗަށްފަހު ކުރި ޓްވީޓެއްގައި ޑި ބްރޭނާ ވަނީ އޭނާގެ ހާލު ރަނގަޅު ކަމަށް ބުނެފައެވެ. ރިޕޯޓުތައް ބުނާ ގޮތުން ޑި ބްރޭނާ ވަނީ އެ އަނިޔާތަކުގެ ތަފުސީލު ހޯދުމަށް މެންޗެސްޓާގެ ބައެއް ހޮސްޕިޓަލްތަކުން ޓެސްޓުތައް ހަދާފައެވެ.

މި މަހުގެ 11 ވަނަ ދުވަހު ޔޫރޯ ފަށާއިރު،  އެ މުބާރާތުގައި ބެލްޖިއަމް ހިމެނުނީ ގުރޫޕް ބީ ގައެވެ. އެ ގުރޫޕުގައި ދެން ހިމެނެނީ ޑެންމާކާއި، ފިންލެންޑް އަދި ރަޝިއާއެވެ. ޔޫރޯގެ ފުރަތަމަ މެޗުގައި މި މަހުގެ 13 ވަނަ ދުވަހު ބެލްޖިއަމް ނުކުންނާނީ ރަޝިއާއާ ދެކޮޅަށެވެ.